Genesis 27:1-46
27 Isak cu a tar cang i a mit zong khua a hmu setsai ti lo. A fapa upa deuh Esau kha “Ka fapa!” tiah a auh i Esau nih cun “Hawi!” tiah a leh.
2 Isak nih cun “Atu cu ka tar cang i zei can dah ka nun rih lai ti ka hngal lo.
3 Cucaah atu na ram vaihnak hriamnam, na li le na thal kha i lak law ram va vai tuah. Cun sa va ka kahpiak.
4 Ka duh phun tein, thaw tein rak ka chuanpiak law rak ka put. Ka ei lai i ka thih hlanah thluachuah kaan pek lai” tiah a ti.
5 Isak nih a fapa Esau bia a ruahmi kha Rebekah nih a rak ngaih hna. Cun Esau cu ram sa kawl awk le ram vaih awkah aa thawh.
6 Rebekah nih a fapa Jakob kha “Atu naite ah na pa nih na u Esau sinah a chimmi bia kha ka theih.
7 ‘Ram sa rak ka kahpiak law rawl thaw tein ka chuanpiak. Cun ka ei lai i ka thih hlanah Jehovah hmaiah thluachuah kaan pek lai’ tiah a ti.
8 Cucaah ka fapa, ka bia hi ṭha tein ngai law kaan chimh ning in tuah.
9 Meheh run lakah va kal law meheh no a thaumi pahnih in rak pu. Cun na pa a duh phun tein, thaw tein ka chuan lai.
10 Cun meh cu na pa ei awkah na va pek lai. Cuticun a thih hlanah thluachuah aan pek lai” tiah a ti.
11 Jakob nih a nu Rebekah kha “Ka u Esau cu a hmul a tam i kei cu hmul ka ngei lo.
12 Ka pa nih a ka tawngh ah tah zeitin? A ka serhset tiah a ruah lai i thluachuahnak si loin chiatserhnak tu ka cung ah kaa tlunter sual lai” tiah a ti.
13 Mah tikah a nu nih cun “Ka fapa, na cung i chiatserhnak cu ka cung ah tlung ko seh. Ka chim ning in tuah law meheh no cu va ka lakpiak ko” tiah a ti.
14 Cucaah meheh no cu a va lak hna i a nu sinah cun a rak put. Cun a nu nih a pa duh phun tein a chuan.
15 Mah hnuah Rebekah cu innchung ah a lut i a fapa Esau hnipuan ṭha bik kha a va lak, cun Jakob cu a hrukter.
16 Jakob a kut le a hmul a um lonak a hngawng zong ah meheh phaw kha a benh hna.
17 Cun thaw tein a chuanmi rawl le changreu kha Jakob cu a pek.
18 Jakob cu a pa sinah a kal i “Ka pa!” tiah a auh tikah a pa nih cun “Hawi! Ka fa, ahodah na si?” tiah a ti.
19 Jakob nih a pa cu “Na fater Esau ka si. Na chim ning in ka tuah cang. Tho law ka rak putmi sa hi ei law thluachuah cu rak ka pe” tiah a ti.
20 Isak nih “Zeitindah cu tluk rang in cun na hmuh khawh, ka fapa?” tiah a hal tikah “Na Pathian Jehovah nih hmuh awkah a ka bawmh” tiah a leh.
21 Mah tikah Isak nih “Ka fa, rak ka naih tuah. Ka fapa Esau na si taktak maw, si taktak lo hngalh awkah kaan tawngh tuah lai” tiah a ti.
22 Jakob nih cun a hun naih i a pa Isak nih a tawngh tikah “Na aw cu Jakob aw a si nain na kut cu Esau kut a si fawn” tiah a ti.
23 A kut cu a u Esau bantuk in hmul in a khah caah Jakob a si kha a hngal lo. Cucaah thluachuah cu a pek.
24 Mah hnuah “Ka fapa Esau cu na si taktak maw?” tiah a hal ṭhan i “Ka si ko” tiah a leh.
25 Isak nih “Ka ei awkah sa cu rak pu law mah hnuah thluachuah kaan pek lai” tiah a ti. Jakob nih cun a rak put i a ei. Cun mitsur zu zong a rak put i a din.
26 A pa Isak nih cun “Ka fapa, rak ka naih law rak ka hnam tuah” tiah a ti.
27 Cucaah a hun naih i a hnamh tikah Isak nih cun a puan rim kha a theih. Cun thluachuah cu a pek i hitin a ti:
“Ka fapa rim hi Jehovah nih thluachuah a pekmi ram rim bantuk a si.
28 A hmaanmi Pathian nih van dap le vawlei ṭha, rawl tampi le mitsur zu thar tampi in, in pe ko seh.
29 Miphun tampi cu na sal an si lai i na hmaiah kun hna seh. Nang cu na unau hna bawi na si lai i na hmaiah kun hna seh. Nangmah chiat aan serhtu paoh cu chiatserh si hna seh law nangmah thluachuah aan petu paoh cu thluachuah pek si ve hna seh.”
30 Isak nih Jakob cu thluachuah a vun pek dih in le Jakob cu a pa Isak sinin a chuah bak ah khin a u Esau cu ram vaihnak in a rak tlung.
31 Anih zong nih rawl cu thaw tein a chuan i a pa sinah a rak put. Cun a pa kha “Ka pa, tho law ka rak putmi sa hi ei tuah. Cun thluachuah cu rak ka pe” tiah a ti.
32 Mah tikah Isak nih “Ahodah na si?” tiah a hal tikah “Na fater Esau ka si” tiah a leh.
33 Isak cu a therh in a therh i “Ram a va vai i sa a rak ka putmi cu ahodah a si kun? Na rak phanh hlanah pei ka ei cang i thluachuah zong ka pek cang cu. Anih cu thluachuah a hmu hrimhrim ko lai!” tiah a ti.
34 A pa bia a theih tikah Esau cu fakpi in le ngaihchia ngai in a ṭap i “Ka pa, thluachuah cu rak ka pe ve ko, ka pe ko!” tiah a ti.
35 Mah tikah Isak nih “Nangmah nih na hmuh dingmi thluachuah kha hmuh awkah na nau cu a ra i a ka hlen” tiah a ti.
36 Esau nih “A min ah Jakob* a simi hi a si awk hrimhrim a si ko. Hitin a tuahmi hi voi hnih a si cang. Fater sinak kha a ka lakpiak cang, atu zong ah ka thluachuah kha a lak ṭhan” tiah a ti. Cun “Ka caah thluachuah pakhat tal na ka nganh lo maw?” tiah a ti.
37 Isak nih cun Esau kha “Amah cu nangmah bawi ah ka ser cang i a unau vialte cu a sal ah ka pek cang. Rawl le mitsur zu thar zong ka pek cang. Ka fapa, na caah ka tuah khawhmi zeidah a taang ti?” tiah a ti.
38 Esau nih a pa cu “Ka pa, thluachuah cu pakhat lawng maw na ngeih? Ka pa, thluachuah cu rak ka pe ve ko, ka pe ko!” tiah a ti i thangpi in le fakpi in a ṭap.
39 Mah tikah a pa Isak nih:
“Nang cu van dap le vawlei ṭha he aa hlatnak hmun ah khua na sa lai.
40 Na vainam in na nung lai i na nau sal na si lai. Asinain na in khawh lo tikah na hngawng i a hngawngkual cu na khiah lai”* tiah a ti.
41 A pa nih Jakob kha thluachuah a pek caah Esau nih Jakob cu a huat i a lung chung in “Ka pa kan ṭahnak caan cu a nai cang, mah hnuah ka nau Jakob hi ka thah te lai” tiah a ti.
42 Esau chimmi bia kha Rebekah cu an chimh tikah Jakob cu a auh colh i hitin a ti: “Na u Esau nih nangmah thah in phuhlam aa tim.
43 Ka fapa, atu kaan chimh ning in hin tuah. Tho law Haran khua i ka ṭa Laban sinah va zam.
44 Na u a thin a dam tiang amah sinah cun chikkhat in va um ta.
45 Na u a thin a dam i a cung ah na tuahmi thil kha a philh tikah kaan auh ṭhan te lai. Ni khat te ah nan pahnih in sungh lai cu ka duh lo.”
46 Mah hnuah Rebekah nih Isak kha “Heth fanule nih hin an ka simh tuk. Jakob nih hi rammi Heth fanule hi a ṭhit ve hna ahcun ka nun cu zeidah a ṭhahnem?” tiah a ti lengmang.
