Genesis 18:1-33
18 Mah hnuah Jehovah cu Mamre i thingkung nganpipi hna lakin Abraham sinah a rak lang. Mah cu chun ni a linh saling ah Abraham cu a thlam kutka i a ṭhut lioah a si.
2 Khua a hei cuan i lamhlat nawn ah mipa pathum an dirmi kha a hmuh. Mah tikah thlam kutka in a tli i a va don hna, cun vawlei ah a bawk.
3 Hitin a ti: “Jehovah, na mithmai ṭha ka hmuh ahcun zaangfahnak in na salpa hi rak ka lanhtak hlah.
4 Nan ke ṭawlnak caah ti tlawmpal in ka rak put lai; cun thingkung tang ah i din ta u.
5 Ka sin nan rak phanh cang caah nan tha nan i hrimh ṭhan nakhnga changreu tlawmpal in ka rak put lai. Mah hnuah nan lan te lai.” Mah tikah annih nih “A ṭha ko. Na chim ning in tuah ko” tiah an ti.
6 Cucaah Abraham cu thlam lei ah khulrang in a kal i Sarah kha “Zokzok in! A ṭha bikmi changvut kha tah* thum in la law hei nawng, cun changreu ah ser tuah” tiah a ti.
7 Mah hnuah Abraham cu cawrun lei ah a va tli i a sa a thaw dingmi cawtum no pakhat kha a thim. A sal pakhat kha a pek i khulrang in a timhtuah.
8 Cawhnuk le thawpat kha a chuanmi cawsa he a rak put i an hmaiah a hunh hna. Cun an ei lioah thingkung tang in a dir hnawh hna.
9 Annih nih “Na nupi Sarah tah khoika ah dah a um?” tiah an hal i “Thlam chung ah a um ko” tiah a leh hna.
10 An lak i pakhat nih “Hmai kum atu tikah na sinah ka ra ṭhan hrimhrim lai. Na nupi Sarah nih fapa aan hrinpiak lai” tiah a ti. Sarah nih mah pa hnulei i thlam kutka in a rak ngaih hna.
11 Abraham le Sarah cu an tar cang i an kum a upa ngaingai cang. Sarah cu fa ngeih awkah a kum a luan cang.
12 Cucaah Sarah cu a ni i “Keimah cu ka tar cang i ka bawipa zong a upa tuk cang. Hi bantuk lunglawmhnak cu ka hmu kho taktak hnga maw?” tiah a lung chung in a ti.
13 Mah tikah Jehovah nih Abraham cu “Zei ruang ah Sarah cu a ni i ‘Ka tar hnuah fa cu ka ngei kho taktak hnga maw’ a ti?
14 Jehovah caah cun a si kho lomi a um maw? Hmai kum atu tikah ka ra ṭhan lai i Sarah nih fapa a hrin lai” tiah a ti.
15 Asinain Sarah cu a thin a phang i “Ka ni lo!” tiah aa pheh. Mah tikah “Na ni ko” tiah a ti.
16 Cun mah pa hna cu an i thawh i Sodom khualei kha an hei cuanh. Abraham cu anmah thlah ding in an sinah a kal ve.
17 Jehovah nih hitin a ti: “Ka tuah dingmi hi Abraham sinah ka thup lai lo.
18 Zeicahtiah Abraham cu a liannganmi le a ṭhawngmi miphun a hung si lai i amah thawng in vawleicung miphun vialte cu thluachuah an hmu lai.
19 Abraham nih a fale le a tefa vialte kha a hmaanmi le a dingmi thil tuahnak thawng in Jehovah lam zulh peng awkah nawl a pek hna lai ti kha ṭha tein ka hngalh. Cucaah keimah Jehovah nih Abraham he ka sermi biakamnak kha ka tlinter lai.”
20 Cun Jehovah nih “Sodom le Gomorrah khua i an sualnak cu a ngan tuk hringhran. Anmah ruang ah an ṭah, an hram thawng kha ka theih.
21 Ka theihmi ning in an tuah taktak maw, tuah taktak lo ti hngalh awkah ka va zoh lai. An tuah lo ahcun ka hngalh ko lai” tiah a ti.
22 Cun mah pa hna cu cuka cun an chuak i Sodom lei ah an kal, asinain Jehovah cu Abraham sinah a taangta.
23 Abraham nih a hun naih i hitin a ti: “Miding mi cu miṭhalo mi sinah na hrawh chih taktak hna lai maw?
24 Khua chung ah miding 50 um hna seh law mah miding 50 ruang ah khuapi cu ngaihthiam loin na hrawk hnga maw?
25 Miding cu miṭhalo sinah hrawh chih ding cu na caah a si kho lomi a si. Miding le miṭhalo an donghnak i khah awkah zeitik hmanh ah na awnh lai lo. Mah cu na caah a si kho lomi a si! Vawleicung dihlak Biaceihtu nih cun ding tein bia a ceih ko lai lo maw?”
26 Mah tikah Jehovah nih “Sodom khua ah miding 50 ka hmuh hna ahcun anmah zawn ruah ah a khuapi ning in ka ngaihthiam ko lai” tiah a ti.
27 Asinain Abraham nih hitin a ti: “Kei cu leidip le vutcam men si ko hmanh ning law, Jehovah, na sinah ngamh ngai in bia ka chim rih ko lai.
28 Miding mi 50 lakah panga an bau ah tah, mah panga ruang ah a khuapi ning in na hrawk lai maw?” tiah a hal i “45 ka hmuh hna ahcun ka hrawk lai lo” tiah a leh.
29 Cun Abraham nih “40 an um ah tah?” tiah a hal ṭhan i “40 an um ahcun ka hrawk lai lo” tiah a leh.
30 Asinain Abraham nih “Jehovah, zaangfahnak in na thinhung sawh hlah, ka chim rih ko lai: 30 lawng an um ah tah?” tiah a hal i “30 an um ahcun ka hrawk lai lo” tiah a leh.
31 Asinain Abraham nih “Zaangfahnak in Jehovah, na sinah ngamh ngai in ka chim rih ko lai: 20 lawng an um ah tah?” tiah a hal i “20 an um ahcun ka hrawk lai lo” tiah a leh.
32 A donghnak ah Abraham nih “Jehovah, zaangfahnak in na thinhung sawh hlah, voi khat tein ka chim rih ko lai: 10 lawng an um ah tah?” tiah a hal. Pathian nih “10 an um ahcun ka hrawk lai lo” tiah a leh.
33 Jehovah cu Abraham he bia an i ruah dih hnuah a kal i Abraham zong a umnaklei ah a kir ve.
Footnotes
^ A hrampi, “seah.” Seah pakhat cu 7.33 L he aa tluk. Thlaihhlei B14 ah zoh.
