Genesis 26:1-35
26 Abraham chan ah mangṭam a rak tlung bal, atu zong ah ram chung ah mangṭam a tlung ṭhan. Cucaah Isak cu Filistin ram, siangpahrang Abimelek sinah Gerar khua ah a va kal.
2 Mah tikah Jehovah cu a sinah a lang i “Izipt ram ah kal hlah. Kaan hmuhsakmi ram ah hin um ko.
3 Hi ram ah hin ramdang mi bantuk in um ko, na sinah ka um zungzal lai i thluachuah kaan pek lai. Zeicahtiah nangmah le na tefa cu hi ram hi kaan pek hna lai i na pa Abraham sinah chiatserh in hitin bia kaa kammi ning in ka tuah lai:
4 ‘Na tefa cu vancung i arfi bantuk in ka karhter hna lai; na tefa cu hi ram vialte hi ka pek hna lai; na tefa thawng in vawleicung miphun vialte cu thluachuah an hmu lai.’
5 Abraham nih ka bia kha a ngaih i ka halmi le ka phunglam le ka nawlbia vialte kha a zulh zungzal” tiah a ti.
6 Cucaah Isak cu Gerar ah khua a sa rih ko.
7 Khuami pawl nih a nupi kong kha an hal tikah “Ka far a si” tiah a ti hna. Rebekah cu muidawh a si caah “Amah ruang ah khuami nih an ka thah sual lai” ti a phan caah “Ka nupi a si” tiah a chim ngam lo.
8 Caan tlawmpal hnuah Filistin siangpahrang Abimelek cu thlalang awng in khua a hei cuan i Isak nih a nupi Rebekah a pommi kha a hmuh.
9 Mahle cangka Abimelek nih Isak cu a auh i “Na nupi a si komi zeicah ‘Ka far a si’ na ti?” tiah a hal tikah Isak nih “Amah ruang ah ka thi sual lai ti ka phan caah cutin ka chimmi a si” tiah a leh.
10 Abimelek nih “Zeicah hi thil hi na tuah? Ka mi pakhatkhat nih na nupi cu ihpi sual hna seh law nangmah ruang ah sualphawt kan si ko hnga!” tiah a ti.
11 Abimelek nih a mi pawl kha “Hi mipa le a nupi a tawngmi paoh cu thihdan pek nan si lai!” tiah nawl a pek hna.
12 Isak nih cuka ram ah thlaici a tuh i Jehovah nih thluachuah a pek caah mah kum ah a let 100 in a zun.
13 Cucaah thilri chawva a ngei chin lengmang i mirum ngaingai a hung si.
14 Tuurun, cawrun le sinum tampi a ngeih caah Filistin mi nih an hun nahchuah.
15 Cucaah a pa Abraham chan ah a pa salle nih tikhor an rak cawhmi vialte kha Filistin mi nih vawlei an chilh dih.
16 Abimelek nih Isak kha “Nang cu kanmah nakin na ṭhawn deuh tuk cang caah kan sinin i ṭhial ko” tiah a ti.
17 Cucaah Isak cu cuka cun aa ṭhial i Gerar horkuang* ah thlam a sak i cuka ah khua a sa.
18 A pa Abraham chan ah an rak cawh nain Abraham a thih hnuah Filistin mi nih an chilh ṭhanmi tikhor kha Isak nih a cawh ṭhan. Cun mah tikhor hna kha a pa nih min a rak sak ning in a sak ṭhan hna.
19 Isak salle nih cuka horkuang ah tikhor an cawh i cerh pakhat an hmuh.
20 Gerar tuukhal hna cu Isak tuukhal hna he an i si i “Kanmah tikhor a si!” tiah an ti. Isak nih amah he an i sik caah mah tikhor kha Esek* tiah min a sak.
21 A dang tikhor an cawh ṭhan i cu kong zong ah an i si ṭhan. Cucaah Isak nih mah tikhor kha Sitnah* tiah min a sak.
22 A hnuah cuka in aa ṭhial i a dang tikhor a cawh ṭhan, asinain cu kong ah siknak a um ti lo. Cucaah Isak nih mah tikhor kha Rehoboth* tiah min a sak. Cun “Jehovah nih atu cu hmun kaupi a kan pek cang i hi ram ah tefa tampi a kan pek cang” tiah a ti.
23 Mah hnuah cuka in Beersheba lei ah a kal.
24 Cu zan ah Jehovah cu a sinah a lang i “Kei cu na pa Abraham Pathian ka si. Na thinphang hlah, keimah nih kaan umpi ko. Ka sal Abraham ruang ah thluachuah kaan pek lai i na tefa cu ka karhter hna lai” tiah a ti.
25 Cucaah cuka hmun ah biakṭheng pakhat a sak i Jehovah kha a min in a auh i a thangṭhat. Isak nih cuka ah cun thlam a sak i a salle nih tikhor pakhat an cawh.
26 Mah hnuah Abimelek cu ruahnak a cheutu Ahuzzath le a ralbawi Fikol he Gerar in Isak sinah an ra.
27 Mah tikah Isak nih “Zeicah ka sinah cun nan rat? Nan ka huat i pei nan ka ṭhawl cang cu” tiah a ti hna.
28 Annih nih “Jehovah nih aan umpi ti kha fiang tein kan hngalh cang. Cucaah ‘Nangmah le kanmah karah chiatserh biakamnak um seh law mah ning in tuah awkah bia i kam u sih.
29 Na cung ah thil ṭhalo zeihmanh kan tuah lo bantuk in kan cung zong ah thil ṭhalo zeihmanh na tuah lai lo. Na cung ah ṭhatnak lawng kan tuah i daihnak he kan in kaltermi kha na hngalh ko. Atu ah Jehovah nih thluachuah aan pek cang’” tiah an ti.
30 Isak nih an caah rawl danghnak a tuahpiak hna i an ei, an ding.
31 A thaizing ah zingka tein an tho i Isak he chiatserh biakamnak an tuah. Cun Isak nih a thlah hna i daihnak he an i ṭhen.
32 Mah ni ah Isak salle cu a sinah an ra i an cawhmi tikhor ah “Ti a chuak cang!” tiah an rak chimh.
33 Cucaah Isak nih mah tikhor cu Shibah tiah min a sak. Mah ruang ah cu khua cu Beersheba tiah nihin ni tiang an auh.
34 Esau cu kum 40 a si ah Hit mi Beeri fanu Judith kha nupi ah a ṭhit i Hit mi Elon fanu Basemath zong a ṭhit.
35 Anmah ruang ah Isak le Rebekah cu an ngaih a chia tuk.
