Genesis 22:1-24
22 Mah hnuah a hmaanmi Pathian nih Abraham kha a hneksak i “Abraham!” tiah a auh tikah anih nih “Hika ah ka um ko!” tiah a leh.
2 Pathian nih “Na dawt tukmi na fapa ngeihchun Isak kha au law Moriah ram ah va kal. Cuka ah kaan hmuhsak laimi tlang ah khangh thawinak caah na pek lai” tiah a ti.
3 Abraham cu zingka tein a tho i laa kha a danh. Cun a salle pahnih le a fapa Isak kha a auh hna. Khangh thawinak caah thing kha a ceh i a hmaanmi Pathian nih a hmuhsakmi hmunlei ah aa thawh.
4 A ni thumnak ni ah Abraham nih cu hmun cu lamhla in a hei hmuh.
5 Abraham nih a salle kha “Nannih cu hika ah laa he hin rak taangta u. Asinain keimah le ka fapa tu cu khika ah kan va kal lai i Pathian kan va bia lai. Mah hnuah nan sinah kan rak kir ṭhan lai” tiah a ti.
6 Abraham nih khangh thawinak caah thing kha a lak i a fapa Isak cu a phorhter. Cun amah nih mei le namte kha aa put i an pahnih in hmunkhat ah an kal.
7 Isak nih a pa Abraham kha “Ka pa!” tiah a auh tikah “Hawi, ka fa!” tiah a leh. Isak nih cun “Hika ah mei le thing cu a um. Asinain khangh thawinak caah tuu tah khoika ah dah a um kun?” tiah a hal.
8 Abraham nih “Khangh thawinak ca tuu cu Pathian nih a khaan te ko lai, ka fapa!” tiah a leh. Cun an pahnih in hmunkhat ah an kal.
9 A donghnak ah a hmaanmi Pathian nih a hmuhsakmi hmun cu an phan. Abraham nih cuka ah biakṭheng pakhat a ser i a cung ah thing cu a pon. Cun a fapa Isak kut le ke kha a ṭem i biakṭheng i thingpon cung ah cun a ihter.
10 Cun Abraham nih namte kha aa lak i a fapa cu thah a timh.
11 Asinain Jehovah vancungmi nih vancung in “Abraham, Abraham!” tiah a auh tikah anih nih “Hika ah ka um ko!” tiah a leh.
12 Vancungmi nih “Ngakchiapa cu fahnak pe hlah, a cung ah zeihmanh tuah hlah, na fapa ngeihchunhte hmanh kha pek sian loin na ka um lo caah nang cu Pathian a ṭihmi na si ti kha atu cu ka hngalh cang” tiah a ti.
13 Abraham cu khua a hei cuan i lamhla nawn i hlingbur lakah a ki aa awkmi tuukawng pakhat kha a hei hmuh. Tuukawng cu a va lak i a fapa canah khangh thawinak ah a pek.
14 Abraham nih cu hmun cu Jehovah-Jireh* tiah min a sak. Cucaah nihin ni tiang, mi nih “Jehovah nih a tlang cung ah a herhmi kha a khaan te ko lai” tiah an ti tawn.
15 Jehovah vancungmi nih Abraham cu vancung in a voi hnihnak a auh ṭhan i,
16 hitin a ti: “Jehovah nih ‘Keimah min chalh in bia kaa kam, na fapa ngeihchunhte hmanh kha pek sian loin na ka um lo caah,
17 thluachuah kaan pek hrimhrim lai i na tefa cu vancung arfi le rilikam thetse bantuk in ka karhter hna lai. Na tefa nih an ral pawl khua kutka cu an lak lai.
18 Ka bia na ngaih caah vawleicung miphun vialte cu na tefa thawng in thluachuah an hmu lai’ tiah a ti.”
19 Mah hnuah Abraham cu a salle sinah a kir ṭhan i Beersheba lei ah an kal ṭhan. Cun Abraham cu cuka ah khua a sa rih ko.
20 A hnuah Abraham cu “Na upa Nahor nupi Milkah zong nih fapa tampi a hrin.
21 A fater cu Uz a si, a pahnihnak cu Buz a si i a pathumnak cu Aram pa Kemuel a si.
22 Cun Khesed, Hazo, Pildash, Jidlaf le Bethuel an si” tiah an chimh.
23 Mah fapa pariat cu Abraham a upa Nahor nupi, Milkah nih a hrinmi an si. Bethuel cu Rebekah pa a hung si.
24 A nuchun Reumah zong nih Tebah, Gaham, Tahash le Maakah kha a hrin hna.
Footnotes
^ A sullam “Jehovah Nih A Khaan Lai; Jehovah Nih A Hmuh Lai.”
