Genesis 23:1-20
-
Sarah thihnak le vuinak hmun (1-20)
23 Sarah cu kum 127 a si ah a thi.
2 Sarah cu Kanaan ram, Hebron tiah auhmi Kiriath-arba khua ah a thi. Abraham nih Sarah kha ngaihchia ngai in a ṭah.
3 Mah hnuah Abraham cu Sarah ruak pawng khan a tho i Heth fapale kha,
4 “Kei cu nan sinah a rak pemmi ramdang mi ka si. Ka nupi vuinak ding caah hmun pakhat in rak ka zuarh u” tiah a nawl hna.
5 Mah tikah Heth fapale nih Abraham kha,
6 “Bawipa, kan chimmi hi ngai hmanh. Nang cu kan lakah Pathian thimmi hruaitu* na si. Kan thlan lakah na duh bikmi kha i thim law na mithi cu vui ko. Ahohmanh nih na mithi vuinak ding caah thlan hmun kha sianh loin kan um lai lo” tiah an ti.
7 Mah tikah Abraham cu a tho i cuka rammi, Heth fapale hmaiah cun a kun.
8 Cun hitin a ti hna: “Ka mithi vuinak ding caah nan hna a tlak ahcun ka chimmi hi ngai u law Zohar fapa Efron kha ka nawlpiak u.
9 Amah ta a simi Makpelah lungkua kha rak ka zuarh seh. Mah cu a lo kam ah a ummi a si. Nan hmaika ah hin ngun tangka a man tling tein rak ka zuarh seh. Cuticun kei zong aa tlakmi vuinak hmun ka ngei ve lai.”
10 Efron cu Heth fapale sinah a ṭhu ve. Hit miphun a simi Efron nih cun Abraham cu khua hauka luhnak ah a ummi vialte hmaiah le Heth fapale hmaiah hitin a ti:
11 “Cutin a si lo, bawipa! Ka chimmi hi ngai hmanh. Lo le lo chung ah a ummi lungkua cu kaan pek. Ka mi hna hmaika hrimhrim ah kaan pek. Na mithi cu vui ko.”
12 Cu tikah Abraham cu cuka rammi hna hmaiah cun a kun i,
13 Mipi theih in Efron cu “Ka chimmi hi ngai hmanh, lo caah ngun tangka tling tein kaan pek lai. Cuka hmun ah ka mithi ka vui khawh nakhnga a man cu i lak ko” tiah a ti.
14 Mah tikah Efron nih Abraham cu a leh i,
15 “Bawipa, ka chimmi hi ngai hmanh. Mah lo cu ngun tangka shekel* 400 man a si. Asinain mah cu a biapi lo, na mithi cu vui ko” tiah a ti.
16 Abraham cu a hna a tla i Efron nih Heth fapale hmaiah a chimmi ning in ngun tangka shekel 400 kha chawlettu hna nih an thlaimi ning in a thlaipiak.
17 Efron a lo cu Mamre pawng i Makpelah hmun ah a um. Lo le lo chung ah a ummi lungkua le lo ri ah a ummi thingkung vialte cu,
18 Abraham cawkmi a si ti kha Heth fapale hmaiah le khua hauka ah a ummi vialte hmaiah fehter a si.
19 Mah hnuah Abraham nih a nupi Sarah cu Mamre pawng, Makpelah lo i lungkua ah cun a vui. Mah cu Kanaan ram, Hebron khua ah a si.
20 Lo le lo ah a ummi lungkua cu Heth fapale nih Abraham kha an pek. Cuticun thlan hmun cu Abraham ta a hung si.
Footnotes
^ Asiloah “hruaitu ngan” ti zong a si kho.
^ Shekel pakhat cu 11.4 g he aa tluk. Thlaihhlei B14 ah zoh.
