Genesis 8:1-22
8 Pathian nih Noah le a sin i lawng chung ah a ummi ramlak saram le innzuat saṭil vialte kha a philh hna lo. Cucaah Pathian nih vawleicung ah thli a hranter i ti cu ṭum hram aa thawk.
2 Vanraang ah a ummi ti le vancung ti kutka hna kha a khar caah ruah cu a han.
3 Cun ti cu a ṭum chin lengmang i ni 150 a phanh tikah ti cu a ṭum tuk cang.
4 Thla sarihnak thla, ni 17nak ni ah lawng cu Ararat tlang cung ah a taang.
5 Ti cu thla hranak tiang hmaan tein a ṭum chin lengmang. Thla hranak thla, ni khatnak ni ah tlangpar hna cu an hung lang.
6 Ni 40 hnuah Noah nih tilawng thlalang awng kha a hun i,
7 langak pakhat kha a thlah. Vawlei ah ti a kao dih hlan tiang langak cu a zuang i a kir ṭhan lengmang.
8 A hnuah Noah nih ti a zor cang maw, zor cang lo ti hngalh awkah ṭhuro pakhat kha a thlah.
9 Vawlei cu ti nih a khuh dih rih i ṭhuro cu futnak hmun a hmuh lo caah lawng ah a rak kir ṭhan. Cucaah Noah nih a kut in a hei banh i lawng chung ah a luh ṭhan.
10 Ni sarih a hngah ṭhan hnuah lawng chung in ṭhuro cu a thlah ṭhan.
11 Zanlei sang i ṭhuro a rak kir tikah a hmur in oliv hnah tharte a hun i putmi kha a hmuh. Cucaah Noah nih ti cu a ṭum cang ti kha a hngalh.
12 A dang ni sarih a hngah hnuah ṭhuro kha a thlah ṭhan. Asinain a rak kir ti lo.
13 Noah kum 601 a si kum, thla khatnak thla, ni khatnak ni ah ti cu a kao dih cang. Noah nih lawng cungkhuh kha a hun i a zoh tikah vawlei cu a ro cang ti kha a hmuh.
14 Thla hnihnak thla, ni 27nak ni ah vawlei cu a dihlak in a ro cang.
15 Cu tikah Pathian nih Noah cu,
16 “Nangmah he, na nupi he, na fapale le an nupile he lawng chung in chuak cang u.
17 A zuang khomi thilnung, saram, vawlei ah a lawn in a lawnmi saram vialte le nunnak a ngeimi thilnung vialte kha chuahpi hna. Cuticun fa an hring lai i vawleicung ah an karh lai” tiah a ti.
18 Cucaah Noah cu a nupi he, a fapale le an nupile he lawng chung cun an chuak.
19 A lawn in a lawnmi saram, a zuang khomi thilnung, vawlei ah a tlongmi thilnung vialte cu anmahle an phun ning cio in lawng chung in an chuak.
20 Mah hnuah Noah nih Jehovah caah biakṭheng pakhat a ser. A thiangmi saram le a thiangmi va cheukhat kha a lak i biakṭheng cung ah khangh thawinak a pek.
21 Jehovah nih rimhmui* cu a theih. Cucaah Jehovah nih a lung chung in “Minung cu an ngakchiat tein an ruahnak a ṭha lo. Cucaah minung tuahsernak ruang ah vawlei cu zeitik hmanh ah chiat ka serh ti lai lo. Thilnung vialte cu atu bantuk in zeitik hmanh ah ka hrawk ti hna lai lo.
22 Atu caan thawk in vawleicung ah tuh caan a um lai i zun caan a um lai, a kih caan a um lai i a linh caan a um lai, ṭhal caan a um lai i khuasik caan a um lai, chun a um lai i zan a um lai. Zeitik hmanh ah an dong lai lo” tiah a ti.
Footnotes
^ A hrampi, “thinlung a damtermi rim.”
