Genesis 17:1-27
17 Abram cu kum 99 a si ah Jehovah cu a sinah a lang i “Kei cu A Ṭhawng Bik Pathian ka si. Ka hmaiah kal law soi awk zeihmanh um loin nung.
2 Nangmah he biakamnak ka ser lai i tefa tampi kaan pek lai” tiah a ti.
3 Mah tikah Abram cu a bawk i Pathian nih hitin a ti chap:
4 “Nangmah he biakamnak ka ser cang i nang cu miphun tampi a hringsortu pa na hung si lai.
5 Na min cu Abram* si ti loin Abraham* tiah auh na si cang lai. Zeicahtiah nang cu miphun tampi a hringsortu ah kaan ser lai.
6 Tefa tampi kaan pek lai, nangmah chung in miphun le siangpahrang hna an chuak lai.
7 “Nangmah sin le hmailei na tefa hna sinah ka sermi zungzal biakamnak ning in ka tuah lai. Kei cu nangmah le na tefa hna Pathian ka si lai.
8 Atu ramdang mi in na umnak Kanaan ram hi a ningpi in nangmah le na tefa cu kaan pek hna lai. Zungzal in nanmah ta a si lai i kei cu an Pathian ka si lai.”
9 Cun Pathian nih Abraham cu “Ka biakamnak kha nangmah nih na zulh lai i hmailei na tefa hna zong nih an zulh lai.
10 Nangmah le na tefa hna nih nan zulh dingmi biakamnak cu hihi a si: Nan lak i pa paohpaoh cu nan cuarpar nan i tan dih lai.
11 Nan cuarpar kha nan tan lai. Mah cu nanmah he ka sermi biakamnak i hmelchunhnak a si lai.
12 Na inn ah hrinmi pa paohpaoh cu ni riat an si ah cuarpar tan an si lai. Na tefa a si lomi, ramdang mi sinah tangka in cawkmi an si ah, pa paohpaoh cu cuarpar tan an si lai. Hmailei na tefa hna chan tiang cutin nan tuah awk a si.
13 Nan inn ah hrinmi pa paohpaoh le tangka in cawkmi pa paohpaoh kha an cuarpar nan tan hna lai. Cutin cuarpar tannak cu nanmah he ka sermi zungzal biakamnak i hmelchunhnak a si lai.
14 Cuarpar aa tan lomi cu a miphun chung in hloh a si lai. Zeicahtiah anih cu ka biakam a zul lomi a si” tiah a ti.
15 Cun Pathian nih Abraham cu “Na nupi cu Sarai* tiah na au ti lai lo. Zeicahtiah a min cu Sarah* tiah auh a si cang lai.
16 Thluachuah ka pek lai i fapa pakhat aan hrinpiak lai. Thluachuah ka pek lai i amah chung in miphun le siangpahrang hna an chuak lai” tiah a ti.
17 Mah tikah Abraham cu a bawk i a lung chung in “Kum 100 a si cangmi pa nih fa cu a ngei kho ti hnga maw? Kum 90 a si cangmi Sarah zong fa cu a ngei kho ti hnga maw?” tiah a ti i a nih a chuak.
18 Cucaah Abraham nih a hmaanmi Pathian kha “Ishmael cu na thluachuahnak hmu ko seh!” tiah a ti.
19 Mah tikah Pathian nih “Na nupi Sarah nih fapa pakhat aan hrinpiak hrimhrim lai i a min ah Isak* tiah na sak lai. Amah he biakamnak ka ser lai i mah biakamnak cu a tefa hna chan tiang zungzal in a hmun lai.
20 Ishmael kong he aa tlaiin na chimmi zong ka theih. Anih zong thluachuah ka pek lai i a tefa cu tampi in ka karhter hna lai. Anih cu hruaitu 12 i an pa a si lai i miphun nganpi ah ka ser lai.
21 Asinain ka biakamnak cu hmai kum atu tik caan ah Sarah nih aan hrinpiak dingmi Isak sinah ka fehter lai” tiah a ti.
22 Pathian nih Abraham sin bia a chim dih hnuah Abraham cu a kaltak.
23 Abraham nih a fapa Ishmael le a inn ah hrin a simi, tangka in cawk a simi, a inn ah a ummi pa vialte kha a auh hna i Pathian nih a fial ning in mah ni ah cun an cuarpar a tan hna.
24 Abraham cu cuarpar tan a si ah kum 99 a si cang.
25 A fapa Ishmael cu cuarpar tan a si ah kum 13 a si cang.
26 Cu ni ah cun Abraham cu a fapa Ishmael he cuarpar an i tan.
27 A inn ah hrinmi si hna seh, ramdang mi sinah tangka in cawkmi si hna seh, a inn ah a ummi pa vialte cu amah he cuarpar tan an si.
