Genesis 24:1-67
24 Abraham cu a kum a upa ngai cang i a tar ngai cang, Jehovah nih zeizong kip ah thluachuah a pek.
2 Abraham nih a ngeihmi thil vialte a zohkhenhtu, a innchung i upa bik a salpa kha hitin a ti: “Ka phei tang ah hin na kut kha chia law,*
3 van le vawlei Pathian Jehovah hmaiah chiatserh in bia i kam. Atu ka umnak Kanaan mi hna hi ka fapa nupi caah na ṭhi hrimhrim hna lai lo.
4 Ka chuahkehnak ram le ka rualchan hna sinah na va kal lai i ka fapa Isak caah nupi na va ṭhit lai.”
5 A salpa nih cun “Ngaknu nih hi ram lei ah zulh a ka duh lo ah tah zeitin? Na fapa cu maw na chuahkehnak ram ah ka kirpi kun lai?” tiah a ti.
6 Mah tikah Abraham nih “Ka fapa cu cuka ah na kalpi lai lo.
7 Ka pa inn in le ka rualchan hna an umnak ram in a ka chuahpitu vancung Pathian Jehovah nih ‘Na tefa cu hi ram hi ka pek hna lai’ tiah ka sinah chiatserh in bia aa kam. Pathian nih na hmaiah vancungmi kha a thlah chung lai i ka fapa caah cuka ah nupi na va kawl hrimhrim lai.
8 Asinain ngaknu nih aan zulh duh lo ahcun mah chiatserh biakamnak in na luat lai. Asinain ka fapa cu cuka ah na kalpi hrimhrim lai lo” tiah a ti.
9 A salpa nih cun a bawipa Abraham phei tang ah a kut cu a chiah i mah kong he aa tlaiin chiatserh in bia aa kam.
10 Cucaah a salpa nih cun a bawipa sinin kalauk pahra le laksawng a phunphun kha a lak i Mesopotamia ram, Nahor khua ah a kal.
11 Khua leng i tikhor pawng a phanh tikah kalauk cu a dinhter hna. Mah cu zanlei sang a si i nu pawl ti an than caan a si.
12 Mah tikah “Ka bawipa Abraham Pathian Jehovah, zaangfahnak in nihin ah hlawhtlinnak rak ka pe ko. Ka bawipa Abraham cung ah a fekmi na dawtnak cu langhter hram ko.
13 Atu tikhor pawng ah ka dir ko, khua chung i ngaknu hna zong ti than awkah an ra cang.
14 Ngaknu kha ‘Zaangfahnak in na ti-um kha ṭhum law din awk ti rak ka pe’ tiah ka ti tikah ‘Ding ko, na kalauk zong ti ka dinh hna lai’ tiah a ka titu cu na sal Isak caah na thimmi si seh. Cuticun ka bawipa cung ah a fekmi dawtnak na langhtermi kha rak ka hngalhter ko” tiah thla a cam.
15 A thlacamnak a dih hlanah Rebekah cu a liang ah ti-um i khinh in a ra. Rebekah cu Bethuel fanu a si i Bethuel cu Abraham a upa, Nahor nupi Milkah fapa a si.
16 Ngaknu cu aa dawh tukmi, pa he a umṭi bal lomi ngaknu thiang a si. Tikhor lei ah cun a ṭum i a ti-um khat in ti a than hnuah a rak kai ṭhan.
17 Mah tikah salpa nih cun a va tlik hnawh i “Zaangfahnak in na ti-um chung i ti kha tlawmpal in din awkah na ka pe kho lai maw?” tiah a hal.
18 Anih nih “Ding ko, ka bawipa” tiah a ti. Khulrang in a ti-um cu a ṭhumh i a dinter.
19 A dinter dih hnuah “Na kalauk zong ti an vuai hlan tiang ka thanpiak hna lai” tiah a ti.
20 Cun a ti-um chung i ti cu tikuang ah khulrang in a tlen i kalauk vialte caah tikhor ah ti cu a va than lengmang.
21 Ti a than chung vialte mipa nih cun khuaruahhar ngai in le dai tein a zoh ko. Jehovah nih a khualtlawnnak ah hlawhtlinnak a ka pe hnga maw, pe lo ti kha a ruat.
22 Kalauk kha ti a dinh dih hna hnuah mipa nih cun shekel* a cheu a ritmi sui hnartonh le shekel pahra a ritmi sui kuthrolh pahnih kha a chuah i a pek.
23 Cun “Aho fanu dah na si, na ka chim kho lai maw? Tuzan na pa inn ah riahnak hmun a um lai maw?” tiah a hal.
24 Mah tikah ngaknu nih cun “Kei cu Milkah le Nahor fapa, Bethuel fanu ka si.
25 Capawl le saram rawl tampi kan ngei, riahnak hmun zong a um ko” tiah a ti.
26 Mah tikah mipa cu Jehovah hmaiah a bawk i,
27 “Ka bawipa Abraham Pathian Jehovah cu thangṭhat si ko seh. Zeicahtiah ka bawipa cung ah a fekmi dawtnak le zumhawktlak a sinak kha a langhter zungzal. Ka bawipa a unau inn ah Jehovah nih lam a ka hruai” tiah a ti.
28 Ngaknu cu a nu inn ah a va tli i mah kong vialte kha a chimh hna.
29 Rebekah cu ṭa pakhat a ngei i a min ah Laban a si. Laban cu khua leng i tikhor ah a ummi mipa sinah cun a va tli.
30 A farnu Rebekah hnartonh le kuthrolh kha a hmuh i mipa chimmi bia kha Rebekah sinin a theih tikah tikhor i kalauk pawng ah a dirmi pa cu a va ton.
31 A hmuh tikah “Nang cu Jehovah nih thluachuah a pekmi na si. Zeicah hika ah hin na dir ko? Ka inn cu timhcia a si cang, kalauk ca zong ah hmun a um ko” tiah a ti.
32 Mipa cu innchung ah a lut i Laban nih kalauk thil kha a ṭhumh. Kalauk kha capawl le rawl a pek hna, cun mipa le amah he a rami hna caah ke ṭawlnak ti zong a pek hna.
33 Asinain ei awk rawl an hunh tikah “Ka rat hnawh channak a ruang ka chim hlanah cun ka ei lai lo” tiah a ti. Cucaah Laban nih “Chim ko!” tiah a ti.
34 Mah tikah hitin a ti: “Kei cu Abraham salpa ka si.
35 Jehovah nih ka bawipa cu thluachuah tampi in a pek i mirum ngaingai ah a ser. Tuu le caw, sui le ngun, salnu le salpa, kalauk le laa zong a pek.
36 Mah leng ah ka bawipa nupi Sarah nih a tar hnuah fapa pakhat a hrin i ka bawipa nih a fapa cu a ngeihmi vialte kha a pek lai.
37 Cucaah ka bawipa nih chiatserh in bia a ka kamter i ‘Ka umnak Kanaan mi hna hi ka fapa nupi caah na ṭhi hrimhrim hna lai lo.
38 Ka pa inn le ka chungkhar hna sinah na va kal lai i ka fapa caah nupi na va ṭhit lai’ tiah a ka ti.
39 Asinain ka bawipa kha ‘Ngaknu nih a ka zulh duh lo ah tah?’ tiah ka ti tikah,
40 ka bawipa nih ‘A lam ka zulhmi Jehovah nih na hmaiah vancungmi a thlah lai i na khualtlawnnak cu hlawh a tlinter hrimhrim ko lai. Ka pa inn le ka chungkhar sinin ka fapa caah nupi na va ṭhit lai.
41 Ka chungkhar sinah na va kal i ngaknu kha an in pek duh lo ahcun hi chiatserhnak in na luat lai’ tiah a ka ti.
42 “Nihin tikhor pawng ka phanh tikah ‘Ka bawipa Abraham Pathian Jehovah, ka khualtlawnnak ah hin hlawhtlinnak rak ka pe ko.
43 Atu tikhor pawng ka dir lioah ti than awkah a rami ngaknu kha ‘Zaangfahnak in na ti-um chung in din awk ti tlawmpal in rak ka pe’ tiah ka ti lai i,
44 ngaknu nih cun “Ding ko, na kalauk ca zong ah ti kaan thanpiak lai” tiah a ka titu cu ka bawipa fapa caah Jehovah nih a thimmi si ko seh tiah thla ka cam.’
45 “Ka lung chung in thla ka cam dih hlanah Rebekah cu a liang ah ti-um i khinh in a ra, cun tikhor lei ah a ṭum i ti cu a va than. Mah tikah ‘Zaangfahnak in din awk ti tlawmpal in rak ka pe’ tiah ka ti.
46 Cucaah a liang in a ti-um cu a ṭhumh colh i ‘Ding ko, kalauk zong ti ka dinh hna lai’ tiah a ka ti. Ti cu ka din i kalauk zong ti a dinh hna.
47 ‘Aho fanu dah na si?’ tiah ka hal tikah ‘Bethuel fanu ka si, ka pu cu Nahor a si i ka pi cu Milkah a si’ tiah a ka ti. Cucaah a hnar ah hnartonh ka tonh i a kut ah kuthrolh ka hrolh.
48 Cun Jehovah hmaiah ka bawk i ka bawipa Abraham Pathian Jehovah cu ka thangṭhat, ka bawipa fapa caah a unau fanu kha hmuh awkah lam a ka hruai.
49 Atu ah ka bawipa cung ah a fekmi dawtnak le zumhawktlak sinak nan langhter lai maw, langhter lai lo rak ka chim u. Cuticun zeidah ka tuah lai ti kha ka hngalh lai.”
50 Mah tikah Laban le Bethuel nih “Hi thil hi Jehovah sinin a rami a si. Kanmah nih a ṭha, a chia ti kha chimnak nawl kan ngei lo.
51 Hika ah Rebekah a um ko hih. I kalpi ko, Jehovah nih a chim bantuk in na bawipa fapa nupi cu si ko seh” tiah an ti.
52 Abraham salpa nih an bia cu a theih tikah vawlei ah a bawk i Jehovah cu a thangṭhat.
53 Salpa nih cun sui hlawn, ngun hlawn le hnipuan hna kha a chuah i Rebekah cu a pek. Cun a ṭapa le a nu zong a man a sungmi laksawng a pek hna.
54 Mah hnuah amah le a hawile cu an ei, an ding i cuka ah an riak.
A thaizing an thawh tikah mipa nih cun “Ka bawipa sinah ka kirter ko u” tiah a ti hna.
55 Mah tikah a ṭapa le a nu nih “Ngaknu cu kan sinah a tlawm bik ni hra tal um rih ko seh. Mah hnuah a kal te lai” tiah an ti.
56 Asinain anih nih “Rak ka caamter hlah u. Jehovah nih ka khualtlawnnak ah hlawh a tlinter cang. Ka bawipa sinah rak ka kirter ko u” tiah a ti hna.
57 Cucaah annih nih “Ngaknu kha au u sih law amah kha hal u sih” tiah an ti.
58 Rebekah cu an auh i “Hi pa sinah cun na kal lai maw?” tiah an hal tikah “Kal ka duh ko” tiah a leh hna.
59 Cucaah an farnu Rebekah le amah a cawnghramtu nu cu Abraham salpa le a mi hna he cun an thlah hna.
60 Cun Rebekah kha thluachuah an pek i “Kan farnu, nang cu mi nuai tampi nu ah va cang law na tefa nih anmah a huatu hna i khua hauka kha la hna seh” tiah an ti.
61 Rebekah le amah a zohkhenhtu nu hna cu kalauk kha an i cit i mipa hnu cu an zulh. Salpa nih Rebekah cu a tlunpi.
62 Isak cu Negeb ram ah a um caah Beerlahairoi lei in a ra.
63 Zanlei sang ah Isak cu khuaruah awkah lo ah aa chawk. Khua a hei cuan i kalauk pawl an ratmi kha a hmuh!
64 Rebekah zong nih Isak kha a hmuhle cangka kalauk cung in a ṭum.
65 Cun salpa kha “Kanmah don awkah khika lei in a rami khi ahodah a si?” tiah a hal. Salpa nih “Ka bawipa a si” tiah a ti. Cucaah Rebekah nih a hmaikhuhnak puan kha a lak i aa khuh.
66 Salpa nih cun Isak kha thil sining vialte cu a chimh dih.
67 Mah hnuah Isak nih a nu Sarah thlam ah a luhpi. Cuticun Rebekah cu a nupi a hung si; Rebekah kha a dawt tuk caah a nu thih hnuah hnemhnak a hmu.
Footnotes
^ Hlanlio mi hna chiatserh in bia an i kam ning lam phun khat a si.
^ Shekel pakhat cu 11.4 g he aa tluk. Thlaihhlei B14 ah zoh.
