Genesis 45:1-28
45 Josef cu a sinum pawl hmaiah a intuarnak kha aa sum kho ti lo i “Chuak dih u!” tiah a ti hna. Josef nih a unau pawl sinah aho a si kha aa hngalhter hna lioah a sinah ahohmanh an um lo.
2 Josef cu thangpi in a ṭah caah a ṭah thawng cu Izipt mi nih an theih i mah thawngpang cu Faraoh inn tiang a va thang.
3 A donghnak ah Josef nih a ule cu “Kei cu Josef ka si. Ka pa tah a nung rih maw?” tiah a ti hna. Mah tikah a ule cu an lau tuk i bia kaa khat hmanh an let kho lo.
4 Josef nih cun “Rak ka naih deuh u” tiah a ti hna i an hun naih.
Mah hnuah Josef nih “Keimah cu Izipt ram ah nan rak zuarmi nan nau Josef kha ka si.
5 Hika ah hin nan rak ka zuar caah lungṭhat loin um hlah u. Pakhat le pakhat zong sual i phaw hlah u. Zeicahtiah nan nunnak khamh awkah Pathian nih nan hmai in a rak ka thlah chungmi a si.
6 Ram chung ah mangṭam a tlunnak hi kum hnih a si cang. A dang kum nga a um rih i cu chung ah cun leithuan zong a um lai lo i rawl ṭuan zong a um lai lo.
7 Vawleicung ah nan tefa an hmunh nakhnga le khuaruahhar lam in aan khamh hna i nan nun nakhnga Pathian nih nan hmai in a rak ka thlah chungmi a si.
8 Cucaah hika ram i a ka thlahtu cu nanmah nan si lo, a hmaanmi Pathian a si. Pathian nih Faraoh ruahnak cheutu a inn bawi le Izipt ram vialte uktu ah a ka ser.
9 “Ka pa sinah khulrang in va kir u law ‘Na fapa Josef nih “Izipt ram vialte uktu ah Pathian nih a ka ser. Cucaah ka sinah khulrang in rak ra.
10 Ka pawng ah Goshen peng ah na um lai. Nangmah, na fapale, na tule, na saṭilrun le na ngeihmi vialte he hmunkhat ah nan um lai.
11 Hika ah rawl kaan pek hna lai, zeicahtiah mangṭam kum, kum nga a taang rih i nangmah le na innchungkhar nih nan ngeihmi thil vialte kha nan sung sual lai” a ti tiah va chim u.’
12 Atu nanmah bia aan ruahtu hna cu keimah hrimhrim ka si ti kha nanmah he, ka nau Benjamin he nan ka hmuh ko.
13 Cucaah Izipt ram ah zeitluk in dah nawl ka ngeih ti le nan hmuhmi kong vialte kha ka pa cu va chim dih u. Cun khulrang in hika ah rak ratpi u” tiah a ti hna.
14 Cun a nau Benjamin cu a kuh i a ṭap. Benjamin zong nih a kuh i a ṭap ve.
15 Cun a ule vialte kha a hnamh hna, a kuh hna i a ṭap. Mah hnu lawng ah a ule nih an chawnh khawh.
16 “Josef a unau pawl an phan!” timi thawng cu Faraoh inn ah a va thang i Faraoh le a bawi pawl cu an i lawm.
17 Mah tikah Faraoh nih Josef cu “Na unau pawl kha ‘Nan thil cu saṭil cung ah chuang u law Kanaan ram ah va kir u.
18 Nan pa le nan innchungkhar mi kha va la hna u law ka sinah ratpi hna u. Izipt ram in a chuakmi thilṭha kha kaan pek hna lai i hi ram in a chuakmi a ṭha bikmi rawl kha nan ei lai’ tiah Faraoh nih aan ti hna tiin va chim hna.
19 Cun ‘Izipt ram in rangleng hna hi i kalpi hna u. Nan nupile le nan fale le nan pa kha citter hna u law hika ah ratpi hna u.
20 Nan thilri chawva kong ah nan lungrethei hlah seh. Zeicahtiah Izipt ram i thilṭha bikbik cu nanmah ta an si lai’ ti zong in chim hna” tiah a ti.
21 Israel fapale nih a chim ning cun an tuah. Faraoh nawl pek ning in Josef nih rangleng kha a pek hna i lampi caah riahcaw zong a rawnh hna.
22 A ule cu thilpuan voi khat thlennak cio a pek hna. Asinain Benjamin tu cu ngun tangka 300 le thilpuan voi nga thlennak a pek.
23 Cun a pa caah Izipt ram in a chuakmi thil ṭhaṭha kha laa pahra phor le lampi ei awk caah rawl, changreu le rawl dangdang kha laapi pahra phor in a kuat.
24 Cun a ule cu a thlah hna i “Lampi ah pakhat le pakhat i mawhchiat hlah u” tiah a ti hna.
25 Cun Izipt ram in an chuak i an pa Jakob a umnak Kanaan ram ah an phan.
26 Annih nih “Josef cu a nung rih ko. Anih cu Izipt ram vialte uktu a si!” tiah an chimh. Mah tikah a khuaruah a har tuk i a zum kho lo.
27 Josef nih a chimhmi hna vialte kha an chimh i amah cit awkah a kuatmi rangleng hna zong a hmuh tikah an pa Jakob cu a hun i hrim ṭhan.
28 Israel nih cun aa thawh i “Ka fapa Josef a nung rih ti ka theih hi a za cang ko! Ka thih hlanah ka va kal lai i ka va ton lai!” tiah a ti.
