Genesis 16:1-16
-
Hagar le Ishmael (1-16)
16 Abram nupi Sarai cu fa a ngei lo, Sarai nih Izipt salnu pakhat a ngeih i a min cu Hagar a si.
2 Sarai nih Abram kha “Zaangfahnak in ka chimmi hi ngai hmanh! Jehovah nih fa a ka pe lo. Cucaah ka salnu hi ihpi law amah thawng in fa ka ngei lai” tiah a ti. Abram nih Sarai bia kha a ngaih.
3 Kanaan ram ah kum hra an um hnuah Sarai nih Izipt mi a salnu Hagar cu nupi caah a vapa Abram kha a pek.
4 Abram nih Hagar cu a ihpi i fa a hun pawi. Fa ka pawi ti a hun hngalh tikah a bawinu cu zei ah a rel ti lo.
5 Mah tikah Sarai nih Abram kha “Atu bantuk in lungfahnak ka inmi hi nangmah palh a si. Ka salnu aan petu cu keimah hi ka si, asinain fa ka pawi ti a hun hngalh tikah zei ah a ka rel ti lo. Keimah le nangmah karah Jehovah nih bia kan ceih ko seh” tiah a ti.
6 Abram nih Sarai cu “Zoh hmanh! Na salnu cu nangmah kut tang ah pei a um ko cu. Nangmah nih a ṭha na ti ning paoh khan tuah ko” tiah a ti. Cucaah Sarai nih a hrem i Hagar cu a sinin a tli.
7 A hnuah Jehovah vancungmi nih Shur lei kalnak lam, ramlak ah a ummi tikhor ah Hagar cu a hmuh.
8 Mah tikah “Sarai salnu Hagar, khoika in dah na rat i khoika ah dah na kal lai?” tiah a hal. Hagar nih “Ka bawinu Sarai sinin ka tli” tiah a leh.
9 Jehovah vancungmi nih cun “Na bawinu sinah va kir ṭhan law a kut tang ah toidor tein va um” tiah a ti.
10 Cun Jehovah vancungmi nih “Tefa tampi kaan pek lai i a rel in rel cawk an si lai lo” tiah a ti.
11 Cun Jehovah vancungmi nih “Atu ah fa na pawi cang i fapate na hrin lai, a min ah Ishmael* tiah na sak lai. Zeicahtiah Jehovah nih na harnak kha aan theihpiak cang.
12 Anih cu ramlak laa bantuk a si lai. Mikip kha a doh hna lai i mikip nih an doh ve lai. A unau hna pawngkam ah khua a sa lai”* tiah a ti chap.
13 Hagar nih amah a chawntu Jehovah min kha a auh i “Nang cu zeizong vialte a hmutu Pathian na si” tiah a ti. Cun “A ka hmutu Pathian cu hika ah ka hmuh cang” tiah a ti.
14 Cucaah mah tikhor cu Beerlahairoi* tiah auh a si. (Mah tikhor cu Kadesh le Bered karah a um.)
15 Hagar nih Abram cu fapa a hrinpiak i Abram nih a fapa cu Ishmael tiah min a sak.
16 Hagar nih Ishmael a hrin lioah Abram cu kum 86 a si cang.
