Genesis 2:1-25
2 Van le vawlei le a chung i a ummi thil vialte sernak cu liim a si cang.
2 Ni sarihnak ni a phanh hlanah Pathian nih a rian kha a liim. Ni sarihnak ni ah a rian vialte in a hun i din.
3 Pathian nih ni sarihnak ni kha thluachuah a pek i a thiangmi ni tiah a ti. Zeicahtiah Pathian nih aa tinhnak ning in zeizong vialte a ser hnuah aa dinh caah a si.
4 Hihi Jehovah* Pathian nih van le vawlei a ser ni ah van le vawlei ser an si ning tuanbia a si.
5 Vawleicung ah zei bantuk ramkung le thingkung hmanh a kho rih lo. Zeicahtiah Jehovah Pathian nih vawleicung ah ruah a surter rih lo i vawlei thlotu ahohmanh an um rih lo.
6 Asinain vawlei chung in dap cu a hung chuak i vawlei kha a cinter.
7 Cun Jehovah Pathian nih leidip in mipa cu a ser. A hnar ah nunnak thaw kha a chem. Mah tikah mipa cu a nungmi* a hung si.
8 Jehovah Pathian nih nichuahlei ah Eden dum pakhat a ser. Cuka ah a sermi mipa cu a chiah.
9 Jehovah Pathian nih vawlei ah thingkung a phunphun kha a khohter i aa dawhmi le ei duh awk ngai a simi theiṭha a phunphun an tlai. Dum laifang ah nunnak thingkung le a ṭha le a chia hngalhnak thingkung zong a khohter.
10 Dum ti pek awkah Eden dum in tiva pakhat a luang; cu tiva cu tiva pali ah aa ṭhen.
11 A pakhatnak tiva min cu Pishon a si; cu tiva cu sui a chuahnak Havilah ram velchum in a luang.
12 Cuka ram i sui cu an ṭha ngaingai. Bdellium thingthling le oniks lungvar zong an chuak.
13 A pahnihnak tiva min cu Gihon a si; cu tiva cu Kush ram velchum in a luang.
14 A pathumnak tiva min cu Hiddekel* a si; cu tiva cu Assiria nichuahlei ah a luang. A palinak tiva cu Zufrates a si.
15 Jehovah Pathian nih mipa cu Eden dum ah a umter i dum kha thlawh awk le zohkhenh awkah a chiah.
16 Cun Jehovah Pathian nih mipa cu hiti zong in nawl a pek: “Dum chung ah a ummi thingkung vialte i a thei kha na duhmi paoh na ei khawh.
17 Asinain a ṭha le a chia hngalhnak thingkung i a thei kha cu na ei lai lo. Na ei ni ah cun na thi hrimhrim lai.”
18 Cun Jehovah Pathian nih “Mipa hi amah lawng um peng cu a ṭha lai lo. A caah hawi le bawmtu ka serpiak lai” tiah a ti.
19 Jehovah Pathian nih vawlei in a sermi ramlak saram le van ah a zuangmi thilnung vialte kha mipa sinah cun a ratpi hna i min a sakter; mipa nih min a sak hna ning in an min ah a cang beh.
20 Mipa nih innzuat saṭil le van ah a zuangmi thilnung le ramlak saram kha min a sak hna, asinain amah caah cun hawi le bawmtu a ngei lo.
21 Jehovah Pathian nih mipa cu thu hluahmah in a hngilhter. Aa hngilh karah a hnakruh pakhat kha a zuhpiak i cuka zawn cu titsa in a phih.
22 Jehovah Pathian nih mipa sinin a zuhmi hnakruh in minu pakhat kha a ser i mipa sinah cun a ratpi.
23 Mah tikah mipa nih hitin a ti:
“Hihi ka ruh in lakmi ruh,Ka sa in lakmi sa a si.
Mipa sinin lakmi a si caahMinu tiah auh a si lai.”
24 Cucaah pa nih a nu le a pa kha a kaltak hna lai i a nupi he an i fon* lai. Annih cu pumkhat an si lai.
25 Mipa le a nupi cu taklawng in an um ko nain an ning a zak lo.
Footnotes
^ Pathian min a voi khatnak aa telnak a si. Thlaihhlei A4 ah zoh.
^ Biafang Fianternak i “Nunnak” ah zoh.
^ Asiloah “Tigris.”
^ Asiloah “an umṭi peng lai.”
