Genesis 29:1-35
29 Mah hnuah Jakob cu a khuallam a peh ṭhan i Nichuahlei ram ah a kal.
2 Saṭil tlonnak hmun ah tikhor pakhat kha a hmuh i cu tikhor pawng ah tuurun runthum cu an rak bawk ko. Zeicahtiah tuukhal pawl nih cu tikhor ah cun an tuu kha ti an dinh tawn hna. Tikhor cu lung nganpi in an chinh.
3 Tuurun vialte an pumh dih hna tikah tikhor lung cu an thawn i tuu kha ti an dinh tawn hna. Mah hnuah tikhor lung cu an chinh ṭhan tawn.
4 Jakob nih “Unau hna, khoika in dah nan rat?” tiah a hal hna tikah “Haran khua in kan ra” tiah an ti.
5 “Nahor a tupa Laban kha nan hngal maw?” tiah a hal hna tikah “Kan hngalh ko” tiah an leh.
6 “A dam maw?” tiah a hal hna i “A dam ko. Khika i tuu he a rami khi a fanu Rachel a si!” tiah an ti.
7 Jakob nih cun “Chun lai cing lawng a si rih i saṭil pumh caan a si rih lo. Tuu cu ti dinh rih ko hna u law cawng rih ko hna u” tiah a ti.
8 Mah tikah annih nih “Tuurun vialte kan pumh dih hna hlan tiang cu ti kan dinh hna lo, tuurun vialte pumh an si dih hnu lawng ah tikhor lung kha kan thawn i ti kan dinh tawn hna” tiah an ti.
9 Cutin bia an i ruah lioah Rachel cu a pa tuurun he a rak phan, anih cu a pa tuu a cawngtu a si.
10 Jakob nih a nu ṭa Laban fanu Rachel le a tuu pawl a hmuh hna tikah a va kal hnawh colh i tikhor a chin lung kha a thawn, cun Laban tuu kha ti a dinh hna.
11 Cun Jakob nih Rachel kha a hnamh i a ṭap.
12 Jakob nih Rachel kha kei cu na pa rualchan* ka si, Rebekah fapa ka si tiah a chimh. Mah tikah Rachel cu a va tli i a pa kha a va chimh.
13 Laban nih a farnu fapa Jakob kong a theihle cangka amah ton awkah cun a va tli. A kuh, a hnamh i inn ah a kalpi. Cun Jakob nih thil sining vialte kha Laban cu a chimh.
14 Laban nih cun “Nang cu ka thisa taktak na si” tiah a ti. Cucaah Jakob cu a sinah thla khat chung a um.
15 Laban nih Jakob cu “Ka rualchan na si ai pat tiin a lak in ka rian na ṭuan awk a si lo. Ṭuan man zeizat dah kaan pek lai, rak ka chim?” tiah a ti.
16 Laban nih cun fanu pahnih a ngeih hna. A upa deuh cu a min ah Leah a si i a ngakchia deuh cu a min ah Rachel a si.
17 Asinain Leah cu a mit aa dawh lo, Rachel tu cu a tungtai a ṭha i a mui zong aa dawh tuk.
18 Jakob nih Rachel cu a duh i Laban kha “Kum sarih chung na rian kaan ṭuanpiak lai i na fanu Rachel hi na ka pek lai” tiah a ti.
19 Laban nih cun “Ka fanu hi midang pek nakin cun nangmah pek cu a ṭha deuh si. Ka sinah hin um peng ko” tiah a ti.
20 Jakob nih Rachel caah kum sarih rian a ṭuan, asinain Rachel kha a duh tuk caah kum sarih cu a caah ni tlawmpal bantuk men a si.
21 A hnuah Jakob nih Laban cu “Ka rian ṭuan caan cu a dih cang, amah cu nupi caah rak ka pe cang law ka umpi cang lai” tiah a ti.
22 Laban nih khuami vialte kha a sawm hna i rawl danghnak puai a tuah.
23 Asinain zan a phanh tikah Laban nih caanṭha aa lak i a fanu Leah kha Jakob sinah cun a kalpi, cun Jakob nih cun a rak ihpi.
24 Laban nih a salnu Zilpah kha a fanu Leah cu a pek.
25 A thaizing ah Jakob nih Leah a si kha a hngalh! Cucaah Laban kha “Zeicah hi thil hi ka cung ah na tuah? Na rian ka ṭuanmi cu Rachel caah a si lo maw? Zeicah na ka hlen?” tiah a ti.
26 Laban nih cun “Hika ah cun upa deuh hlanah ngakchia deuh nih va ngeih hmasa phung a si lo.
27 Leah he nan i ṭhitumnak puai zarh khat chung cu dihter ta ko. Mah hnuah kum sarih rian na ka ṭuanpiak rih ahcun Rachel cu kaan pek lai” tiah a ti.
28 Jakob cu a hna a tla i Leah he an i ṭhitumnak puai zarh a dih tikah Laban nih a fanu Rachel cu nupi ah a pek.
29 Cun Laban nih a salnu Bilhah kha a fanu Rachel cu a pek.
30 Cun Jakob nih Rachel cu a ihpi, Rachel cu Leah nakin a dawt deuh. Cucaah Laban caah a dang kum sarih rian a ṭuanpiak ṭhan.
31 Leah cu dawt a si lomi* kha Jehovah nih a hmuh tikah fa ngeih khawhnak a pek, asinain Rachel tu cu a cing.
32 Cucaah Leah cu fa a pawi i fapa a hrin, “Jehovah nih ka harnak kha a ka hmuhpiak cang, atu cu ka va nih a ka dawt cang lai” tiah a ti i Reuben* tiah min a sak.
33 Fa a pawi ṭhan i fapa a hrin, “Jehovah nih dawt ka si lomi kha a theih i hi fapa hi a ka pek ṭhan” tiah a ti i Simeon* tiah min a sak.
34 Fa a pawi ṭhan i fapa a hrin, “Fapa pathum ka hrinpiak cang i atu cu ka vapa hi ka sinah aa bek deuh cang lai” tiah a ti i Levi* tiah min a sak.
35 Fa a pawi ṭhan i fapa a hrin ṭhan, “Atu cu Jehovah ka thangṭhat cang lai” tiah a ti i Judah* tiah min a sak. Mah hnu cun fa a ngei ti lo.
