Genesis 30:1-43
30 Rachel nih Jakob caah fa a hrinpiak khawh lomi kha a hngalh tikah a unu kha a nahchuah i Jakob kha “Fa rak ka pe, cu lo ahcun ka thi lai” tiah a ti.
2 Mah tikah Jakob cu Rachel cung ah a thin a hung tuk i “Keimah cu Pathian maw ka si? Fa ngei loin aan umtertu cu Pathian pei a si ko cu” tiah a ti.
3 Cucaah Rachel nih cun “Hika ah ka salnu Bilhah a um ko. Amah hi ihpi law ka caah fa a ka hrinpiak lai. Amah thawng in kei zong fa ka ngei kho ve lai” tiah a ti.
4 A salnu Bilhah cu a pek i Jakob nih cun a ihpi.
5 Bilhah cu fa a hun pawi i Jakob kha fapa a hrinpiak.
6 Rachel nih “Pathian cu ka biaceihtu a si. Ka aw kha a ka theihpiak i fapa pakhat a ka pek cang” tiah a ti i Dan* tiah min a sak.
7 Rachel salnu Bilhah cu fa a pawi ṭhan i Jakob caah fapa a pahnihnak a hrinpiak ṭhan.
8 Rachel nih cun “Ka u he fakpi in kan i pai i keimah nih ka tei!” tiah a ti i Naftali* tiah min a sak.
9 Leah nih fa a ngeih khawh ti lomi kha a hngalh tikah a salnu Zilpah kha Jakob cu a pek.
10 Cun Leah a salnu Zilpah nih cun Jakob cu fapa a hrinpiak.
11 Leah nih “Thil sining cu ka caah a ṭha!” tiah a ti i Gad* tiah min a sak.
12 Cun Leah a salnu Zilpah nih Jakob cu a pahnihnak fapa a hrinpiak ṭhan.
13 Leah nih “Kaa lawm tuk hringhran! Atu cu nu pawl nih lunglawmmi nu tiah an ka ti hrimhrim cang lai” tiah a ti i Asher* tiah min a sak.
14 Changvut ṭuan caan ah Reuben cu lo ah a kal i mandrake* thei kha a va hmuh. Cun a nu sinah a rak put. Mah tikah Rachel nih Leah kha “Na fapa nih a rak phorhmi mandrake kha tlawmpal in ka pe ve” tiah a hal.
15 Mah tikah Leah nih “Ka va na ka chuhmi hi naa za rih lo maw? Ka fapa nih a rak phorhmi mandrake zong maw lak rih naa timh?” tiah a ti. Cucaah Rachel nih “A si ahcun na fapa nih a rak phorhmi mandrake kha ka pe law Jakob cu tuzan na sinah a it lai” tiah a ti.
16 Zanlei sang ah Jakob cu lo in a rak tlun tikah Leah nih a va don i “Atu zan cu ka sinah na it lai. Nangmah hlan awkah ka fapa nih a rak phorhmi mandrake kha Rachel ka pek cang” tiah a ti. Cucaah mah zan cu a sinah a it.
17 Pathian nih Leah a thlacamnak kha a theihpiak i Leah cu fa a hun pawi. Cun Jakob caah a panganak fapa a hrinpiak.
18 Cucaah Leah nih cun “Ka va kha ka salnu ka pek caah Pathian nih a man a ka pek” tiah a ti i Issakhar* tiah min a sak.
19 Cun Leah cu fa a pawi ṭhan i Jakob cu a paruknak fapa a hrinpiak ṭhan.
20 Cun Leah nih cun “Pathian nih laksawng ṭha a ka pek. Fapa paruk ka hrinpiak cang caah atu cu ka va nih a ka cohlan cang lai” tiah a ti i Zebulun* tiah min a sak.
21 Mah hnuah fanu pakhat a hrin i Dinah tiah min a sak.
22 A donghnak ah Pathian nih Rachel cu a philh lo i a thlacamnak kha a ngaihpiak. Cucaah fa ngeih khawhnak a pek.
23 Fa a hung pawi i fapate a hrin. “Pathian nih ka ningzahnak kha a ka lakpiak cang!” tiah a ti.
24 “Jehovah nih fapa pakhat a ka chap” tiah a ti i Josef* tiah min a sak.
25 Rachel nih Josef a hrinle cangka Jakob nih Laban cu “Ka khua le ka ram ah rak ka tlunter cang.
26 Ka rianṭuannak thawng in tling tein a man ka pekmi ka nupile, ka fale hi kaa kalpi hna lai. Na caah zeitindah rian ka ṭuan ti kha ṭha tein na hngalh ko” tiah a ti.
27 Laban nih cun “Zaangfahnak in ka sinah hin um rih ko. Zeicahtiah nangmah thawng in Jehovah nih thluachuah a ka pek timi hmelchunhnak hna kha ka hmuh.
28 Na ṭuan man cu chim law kaan pek lai” tiah a ti.
29 Cucaah Jakob nih “Na rian kha zeitindah ka ṭuan ti le na saṭil kha zeitindah ka zohkhenh hna ti cu na hngalh ko.
30 Ka rat hlanah saṭil tlawmte lawng na ngei. Asinain atu cu na saṭil an karh i tampi na ngei cang. Ka phanh hnuah Jehovah nih thluachuah aan pek. Atu cu keimah ka chungkhar caah ṭuan ka duh cang” tiah a ti.
31 Laban nih cun “Zeidah kaan pek lai?” tiah a hal i Jakob nih “Zeihmanh pek a hau lo! Ka chimmi hi na ka tuahpiak ding a si ahcun na saṭil kha kaan cawnghpiak lai i kaan zohkhenhpiak rih lai.
32 Nihin na saṭilrun lakah kaa chawk lai. A ṭialmi le aa dehmi tuu paohpaoh, tuukawng a nomi lakin a rong a pawlmi paohpaoh, a ṭialmi le aa dehmi mehehpi paohpaoh kha a dang tein na chiah hna lai. Atu thawk in hi bantuk in an hrinmi paohpaoh cu ka rian ṭuan man an si lai.
33 Ni khatkhat ah ka saṭilrun kha na rak zoh tikah ka dinfelnak kha nangmah theng nih na hmuh ko lai. A ṭialmi le aa deh lomi mehehpi paohpaoh le tuukawng no lakah a rong a pawl lomi paohpaoh kha ka sinah na hmuh hna ahcun firmi an si tiah na ti khawh” tiah a ti.
34 Laban nih cun “A ṭha ko! Na chim ning cun si ko seh” tiah a ti.
35 Cu ni ah cun Laban nih a phei in a ṭialmi le aa dehmi mehehtum, a ṭial i aa dehmi mehehpi, a raangmi le a pawlmi tuukawng no paohpaoh kha a fapale cu a cawnghter hna.
36 Cun mah saṭil hna kha Jakob sinin ni thum lamkal aa hlatnak hmun ah a va chiah hna. A taangmi cu Jakob nih a cawngh hna.
37 Jakob nih storax* thing, almond thing le plane* thing a hringmi nge hna kha a tan i an hawng a hawh tikah a raang in an ṭial.
38 A hawng a hawhmi thingnge kha saṭil ti dinnak kuang chung ah le ti luannak chung ah a chiah. Cutin a chiahmi cu saṭil pawl ti din awk i an rat tikah mah thingnge hmaiah an i kaih nakhnga caah a si.
39 Cucaah thingnge hmaiah cun saṭil pawl cu an i kaih i a phei in a ṭialmi, ṭial dip in a ṭialmi le aa dehmi kha an hrin hna.
40 Cun Jakob nih tuukawng no kha a ṭhen hna i Laban tuurun lakin a ṭialmi le a rong a pawlmi saṭil hna he hmaitonh in a chiah hna. Cun amah saṭil le Laban saṭil kha an i cawh nakhnga lo a ṭhen hna.
41 A ṭhawng deuhmi saṭil hna an phol tikah Jakob nih thingnge kha ti dinnak kuang chung ah a chiah. Cuticun thingnge pawng ah an i kaih.
42 Asinain a derthawmmi saṭil hna an phol tikah cun thingnge cu a chia lo. Cucaah a derthawmmi cu Laban ta an si i a ṭhawngmi cu Jakob ta an hung si.
43 Cuticun Jakob cu a rum thluahmah i saṭilrun, salnu le salpa, kalauk le laa kha tampi a ngeih hna.
Footnotes
^ A sullam “Biaceihtu.”
^ A sullam “Kaa Paihnak.”
^ A sullam “Thil Sining A Ṭha.”
^ A sullam “Lawmhnak.”
^ Mah thei cu fa ngeih khawhnak caah bawmtu a si tiah an ruah, asinain fiang tein a langhtermi thil a um lo.
^ A sullam “Anih Cu Ṭuan Man A Si.”
^ A sullam “Innak.”
^ Josifiah i a tawinak a si i a sullam “Jah Nih A Chap.”
^ A par a raang i a hmuimi thingkung.
^ A ṭe a tam i a hawng aa hawkmi thingkung.
