Genesis 44:1-34
44 Josef nih inn zohkhenhtu kha hitin nawl a pek: “An phorh khawh zat in an sawngkhoi cio ah rawl kha rawnpiak hna law an tangka zong sanhpiak ṭhan hna.
2 Asinain ngakchia bik pa sawngkhoi ah rawl cawknak tangka le ka ngun hrai kha sanhpiak.” Cucaah Josef nih a fial ning cun a tuah.
3 A thaizing zingka ah annih cu an laa he khan an i thawh.
4 Khua in lamhla nawn an phanh hlanah Josef nih inn zohkhenhtu pa kha “Tho law va dawi hna! Na phanh hna tikah ‘Zeicah ṭhatnak kha ṭhatlonak in nan lehrulh?
5 Zeicah ka bawipa hrai cu nan fir? Mah cu hmailei kong chimchungnak caah a hmanmi a si. Nan tuahmi hi thil ṭhalo ngaingai a si’ na va ti hna lai” tiah a ti.
6 Cucaah inn zohkhenhtu nih a phanh hna tikah mah ning in a va ti hna.
7 Annih nih “Bawipa, zeicah cutin na chim? Cu bantuk thil tuah ding cu a ruah hmanh kan ruat bal lo.
8 Kan sawngkhoi chung i kan hmuhmi tangka hmanh Kanaan ram in kan rak kirpi ṭhan. Na bawipa inn i sui le ngun cu zeicah kan fir hnga?
9 Kan lak i pakhatkhat sinah na hmuh ahcun anih cu thah si seh. A taangmi zong na sal kan si lai” tiah an leh.
10 Anih nih “Nan chim ning in si ko seh. Pakhatkhat sinah hrai cu hmuh a si ahcun anih cu ka sal a si lai. Asinain a dang cu nan kal kho lai” tiah a ti.
11 Mah tikah an sawngkhoi cu vawlei ah an ṭhumh colh i an kau cio.
12 Josef inn zohkhenhtu pa nih upa bik in ngakchia bik tiang an sawngkhoi kha ṭha tein a kawl dih. A donghnak ah Benjamin sawngkhoi chung ah hrai cu a hmuh.
13 Mah tikah ngaihchia ngai in an puan kha an thleh, an thil kha laa cung ah an chuan ṭhan i khuapi lei ah cun an kir ṭhan.
14 Judah le a unau pawl cu Josef inn an phanh tikah Josef cu cuka ah a rak um rih ko. Cun a hmaiah cun an kun.
15 Josef nih “Zeicah hi bantuk thil hi nan tuah? Keimah bantuk minung nih hmailei kong ka chimchung khawh ti kha nan hngal lo maw?” tiah a ti hna.
16 Cu tikah Judah nih “Ka bawipa, na sinah zeidah kan chim khawh ti hnga? Miding, miṭha kan si ko ti kha zeitindah kan langhter khawh hnga? A hmaanmi Pathian nih kan rak tuahmi sualnak ruang ah dan a kan tatmi a si. Atu cu kanmah he, hrai an hmuhnak pa he na sal kan si ko cang!” tiah a ti.
17 Asinain Josef nih “Cuticun a si kho lai lo! Hrai an hmuhnak pa lawng ka sal a si lai. A dang cu nan pa sinah him tein va kal ko u” tiah a ti hna.
18 Judah nih Josef cu a hei naih i hitin a ti: “Ka bawipa, kaan nawl ko. Zaangfahnak in na sinah biachimnak nawl ka pe ko. Na thinhung sawh hlah, zeicahtiah nang cu Faraoh bantuk na si.
19 Ka bawipa, nangmah nih ‘Nan pa cu a nung rih maw? Unau dang tah nan ngei ti maw?’ tiah na kan hal.
20 Cucaah kannih nih ‘Kan pa patar cu a nung rih ko. A tarlei ah a hrinmi nau hniang bik zong kan ngei. A upa cu a thi cang. A nu hrinmi lakah amah lawng a taang cang i a pa nih a dawt tukmi a si’ tiah kan in ti.
21 Mah tikah bawipa, nangmah nih ‘Hmuh ka duh, ka sinah rak ratpi u!’ tiah na kan ti.
22 Asinain kannih nih ‘Ngakchiapa nih ka pa a kaltak ding cu a si kho lo. A kaltak ahcun ka pa cu a thi hrimhrim ko lai’ tiah kan in ti.
23 ‘Nan nau hniang bik nan i ratpi lo ahcun nan ka tong kho ti lai lo’ tiah na kan ti.
24 “Cucaah ka pa sin kan kir tikah na chimmi bia kha kan chimh.
25 A hnuah ka pa nih ‘Va kal ṭhan u law kan caah rawl tlawmpal in va caw u’ tiah a kan ti.
26 Mah tikah ‘Kan kal kho lai lo. Kan nau hniang bik nih a kan zulh lawng ah kan kal lai. Kan nau hniang bik nih a kan zulh lo ahcun mipa kha kan tong kho lai lo’ tiah kan ti.
27 Cu tikah ka pa nih ‘Ka nupi nih fapa pahnih a ka hrinpiak ti kha ṭha tein nan hngalh ko.
28 Pakhat nih cun a ka kaltak cang. Anih cu “Sahrang nih a thleh, a baoh dih cang ko hi ta!” tiah ka rak ti i atu tiang ka hmu ṭhan ti lo.
29 Asinain hi ka fapa zong hi nan i kalpi i a cung ah thil ṭhalo a tlun sual ahcun ṭuakpar cangmi keimah hi ngaihchiat buin Thlan khor* ah nan ka kaltermi a si ko lai’ tiah a ti.
30 “Ngakchiapa tel loin ka pa sinah ka kir ṭhan ahcun a nunnak cu ngakchiapa nunnak he aa ṭem chih caah,
31 ngakchiapa aa tel lomi a hmuhle cangka anih cu a thi ko lai. Cutin a si ahcun kan pa ṭuakpar cu ngaihchiatnak he Thlan ah kan kaltermi a si ko lai.
32 ‘Ngakchiapa cu ka kirpi lo i na hmaiah ka chuahpi ṭhan lo ahcun a zungzal in mawhchiat ka si ko lai’ tiah ka pa sinah aamah ka khaan.
33 Ngakchiapa canah keimah tu na sal in ka taangta lai. Anih tu cu a ule he kir ko seh.
34 Ngakchiapa tel loin cun ka pa sinah zeitindah ka kir ngam lai? Cu bantuk ngaihchiatnak ka pa cung ah a tlunmi cu ka zoh ngam lai lo!”
Footnotes
^ Biafang Fianternak ah zoh.
