Genesis 4:1-26
4 Adam nih a nupi Evi kha a ihpi i nau a hung pawi. Kain kha a hrin tikah Evi nih “Jehovah bawmhnak thawng in fapate ka hrin cang” tiah a ti.
2 A hnuah a nau Abel kha a hrin ṭhan.
Abel cu tuukhal a hung si i Kain cu lothlo a hung si.
3 Caan tlawmpal a rauh hnuah Kain nih Jehovah sin raithawi awkah a lo chung chuak theitlai cheukhat a rak put.
4 Abel nih cun a tuurun hna lakin hrin hmasa bikmi tuu cheukhat kha a rak put i an thau he khan rai a thawi. Jehovah cu Abel le a raithawinak cung ah a lung a tling.
5 Asinain Kain le a raithawinak cung ah cun a lung a tling lo. Cucaah Kain cu a thin a hung tuk i a hmai a chia.
6 Mah tikah Jehovah nih Kain cu “Zeicah na thin a hun tuk i na hmai a chiat?
7 Atu thawk in ṭhatnak na tuah ahcun mithmai ṭha na hmu ṭhan ko lai. Asinain ṭhatnak na tuah lo ahcun sualnak nih nangmah uk awkah kutka hram in aan bawh ko. Nangmah tu nih sualnak kha na tei awk a si” tiah a ti.
8 Mah hnuah Kain nih a naupa Abel cu “Lo ah kal u sih” tiah a ti. Lo an phanh tikah Kain nih a naupa Abel cu a zuan hnawh i a thah.
9 A hnuah Jehovah nih Kain kha “Na nau Abel tah khoika ah dah a um?” tiah a hal. Kain nih “Ka hngal lo. Ka nau cawngtu maw ka si?” tiah a leh.
10 Mah tikah Pathian nih hitin a ti: “Zeicah cutin na tuah? Ngai hmanh! Na nau thisen nih vawlei in a ka auh.
11 Nang cu atu ah chiatserh na si cang, na thahmi na naupa thisen a dolhtu hi hmun in hin ṭhawl na si cang.
12 Lo na thlawh tikah theipar a chuak lai lo. Nang cu vawleicung ah a vakvaimi le a zammi na hung si lai.”
13 Mah tikah Kain nih Jehovah kha “Ka palhnak caah dantatnak cu in awkah a har tuk.
14 Nihin ah hi ram in hin na ka ṭhawl cang, na hmaika in ka chuak cang lai. Keimah cu hi vawleicung ah a vakvaimi le a zammi ka si cang lai, a ka hmumi paoh nih an ka thah ko lai cu ta” tiah a ti.
15 Cucaah Jehovah nih “Kain a thattu paoh cu a let sarih in teirul cham an si lai” tiah a ti.
Ahohmanh nih Kain kha an thah nakhnga lo Jehovah nih hmelchunhnak pakhat a pek.
16 Cun Kain cu Jehovah hmai in a chuak i Eden dum nichuahlei ah a ummi Nod* ram ah khua a va sa.
17 Mah hnuah Kain nih a nupi kha a ihpi, a nupi cu fa a hung pawi i Enok kha a hrin. Cun khuapi pakhat a dirh i a fapa min bunh in Enok tiah min a sak.
18 A hnuah Enok nih Irad kha a hrin. Irad cu Mehujael pa a si, Mehujael cu Methushael pa a si, Methushael cu Lamek pa a si.
19 Lamek cu nupi pahnih a ngei. Pakhat cu Adah a si i a dang pakhat cu Zillah a si.
20 Adah nih Jabal kha a hrin. Anih cu thlam ah a ummi hna le saṭil a zuami hna i an pa a si.
21 A naupa min cu Jubal a si. Anih cu tingtang le thonglawi tumtu vialte hna i an pa a si.
22 Cun Zillah zong nih Tubal-kain kha a hrin, anih cu thir le dar in hriamnam a phunphun a sertu kha a si. Tubal-kain a farnu min cu Naamah a si.
23 Mah hnuah Lamek nih a nupi Adah le Zillah caah biazai a ṭial:
“Lamek nupile, ka aw hi ngai tuah u;Ka chimmi hi ngai tuah u:
Mipa pakhat nih a ka hliam caah ka thah,Mino pa nih a ka tuk caah ka thah.
24 Kain a thattu paoh cu a let 7 in phuhlam an si ahcun,Lamek a thattu paoh cu a let 77 in phuhlam an si lai.”
25 Adam nih a nupi Evi kha a ihpi ṭhan i fapa pakhat a hrin. Evi nih Seth* tiah min a sak i “Kain nih a thahmi Abel airolh in Pathian nih fapa* pakhat a ka pek ṭhan cang” tiah a ti.
26 Seth zong nih fapa pakhat a ngeih i a min ah Enosh tiah a sak. Mah caan thawk in mi nih Jehovah min kha an hun auh.
