Genesis 3:1-24
3 Jehovah Pathian nih a sermi saram vialte lakah rul hi a fimzer bikmi a si. Rul nih minu cu “Dum chung ah a ummi thingkung vialte i a thei kha nan ei lai lo tiah Pathian nih aan ti taktak hna maw?” tiah a hal.
2 Mah tikah minu nih rul cu hitin a leh: “Dum chung ah a ummi thingkung hna i an thei cu kan ei khawh ko.
3 Asinain Pathian nih dum laifang i a ummi thingkung i a thei tu cu ‘Nan ei lai lo, nan tawng lai lo; nan ei, nan tawngh ahcun nan thi lai’ tiah a ti.”
4 Mah tikah rul nih cun “Nan thi hrimhrim lai lo.
5 Pathian nih cutin aan timi hna cu mah thingthei nan ei ni thawk in a ṭha le a chia nan hngalh lai i amah Pathian bantuk nan si lai ti kha a hngalh caah a si” tiah a ti.
6 Nu nih cun thingkung cu ei duh awk ngai le mithlang ngai a simi kha a hmuh. Cucaah a thei kha a lawh i a ei. Mah hnuah a vapa a um tikah a vapa cu a pek i a ei ve.
7 Mah tikah an pahnih in an mit a hung fim i taklawng an si kha an hun hngalh. Cucaah theipi hnah kha an ṭhit i an i hruk.
8 Zanlei sang a phanh tikah dum chung i aa chawkmi Jehovah Pathian aw kha an theih tikah mipa le a nupi cu Jehovah Pathian hmai in dum chung i thingkung hna lakah an i thup.
9 Jehovah Pathian nih mipa cu a auh lengmang i “Khoika ah dah na um?” tiah a ti.
10 A donghnak ah mipa nih “Dum chung ah na aw kha ka theih. Asinain taklawng in ka si caah ka ṭih i kaa thup” tiah a leh.
11 Mah tikah Pathian nih “Taklawng in na si cu aho nih dah aan chimh? Ei hlah tiah nawl kaan pekmi thingkung i a thei kha na ei dahra?” tiah a hal.
12 Mipa nih cun “Na ka pekmi nu nih mah thingkung i a thei kha a ka pek caah ka ei” tiah a leh.
13 Mah tikah Jehovah Pathian nih minu cu “Zeicah cutin na tuah?” tiah a hal i minu nih “Rul nih a ka hlen caah ka ei” tiah a leh.
14 Mah tikah Jehovah Pathian nih rul cu “Hi bantuk in na tuah caah innzuat saṭil le ramlak saram vialte lakah nang cu chiatserh na si. Na paw in na lawn lai i na nun chung vialte leidip kha na ei lai.
15 Nangmah le minu karah, na tefa le minu tefa karah i huatralnak a um lai. Anih nih na lu kha aan rial lai i nang nih a kedil kha na cuk lai” tiah a ti.
16 Pathian nih minu cu “Fa na pawi chung fahnak na inmi kha ka karhter lai. Fa na hrin tikah nganfahnak na ing lai. Na va cu na duh tuk lai i anih nih aan uk lai” tiah a ti.
17 Cun Adam* kha “Na nupi bia na ngaih i ei hlah tiah nawl kaan pekmi thingkung i a thei kha na ei caah vawlei cu chiatserh a si cang. Vawlei in na ei awk rawl na hmuh nakhnga na nun chung fakpi in rian na ṭuan lai.
18 Hlingbur le belh an kho lai i vawlei in a khomi thingram kha na ei a hau lai.
19 Leidip in lakmi na si i leidip ah na kir ṭhan hlan tiang na ei awk rawl na hmuh nakhnga thlan hripi chuak in rian na ṭuan a hau lai. Nang cu leidip na si i leidip ah na kir ṭhan lai” tiah a ti.
20 Mah hnuah Adam nih a nupi kha Evi* tiah min a sak. Zeicahtiah anih cu a nungmi vialte hna i an nu a hung si lai caah a si.
21 Jehovah Pathian nih Adam le a nupi an i hruk awkah saphaw in angki fual a serpiak hna.
22 Mah hnuah Jehovah Pathian nih “Hi pa cu kanmah bantuk in a ṭha le a chia a hngalh cang. Cucaah nunnak thingkung i a thei kha a banh i a ei nakhnga lo le zungzal in a nun nakhnga lo pakhatkhat tuah a hau” tiah a ti.
23 Cucaah Jehovah Pathian nih mipa cu amah ser a sinak vawlei kha thlawh awkah Eden dum in a ṭhawl.
24 Cutin a ṭhawl hnuah nunnak thingkung lei kalnak lam kha cawngh awkah Eden dum i nichuahlei ah Cherubim hna le aa mer pengmi mei vainam kha a chiah.
