Genesis 43:1-34
43 Kanaan ram chung ah mangṭam cu a fak chinchin.
2 Izipt ram in an rak cawkmi rawl kha an ei dih tikah Jakob nih a fapale cu “Va kal ṭhan u law kan caah rawl tlawmpal in va caw u” tiah a ti hna.
3 Judah nih “‘Nan naupa nan i ratpi lo ahcun nan ka tong kho lai lo’ tiah mipa nih fiang tein a kan chimh cang.
4 Kan sinah kan naupa na kalter ve lawng ah kan va kal lai i rawl cu kan va cawk lai.
5 Asinain kan naupa na kalter ve lo ahcun kan kal lai lo. Zeicahtiah mipa nih ‘Nan naupa nan i ratpi lo ahcun nan ka tong kho hrimhrim lai lo’ a kan ti” tiah a ti.
6 Mah tikah Israel nih “Mipa sinah unau dang kan ngei rih tiah zeicah nan va chimh? Ka cung ah zeicah hi bantuk harnak hi nan tlunter?” tiah a ti hna.
7 “Mipa nih cun kanmah kong le kan chungkhar kong kha a dikthliar in a kan hal i ‘Nan pa tah a nung rih maw? Unau dang tah nan ngei ti maw?’ tiah a kan hal i kan chimhmi a si. ‘Nan naupa rak ratpi u’ tiah a kan ti lai cu zeitindah kan hngalh lai?” tiah an ti.
8 Judah nih a pa Israel kha “Ngakchiapa cu ka sinah kalter ko. Kanmah he, nangmah he, kan fale he kan thih nakhnga lo kan kal ko lai.
9 A himnak caah aamah ka khaan. Keimah rian ah chia ko. Na sinah ka rak kirpi ṭhan lo i na hmaiah ka rak chuahpi ṭhan lo ahcun ka nun chung vialte mawhchiatnak cu ka in lai.
10 Hitin i nuainai hlah u sih law voi hnih tiang hmanh kan i let manh cang hnga” tiah a ti.
11 Mah tikah an pa Israel nih “Cutin a si ahcun hi ram in a chuakmi a ṭha bikbik balsam chiti tlawmpal, khuaihliti tlawmpal, a nak i a hmuimi thingthling, thingthling hawng, hru thei le almond thei hna kha nan sawngkhoi chung ah sanh u law mipa cu laksawng ah va phorh u.
12 Cun tangka kha a let hnih in i phorh u; nan sawngkhoi ah nan hmuh ṭhanmi tangka zong kha khirh ṭhan hna u. An i palh sual i a si ko lai.
13 Nan naupa cu i kalpi u law mipa sinah cun va kal ṭhan u.
14 Mipa sinin zaangfahnak nan hmuh nakhnga A Ṭhawng Bik Pathian nih in bawm ko hna seh. Simeon le Benjamin zong a thlah men ko hna lai. Asinain kei tu cu fa loin um ding ka si ahcun fa loin um cang ko ning!” tiah a ti hna.
15 Annih nih tangka le laksawng kha a let hnih in an i phorh i Benjamin zong an i kalpi. Cun Izipt ram ah an kal i Josef hmaiah an lut ṭhan.
16 Josef nih Benjamin an i ratpimi kha a hmuhle cangka inn zohkhenhtu kha “Hi hna hi inn ah kalpi hna, sa kha that law rawl va tim. Chun ah ka sinah rawl an ei lai” tiah a ti.
17 Inn zohkhenhtu nih Josef a chim bantuk in a tuah colh i Josef inn ah cun a kalpi hna.
18 Josef inn ah an kalpi hna tikah an ṭih tuk i “Kan hnulei i kan sawngkhoi ah kan hmuh ṭhanmi tangka ruang ah hika ah a kan kalpimi a si ko lai. Sal ah a kan tlaih lai i kan laa hna zong an i lak lai!” tiah pakhat le pakhat an i ceih.
19 Cucaah Josef inn zohkhenhtu pa kha an va naih i innka hram an phanh tikah,
20 “Bawipa, zaangfahnak in na sinah bia chim kan duh! A hmasa ah rawl cawk awkah kan ra bal cang.
21 Riahhmun kan phanh i kan sawngkhoi kan kau tikah kan sawngkhoi chung ah kan tangka cu tling tein a rak um i a rih zong amah ning tein a si. Cucaah mah tangka kha pek ṭhan kan in duh.
22 Aho nih dah kan sawngkhoi chung ah tangka a sanh ti cu kan hngal lo. Atu zong rawl cawk awkah tangka kan i ken chap ko” tiah an ti.
23 Inn zohkhenhtu nih “A poi lo. Nan thinphang hlah u. Nan Pathian le nan pa Pathian nih nan sawngkhoi chung ah tangka cu aan chiahpiakmi hna a si. Nan tangka cu ka hmuh cang ko” tiah a ti. Cun Simeon kha an sinah cun a ratpi.
24 Mah hnuah inn zohkhenhtu nih Josef inn ah a luhpi hna, an ke ṭawlnak caah ti a pek hna i an laa zong rawl a pek hna.
25 Chun ah Josef cu a ra lai i anmah he rawl a ei lai ti kha an theih caah amah pek awkah laksawng cu an rak timh chung.
26 Josef cu inn i a rat tikah an laksawng cu an pek i a hmaiah cun an kun.
27 Josef nih a chawnhbiak hna hnuah “A kong nan chimmi nan pa patar tah a dam maw? A nung rih maw?” tiah a hal hna.
28 Annih nih “Bawipa, kan pa cu a dam i a nung rih ko” tiah an ti. Cun a hmaiah an kun.
29 Josef nih a hun zoh i a nu fapa, a chuahpi a nau Benjamin kha a hmuh tikah “Amah hi nan ka chimhmi nan nau hniang bik cu a si maw?” tiah a ti hna. Cun Benjamin kha “Ka fapa, Pathian nih thluachuah in pe ko seh” tiah a ti.
30 Josef nih a naupa cu a hmuh tikah a ngaihchiatnak kha aa sum kho ti lo. Cucaah innchung ah a va lut zokzok i cuka ah a va ṭap.
31 Mah hnuah a hmai kha aa phiah i a rak chuak ṭhan, a intuarnak kha aa sum chih i “Rawl ser u” tiah a ti hna.
32 Josef caah a dang tein, a unau hna caah a dang tein le Izipt mi hna caah a dang tein an ser. Zeicahtiah Izipt mi nih Hebru mi he rawl eiṭi kha an duh lo, mah cu an caah fihnung a si.
33 A unau pawl cu Josef hmaiah an ṭhu, fater sinak a hmumi upa bik in a hniang bik tiang aa changchang in an ṭhutter hna caah pakhat le pakhat kha khuaruahhar in an i zoh.
34 Josef nih a cabuai cung i rawl kha a pek hna, a dang a unau hna nakin Benjamin kha let nga tam in a pek. Cuticun an dihlak in Josef he khim tein an ei, an ding.
