Genesis 48:1-22
48 Josef cu “Na pa a zaw” tiah an chimh tikah a fapale pahnih Manasseh le Efraim kha Jakob sinah cun a kalpi hna.
2 Jakob cu “Na fapa Josef a ra” tiah an chimh. Cucaah Israel cu a tha aa hrim i a ihkhun cung ah cun a ṭhu.
3 Jakob nih Josef cu hitin a ti:
“A Ṭhawng Bik Pathian cu Kanaan ram, Luz khua ah ka sinah a lang i thluachuah a ka pek.
4 Pathian nih ‘Tefa tampi kaan pek lai i miphun tampi pa ah kaan ser lai. Na tefa cu hi ram hi ka pek hna lai i zungzal in anmah ta a si lai’ tiah a ka ti.
5 Izipt ram ka rak phanh hlanah na ngeihmi na fapale pahnih cu keimah ta an si. Reuben le Simeon cu keimah ta an si bantuk in Efraim le Manasseh zong keimah ta an si lai.
6 Asinain anmah hnuah na ngeihmi fale cu nangmah ta an si lai. Annih cu an ule min in ro an co lai.
7 Paddan ram in ka rak chuah lioah Rachel nih Kanaan ram, Efrath khua phanh hlanah a ka thihtak. Cucaah Bethlehem tiah auhmi Efrath khualei kalnak lam ah ka vui.”
8 Israel nih Josef fapale kha a hmuh hna tikah “Ahote dah an si?” tiah a hal.
9 Josef nih “Hika hmun ah Pathian nih a ka pekmi ka fapale an si” tiah a ti. Jakob nih cun “Ka pawng ah ratpi hna law thluachuah ka pek hna lai” tiah a ti.
10 Israel cu a tar cang caah a mit khua a hmu setsai ti lo. Cucaah Josef nih a fale cu a pawng ah a kalpi hna i Israel nih cun a kuh hna i a hnamh hna.
11 Israel nih Josef cu “Na hmai kaan hmuh ṭhan lai tiah ka ruat bal lo, asinain atu cu Pathian nih na tefa hmanh a ka hmuhter cang” tiah a ti.
12 Josef nih a pa khuk pawng ah a ummi a fale kha a auh hna i a hmaiah cun a kun.
13 Josef nih a fapale pahnih kha Israel pawng ah cun a kalpi hna i Efraim kha a orhlei kut in a tlaih i Israel kehlei ah a chiah, cun Manasseh kha a kehlei kut in a tlaih i Israel orhlei ah a chiah.
14 Asinain Israel nih a orhlei kut kha ngakchia deuh a simi Efraim lu cung ah a chiah i a kehlei kut kha Manasseh lu cung ah a chiah. Manasseh cu fater a si ti kha a hngalh ko nain a kut kha cutin a chiah hramhram.
15 Mah hnuah Josef kha thluachuah a pek i hitin a ti:
“Ka pa Abraham le Isak nih an biakmi,* a hmaanmi Pathian,Ka nun chung vialte nihin ni tiang tuukhal bantuk in a ka zohkhenhtu a hmaanmi Pathian nih hi ngakchia hna hi thluachuah pe ko hna seh,
16 Vancungmi hmang in ka harnak vialte chung in a ka khamhtu nih hi ngakchia hna hi thluachuah pe ko hna seh.
Ka pa Abraham, Isak le keimah min in auh si hna seh,Vawleicung pumpi ah tampi in karh hna seh.”
17 A pa nih a orhlei kut kha Efraim lu cung i a chiahmi kha Josef nih a hmuh tikah a lung a tling lo. Cucaah a pa kut kha Efraim lu cung in Manasseh lu cung ah ṭhial aa tim.
18 Josef nih “A si lo, ka pa, amah hi fater a si. Na orhlei kut kha amah lu cung ah hin chia” tiah a ti.
19 Asinain a pa nih cun a duh lo i “Ka hngalh ko, ka fapa, ka hngalh ko. Anih zong miphun pakhat a si ve lai i mi lianngan a si ve ko lai. Asinain a naupa cu amah nakin a ngan deuh lai i a tefa cu miphun nganpi an si tiang an karh lai” tiah a ti.
20 Israel nih mah ni ah cun thluachuah a pek ṭhan hna i,
“Israel mi nih pakhat le pakhat thluachuah an i pek tikah nanmah min kha an hman lai,‘Efraim le Manasseh bantuk in Pathian nih thluachuah in pe ko hna seh’ tiah an ti lai.”
Cuticun Israel nih Efraim kha Manasseh cung ah a chiah.
21 Israel nih Josef kha “Kei cu ka thi dengmang cang, asinain Pathian nih aan umpi peng lai i na pupa hna ram ah aan kirpi ṭhan lai.
22 Na unau hna nakin ram pakhat kaan pek chap lai, mah cu Amor mi hna sinin ka vainam le ka likuk in ka lakmi ram a si” tiah a ti.
Footnotes
^ A hrampi, “hmaiah a kalmi.”
