Genesis 6:1-22
6 Vawleicung ah minung an hung karh i fanu zong an hrin hna,
2 a hmaanmi Pathian fapale* nih mah fanu hna an i dawhmi kha an hun hmuh. Cucaah an duhmi kha an i thim i nupi ah an lak hna.
3 Jehovah nih “Minung cu thisa an si caah* an cung ah lungsaunak ka langhter zungzal lai lo. Cucaah annih cu kum 120 lawng an nung cang lai” tiah a ti.
4 Cu lio caan ah vawleicung ah Nefilim* pawl an um. A hnu zong ah an um rih. A hmaanmi Pathian fapale cu minung fanu hna he an umṭi i fapa an hrin hna. An fapale cu mah lio chan mi hna lakah a ṭhawngmi le a min a thangmi an si.
5 Jehovah nih vawleicung ah mi cu an ṭhatlo tukmi le an lungthin cu ruahnak ṭhalo lawng tein a khahmi kha a hmuh.
6 Jehovah nih vawleicung ah minung a rak sermi hna kha aa ngaichih* i a lung a fak.
7 Cucaah Jehovah nih “Ka sermi minung hi vawleicung in ka hloh dih hna lai. Innzuat saṭil, a lawn in a lawnmi saram le van i a zuangmi thilnung hna zong ka hloh dih hna lai. Zeicahtiah ka rak sermi hna hi kaa ngaihchih” tiah a ti.
8 Asinain Noah tu cu Pathian mithmai ṭha a hmu.
9 Mah hi Noah tuanbia cu a si.
Noah cu miding a si. A chanmi hna lakah palhnak a ngei lomi* le a hmaanmi Pathian he a kalṭimi a si.
10 Noah nih fapa pathum a ngeih hna i Shem, Ham le Jafeth an si.
11 Asinain vawlei cu a hmaanmi Pathian mithmuh ah rawhralnak le zaangennak in a khat.
12 Pathian nih vawlei kha a zoh tikah vawlei cu a rawk tuk cang. Vawleicung mi vialte cu an ziaza a rawkral dih.
13 Pathian nih Noah cu hitin a ti: “Minung hi an dihlak in hrawh awkah bia ka khiah cang. Zeicahtiah anmah ruang ah vawlei cu zaangennak in a khat. Cucaah minung he, vawlei he ka hrawh hna lai.
14 Farthing in tilawng* pakhat kha i ser. Lawng chung ah a khaan dal hna law a chung he, a leng he kattaza sii thuh hna.
15 Tilawng cu hitin na sak lai: A saulei ah dong 300, a kauhlei ah dong 50, a sanlei ah dong 30 a si lai.*
16 Lawng chung ah ceunak* a um nakhnga cungcihlei in dong khatnak ah thlalang awng na ser lai. Lawng a kamlei ah innka na ser lai i dot khatnak, dot hnihnak, dot thumnak tiah dot thum in na sak lai.
17 “Vanraang tang ah a ummi, nunnak a ngeimi thilnung vialte hrawh awkah vawleicung ah tilian ka tlunter lai. Vawleicung ah a ummi vialte cu an rawk dih lai.
18 Nangmah he biakamnak ka ser lai. Nangmah le na nupi, na fapale le an nupile kha lawng chung ah na luhpi hna lai.
19 An nunnak khamh awkah thilnung vialte kha anmahle an phun ning cio in tilawng chung ah na luhpi hna lai. A nu, a pa tiin pahnih cio in na luhpi hna lai.
20 A zuangmi thilnung vialte kha anmahle an phun ning cio in, innzuat saṭil kha anmahle an phun ning cio in, a lawn in a lawnmi saram vialte kha anmahle an phun ning cio in an nunnak khamh awkah pahnih cio in tilawng chung ah na luhpi hna lai.
21 Nanmah ca le saram pawl caah ei awk rawl a phunphun kha na lak lai i na khon lai.”
22 Pathian nih nawl a pekmi ning in Noah nih a tuah dih. A fialmi ning in a tuah dih.
Footnotes
^ Asiloah “vancungmi hna.”
^ Asiloah “an pumsa duhnak ning in an nun caah.”
^ A sullam “Thlutu” ti zong a si kho. Biafang Fianternak ah zoh.
^ Asiloah “a ngaih a chia.”
^ Asiloah “soisel awk a um lomi.”
^ A hrampi, “thingkuang”; tilawng nganpi.
^ Mah cu a sau pe 438 hrawng, a kauh pe 73 hrawng, a san pe 44 hrawng a si.
^ Hebru, tsoʹhar. Mah cu lawng a kap pali ning in a ummi thlalang awng asiloah cungcih ti zong a si kho.
