Genesis 42:1-38
42 Jakob nih Izipt ram ah rawl a um ti kha a theih tikah a fapale cu “Zeicah pakhat le pakhat nan i zoh sawhsawh ko?
2 Izipt ram ah rawl a um ti ka theih. Pawṭam in kan thih nakhnga lo cuka ah cun va kal u law rawl va caw u” tiah a ti hna.
3 Cucaah Josef a ule pahra cu rawl cawk awkah Izipt ram ah an kal.
4 Asinain Jakob nih Josef a nau Benjamin kha cu a ule sinah a kalter lo. Zeicahtiah “A cung ah thil ṭhalo pakhatkhat a tlung sual lai ti ka phang” tiah a ti.
5 Kanaan ram zong ah mangṭam cu a tlun ve caah Israel fapale cu rawl cawk awkah midang he an ra ve.
6 Josef cu Izipt ram ah nawlngeitu le vawleicung khuazakip in a rami hna sinah rawl a zuartu a si. Cucaah a ule zong an ra i Josef hmaiah cun an kun.
7 Josef nih a ule cu a hmuh hna tikah a hngalh colh hna. Asinain aho a si kha aa hngalhter hna lo. Awhrangpi in a chawnh hna i “Khuazei in dah nan rat?” tiah a hal hna tikah annih nih “Rawl cawk awkah Kanaan ram in kan ra” tiah an leh.
8 Josef nih a ule cu a hngalh ko hna nain a ule nih cun an hngal lo.
9 Josef nih anmah he aa tlaiin mang a manhmi kha a hun hngalh ṭhan colh. Cun “Nannih cu mi-ngiatu nan si! Kan ram a derthawmnak ngiat awkah nan ra!” tiah a ti hna.
10 Mah tikah annih nih “A si lo, bawipa, na salle hi rawl cawk awkah a rami kan si.
11 Kan dihlak hin pa pakhat chung chuak kan si. Kannih cu miding, miṭha kan si ko. Mi-ngiatu kan si lo” tiah an ti.
12 Asinain Josef nih cun “A si lai lo! Kan ram a derthawmnak ngiat awkah nan ratmi a si ko!” tiah a ti hna.
13 Annih nih “Kannih cu unau 12 kan si. Kanaan ram ah a ummi pa pakhat chung chuak kan si. A hniang bik cu atu kan pa sinah a um i a dang pakhat tu cu a um ti lo” tiah an ti.
14 Asinain Josef nih cun “Ka chim ning in a si ko. ‘Mi-ngiatu nan si ko!’
15 Nan chimmi a hmaan le hmaan lo ka hlathlai lai. Faraoh nunnak chalh in chiatserh in bia kaa kam. Hika hmun ah nan nau hniang bik a rat hlan tiang hika hmun hin nan chuak lai lo.
16 Nan lakin pakhat nih nan naupa cu va au u, a dang tu cu thonginn chung ah nan um lai. Nan naupa nan ratpi ahcun nan chimmi cu a hmaan ti kha ka hngalh lai. Cutin a si lo ahcun Faraoh nunnak chalh in chiatserh in bia kaa kam. Nannih cu mi-ngiatu nan si” tiah a ti hna.
17 Cuticun ni thum chung thong ah a thlak hna.
18 A ni thumnak ni ah Josef nih “Kei cu Pathian a ṭihzahmi ka si caah ka chim ning in tuah u law nan nung lai.
19 Nannih cu miding, miṭha nan si ahcun nan lakin pakhat cu thong chung ah taangta seh. A dang tu cu ei awk a ngei lomi nan chungkhar sinah va kir u law rawl cu hei phor u.
20 Nan nau hniang bik kha ka sinah nan ratpi ahcun nan bia cu a hmaan tinak a si lai i nannih cu thah nan si lai lo” tiah a ti hna. Mah tikah annih zong cutin tuah awkah an hna a tla.
21 Pakhat le pakhat kha “Kan nau cung i kan rak tuahmi thil ruang ah dantatnak kan inmi a si hrimhrim. Ka zaangfah ko u tiah a kan nawl lioah a lungretheihnak kha kan hmuh ko nain kan rak ngaihpiak duh lo. Mah ruang ah hi bantuk harnak hi kan tonmi a si” tiah an i ceih.
22 Reuben nih cun “‘Ngakchiapa kha harnak pe hlah u’ tiah kaan ti hna lo maw? Asinain nan rak ngai duh lo. Atu ah a thisen man cu hal ṭhan kan si” tiah a ti.
23 Josef nih kan chimmi bia hi a hngalh ti kha an hngal lo, zeicahtiah Josef nih holhlettu kha a hman caah a si.
24 Josef cu an sin khan a chuak i a va ṭap. A hnuah a rak kir ṭhan i Simeon kha a tlaih i an hmaiah cun a khih.
25 Josef nih cun pakhat cio i an sawngkhoi ah rawl kha khat lak in rawnpiak hna u. An tangka zong sanhpiak ṭhan hna u law riahcaw zong rawnh hna u tiah nawl a pek hna i mah ning in an tuah.
26 An rawl cu laa kha an phorhter i cuka in an chuak.
27 Riahnak hmun an phanh tikah an lak i pakhat nih laa kha rawl pek ding in a sawngkhoi cu a kau tikah a sawngkhoi kaa ah tangka kha a hmuh.
28 A unau pawl cu “Ka tangka an ka khirh ṭhan, ka sawngkhoi chung ah a um ko hi!” tiah a ti hna tikah an lau tuk i a therh in a therh hna. Pakhat le pakhat kha “Zeicah Pathian nih dan a kan tat hnga?” tiah an i ti.
29 Kanaan ram ah a ummi an pa Jakob sin an phanh tikah an cung i a tlungmi thil vialte kha an chimh.
30 “Ram uktu bawi nih awhrangpi in a kan chawnh i kan ram ngiat awkah a rami nan si tiah sual a kan puh.
31 Asinain ‘Kannih cu miding, miṭha kan si ko. Mi-ngiatu kan si lo.
32 Kannih cu unau 12 kan si. Pa pakhat chung chuak kan si. Pakhat cu a um ti lo, a hniang bik tu cu Kanaan ram ah kan pa sinah a um’ tiah kan ti.
33 Ram uktu bawi nih cun ‘Miding, miṭha nan si ahcun nan lak i pakhat cu ka sinah taangta seh. A dang tu cu ei awk a ngei lomi nan chungkhar hna sinah va kir u law rawl cu hei phor u.
34 Cun nan nau hniang bik kha ka sinah ratpi u, cuticun nannih cu mi-ngiatu nan si lo i miding, miṭha nan si ti kha ka hngalh lai. Mah tikah nan unaupa kha kaan pek ṭhan hna lai i hi ram ah hin chaw nan let kho lai’ tiah a kan ti.”
35 An sawngkhoi kha an hun tlen cio tikah an tangka tom cu an sawngkhoi chung ah a rak um cio. An tangka tom kha an hmuh tikah an pafa rual in an ṭih tuk.
36 An pa Jakob nih cun “Fa loin pei nan ka chiah lai hi. Josef a um ti lo, Simeon a um ti lo. Atu Benjamin zong nan kalpi rih lai! Zeicah hi thil vialte hi ka cung ah a tlun!” tiah a ti.
37 Mah tikah Reuben nih a pa cu “Benjamin kha na sinah ka rak kirpi ṭhan lo ahcun ka fapale pahnih hi na thah khawh hna. Benjamin cu ka kut chung ah rak ka pe law na sinah ka rak kirpi ṭhan hrimhrim lai” tiah a ti.
38 Asinain Jakob nih “Ka fapa cu nan kalpi lai lo. Zeicahtiah a u cu a thi cang i amah lawng a taang cang. Lampi ah thil pakhatkhat a ton i a thih sual ahcun ṭuakpar cangmi keimah cu ngaihchia ngai in Thlan* ah nan ka kalter sual hnga” tiah a ti.
Footnotes
^ Biafang Fianternak ah zoh.
