Genesis 40:1-23
40 Cu hnuah Izipt siangpahrang hrai putu bawi le changreu sertu bawi nih an bawipa Izipt siangpahrang cung ah sualnak an tuah.
2 Cucaah Faraoh cu a bawile pahnih a simi hrai putu bawi le changreu sertu bawi cung ah a thin a hung tuk i,
3 Josef thong a tlaknak runvengtu bawi inn i thong ah a thlak hna.
4 Runvengtu bawi nih Josef kha anmah zohkhenh awkah rian a pek i an sinah a chiah. Annih cu thong chung ah ni tampi an um.
5 Zankhat cu Izipt siangpahrang hrai putu le changreu sertu nih thonginn chung ah mang an manh veve i an mang cu sullam a ngei veve.
6 A thaizing zingka ah Josef a rat tikah mithmai chia ngai in an ummi kha a hmuh.
7 Cucaah a bawipa inn ah amah he thong a tla vemi Faraoh bawile kha “Zeicah nihin hi nan mithmai a chiat?” tiah a hal hna.
8 Mah tikah annih nih “Mang kan man veve, asinain kan mang a sullam a kan lehpiak khotu ahohmanh an um lo” tiah an ti. Josef nih “Mang a sullam a let khotu cu Pathian lawnglawng a si. Nan mang cu ka chim tuah u” tiah a ti hna.
9 Cucaah hrai putu bawi nih Josef cu a mang kha a chimh i “Ka mang ah mitsur ruang pakhat ka hmuh.
10 Mah mitsur ruang cu nge pathum a ngei i a hnah an hung corh, an par i mitsur bor cu an hung hmin colh.
11 Cun Faraoh hrai kha kaa put, mitsur thei kha ka lak i hrai chung ah ka sur. Cun Faraoh cu ka pek” tiah a ti.
12 Mah tikah Josef nih “Na mang a sullam cu hihi a si: A nge pathum cu ni thum tinak a si.
13 Ni thum hnuah Faraoh nih aan chuah lai i na hmun ah aan chiah ṭhan lai, a hrai putu na rak si lio i na tuah bantuk in Faraoh cu a hrai kha na pek ṭhan lai.
14 Na caah thil sining a ṭhat tikah rak ka philh te hlah. Zaangfahnak in ka cung ah a fekmi dawtnak langhter law hi thong chung hin ka chuah khawh nakhnga Faraoh kha ka chimhpiak te.
15 A tak ti ahcun kei cu Hebru ram in hramhram in an rak ka ratpimi a si. Hika zong ah thongthlak awk tlak zei sualnak hmanh ka tuahmi a um lo” tiah a ti.
16 Josef nih mang a sullam a ṭhatnaklei in a lehmi kha changreu sertu bawi nih a hmuh tikah “Kei zong ka mang ah a ṭhami changvut in sermi changreu bawm pathum kha ka lu ah kaa khinh.
17 A cung bik bawm chung ah Faraoh caah sermi changreu a phunphun an um, asinain changreu cu va nih an ei dih” tiah a ti.
18 Mah tikah Josef nih “Na mang a sullam cu hihi a si: Bawm pathum cu ni thum tinak a si.
19 Ni thum hnuah Faraoh nih na lu aan tan lai i tung cung ah aan thlai lai, cun na sa kha va nih an ei lai” tiah a ti.
20 A ni thumnak ni ah cun Faraoh chuah ni a hung si i a rianṭuantu vialte caah rawl danghnak puai a tuah. Cun a hrai putu bawi le changreu sertu bawi kha a rianṭuantu vialte hmaiah cun a chuahter hna.
21 Hrai putu bawi cu a hmasa a rian ah khan a chiah ṭhan i Faraoh kha hrai cu a pek ṭhan.
22 Asinain changreu sertu bawi cu thlai a si, Josef nih an mang sullam a lehpiak hna ning in a hung si.
23 Asinain hrai putu bawi nih Josef cu a hngal ti lo i a philh diam.
