Genesis 33:1-20
33 Jakob cu khua a hei cuan i Esau cu a mi 400 he an ratmi kha a hmuh. Cucaah Leah, Rachel le salnule pahnih sinah ngakchia pawl kha a ṭhen hna.
2 A hmai bik ah salnule le an fale kha a chiah hna. A lai ah Leah le a fale kha a chiah hna i a hnu bik ah Rachel le Josef kha a chiah hna.
3 Jakob cu an hmaiah a kal i a u kha a va naih. Cun vawlei ah voi sarih a bawk.
4 Mah tikah Esau nih cun a hun zuan hnawh i a kuh i a hnamh. Cun an pahnih in an ṭap.
5 Esau nih nu le ngakchia kha a hmuh hna tikah “Na sinah a ummi hna hi ahote dah an si?” tiah a hal. Jakob nih “Pathian nih na salpa a ka pekmi fale an si” tiah a leh.
6 Salnu hna le an fale cu hmaiah an rak chuak i an kunpiak.
7 Leah le a fale zong hmaiah an rak chuak i an kunpiak. Cun Rachel le Josef zong hmaiah an rak chuak i an kunpiak ve.
8 Esau nih “Lam pi ah ka tonmi hna le saṭil hna kha tah zeicah na rak thlah hna?” tiah a hal tikah Jakob nih “Ka bawipa, na mithmai ṭha hmuh ka duh caah a si” tiah a ti.
9 Esau nih cun “Tampi ka ngei ko, ka nau. Na saṭil cu nangmah nih i chiah ko hna” tiah a ti.
10 Asinain Jakob nih “A si lo, na mithmai ṭha ka hmuh ahcun hi ka laksawng hna hi ka cohlanpiak ko. Zeicahtiah na mithmai ṭha hmuh ka duh ruang ah hi laksawng hna hi ka rak putmi a si. Lunglawm tein na ka cohlan caah na mithmai ka hmuhmi cu Pathian mithmai hmuh bantuk a si.
11 Pathian nih mithmai ṭha a ka pek i ka herhmi vialte ka ngei dih ko. Na caah ka rak putmi laksawng hi i lak ko” tiah a nawl lengmang caah Esau nih cun aa lak.
12 A hnuah Esau nih “I thawh u sih law kal hna u sih. Kei nan hmaiah ka kal lai” tiah a ti.
13 Asinain Jakob nih “Ka bawipa, ka fale cu an ngakchia rih i fa a hringmi tuu le caw hna zong zohkhenh an hau ti kha na hngalh ko. Ni khat te ah khulrang in kan kalpi hna ahcun an run ning in an thi dih ko lai.
14 Cucaah ka bawipa, rak kan kaltak chung ko. Seir ah kan in phanh hlan tiang ka saṭil le ngakchia pawl an kal khawh tawk in duhsah tein kan ra ve ko lai” tiah a ti.
15 Esau nih cun “A si ahcun ka mi cheukhat hi kaan chiahtak kun lai” tiah a ti i Jakob nih “Cutin tuah a hau lo. Na mithmai ṭha ka hmuhmi in hin a za cang ko, ka bawipa” tiah a ti.
16 Cucaah Esau cu, cu ni ah cun Seir lei ah a kir ṭhan.
17 Jakob cu Sukkoth lei ah a kal i cuka ah amah caah inn a sak. A saṭilrun caah kawm a sak. Cucaah cuka hmun cu Sukkoth* tiah min a sak.
18 Jakob cu Paddan-aram in aa thawh hnuah Kanaan ram, Shekhem khua ah him tein a phan. Cuka khua pawng ah thlam in khua a sa.
19 Thlam a saknak lo cu Hamor fapale sinah ngun tangka 100 in a cawkmi a si. Hamor fapa pakhat cu Shekhem a si.
20 Cuka ah Jakob nih biakṭheng pakhat a sak i Pathian cu Israel Pathian a si tiah min a sak.
Footnotes
^ A sullam “Deu; Kawm.”
