Genesis 35:1-29
35 Cu hnuah Pathian nih Jakob kha “Tho law Bethel ah va kal law cuka ah khua va sa. Cun na upa Esau sinin na zam lioah na sinah a langmi a hmaanmi Pathian caah cuka ah cun biakṭheng pakhat in va sa” tiah a ti.
2 Jakob nih cun a innchungkhar le a sin i a ummi vialte kha “Nan sinah a ummi ramdang pathian hna kha hlonh dih u, cun i thenh u law nan thil i thleng u.
3 Tho u sih law Bethel ah kal hna u sih. Cuka ah a hmaanmi Pathian caah biakṭheng pakhat in ka sak lai. Anih cu harnak ka ton i ka nawl tikah a ka ngaihpiaktu le ka kalnak kip ah a ka umpitu Pathian a si” tiah a ti.
4 Cucaah an ngeihmi ramdang pathian hna le an i tonhmi an hnatonh vialte kha Jakob cu an pek i Jakob nih Shekhem khua pawng i thingkung nganpi tang ah a phum hna.
5 Cuka in an chuah tikah Pathian nih an pawngkam khuami hna kha ṭihnak a ngeihter hna i Jakob fapale kha an dawi ngam hna lo.
6 A donghnak ah Jakob le a mi pawl cu Kanaan ram, Luz tiah auhmi Bethel khua ah an rak phan.
7 Jakob nih cuka ah biakṭheng pakhat a sak i El-bethel* tiah min a sak. Zeicahtiah a upa sinin a zam lioah a hmaanmi Pathian cu cuka ah a sinah a lang.
8 A hnuah Rebekah a cawnghramtu nu Deborah cu a thi i Bethel khua pawng kuhthing tang ah an vui. Cucaah mah thingkung kha Allon-bakuth* tiah min a sak.
9 Jakob cu Paddan-aram in a rak chuah lioah Pathian cu a sinah a lang ṭhan i thluachuah a pek.
10 Pathian nih cun “Na min cu Jakob a si nain Jakob tiah auh na si ti lai lo, Israel tiah auh na si cang lai” tiah a ti. Cun anih cu Israel tiah auh a hung si.
11 Pathian nih “Kei cu A Ṭhawng Bikmi Pathian ka si. Tefa tampi in na ngei lai. Nang cu miphun tampi hna pa na hung si lai i na sinin siangpahrang hna zong an chuak lai.
12 Abraham le Isak ka pekmi hna ram cu nangmah kha kaan pek lai i na tefa zong ka pek hna lai” tiah a ti.
13 Jakob he an i chawnh dih hnuah Pathian cu a sinin a chuak.
14 Cucaah Jakob nih Pathian he bia an i ruahnak hmun ah lungphun pakhat a bunh. Cu lungphun cung ah cun thlet thawinak kha a toih i chiti zong a toih.
15 Jakob nih Pathian he bia an i ruahnak hmun kha Bethel tiah a auh ṭhan.
16 Cu hnuah Bethel khua in an chuak. Efrath khua an phanh hlanah Rachel cu a nau ngan a hung fak i a zual ngaingai.
17 Nau nganfah a tuar cuahmah lioah cun nau hlawmtu nu nih “Na thinphang hlah, fapate na ngei ṭhan” tiah a ti.
18 Rachel cu a thi dengmang i a thaw a cah pah in naute cu Benoni* tiah min a sak, asinain a pa nih Benjamin* tiah a auh.
19 Rachel cu a thi i Bethlehem tiah auhmi Efrath khualei kalnak lam ah cun an vui.
20 Jakob nih a thlan ah cun lungphun a bunh; cu Rachel lungphun cu nihin ni tiang a um ko.
21 Cu hnuah Israel cu cuka cun a chuak i Eder innsang pinlei ah a thlam cu a bunh.
22 Israel cu cuka ram i a um lioah Reuben nih a pa nuchun Bilhah kha a ihpi. Mah kong kha Israel nih a theih.
Jakob fapale cu 12 an si.
23 Leah fapale cu Jakob fater Reuben, Simeon, Levi, Judah, Issakhar le Zebulun an si.
24 Rachel fapale cu Josef le Benjamin an si.
25 Rachel salnu Bilhah fapale cu Dan le Naftali an si.
26 Leah salnu Zilpah fapale cu Gad le Asher an si. Hi hna hi Paddan-aram ah Jakob nih a ngeihmi fapale an si.
27 A donghnak ah Jakob cu a pa Isak a umnak hmun Hebron tiah auhmi Kiriath-arba i Mamre ah a rak phan. Mah cu Abraham le Isak nih ramdang mi in an rak umnak hmun kha a si.
28 Isak cu kum 180 tiang a nung.
29 Isak cu chan tling cikcek tiang nun nuam tein a nun hnuah a thi i a phunhawi hna sinah pumh a si.* A fapa Esau le Jakob nih an vui.
