Genesis 12:1-20
12 Jehovah nih Abram kha “Na ram, na rualchan le na pa inn kha chuahtak law kaan hmuhsak laimi ram ah va kal.
2 Miphun ngan ah kaan ser lai i thluachuah kaan pek lai, na min ka thanter lai i nangmah thawng in midang nih thluachuah an hmuh lai.
3 Nangmah thluachuah aan petu kha thluachuah ka pek ve hna lai i nangmah chiat aan serhtu kha chiat ka serh ve hna lai. Vawleicung mi vialte cu nangmah thawng in thluachuah an hmu hrimhrim lai” tiah a ti.
4 Jehovah nih a chimh ning in Abram cu a kal i Lot zong a sinah a kal ve. Haran khua in a chuah lioah Abram cu kum 75 a si cang.
5 Abram cu a nupi Sarai le a upa fapa Lot le an i khonmi thilri chawva vialte le Haran khua in an lakmi sal vialte he khan Kanaan ram lei ah cun an i thawh. Kanaan ram an phanh tikah,
6 Abram cu thingkung nganpipi an umnak Moreh hmun pawng in Shekhem tiang a kal thluahmah. Mah lio caan ah Kanaan mi cu cuka ram ah an um.
7 Jehovah cu Abram sinah a lang i “Hi ram hi na tefa kha ka pek hna lai” tiah a ti. Cucaah Abram nih a sinah a langmi Jehovah caah cuka ah biakṭheng pakhat a ser.
8 Mah hnuah cuka in Bethel khua nichuahlei tlangram ah aa ṭhial i thlam in khua a sa. Thlam in nitlaklei ah Bethel khua, nichuahlei ah Ai khua a um. Jehovah caah biakṭheng pakhat a ser i Jehovah min kha a thangṭhat.
9 Abram nih a thlam kha a phoih, hmun khat hnu hmun khat ah aa ṭhial i Negeb ram tiang a phan.
10 Kanaan ram ah mangṭam a tlung i Abram cu Izipt ram ah chikkhat va um ta ding in aa thawh. Zeicahtiah mangṭam cu a fak ngaingai.
11 Izipt ram an luh lai te ah Abram nih a nupi Sarai kha “Zaangfahnak in ka chimmi hi ngai hmanh! Nang cu muidawh na si.
12 Izipt mi nih an in hmuh tikah ‘Amah hi a nupi a si’ tiah an ti lai i an ka thah lai. Nang tu cu an in zuah ko lai.
13 A far ka si tiah na ti lai, cuticun nangmah thawng in ṭha tein an ka pehtlaih lai i ka nunnak cu an ka zuah ko lai” tiah a ti.
14 Abram cu Izipt ram a luhle cangka Izipt mi nih Sarai cu aa dawh tuk ti kha an hmuh.
15 Faraoh bawile zong nih Sarai kha an hmuh i zeitluk in dah aa dawh ti kha Faraoh sinah an va chimh. Cucaah Sarai cu Faraoh inn ah an kalpi.
16 Faraoh nih Sarai thawng in Abram cu ṭha tein a pehtlaih i tuu, caw, laa, sinum le kalauk hna kha a pek.
17 Jehovah nih Abram nupi Sarai ruang ah Faraoh le a chungkhar cung ah rai fakpi in a tlunter.
18 Cucaah Faraoh nih Abram cu a auh i “Zeicah ka cung ah hi bantuk thil hi na tuah? Na nupi a si kha zeicah na ka chimh lo?
19 Zeicah ‘Ka far a si’ tiah na ti? Cutin na chim caah pei nupi caah kaa lak hnik cu. Na nupi hi i lak law kal u!” tiah a ti.
20 Faraoh nih a mi pawl kha nawl a pek hna i Abram le a nupi cu an thilri vialte he Izipt ram in an kalter hna.
