Genesis 28:1-22
28 Cucaah Isak nih Jakob cu a auh i thluachuah a pek. Cun “Kanaan minu cu na ṭhi hna lai lo.
2 Paddan-aram i na pu Bethuel inn ah va kal law na nu ṭa Laban fanu pakhat kha va ṭhi.
3 A Ṭhawngmi Pathian nih thluachuah aan pek lai i tefa tampi aan pek lai. Nang cu miphun tampi pa na hung si lai.
4 Pathian nih Abraham bia a kamhmi thluachuah cu nangmah le na tefa kha aan pek hna lai. Pathian nih Abraham a pekmi, atu ramdang mi in na umnak ram cu nangmah ta a si lai” tiah a ti.
5 Isak nih Jakob cu Paddan-aram i Aramaean mi Bethuel fapa Laban sinah a thlah. Laban cu Jakob le Esau an nu Rebekah a ṭa a si.
6 Isak nih Jakob kha thluachuah a pek i Paddan-aram lei ah nupi ṭhit ding in a thlahmi kha Esau nih a hmuh. Cun thluachuah a pek lioah “Kanaan minu cu na ṭhi hna lai lo” tiah a timi zong a theih.
7 Cun Jakob nih a nu le a pa bia a ngaih i Paddan-aram lei ah a kal ti zong a hngalh.
8 A pa Isak nih Kanaan minu a duh hna lo ti kha a hngalh tikah,
9 Esau cu Ishmael sinah a va kal i nupi pahnih a ngei cang ko nain Nebaioth a farnu Mahalath kha a ṭhit. Mahalath cu Abraham fapa Ishmael fanu a si.
10 Jakob cu Beersheba in aa thawh i Haran khualei ah a kal.
11 Hmun pakhat a phanh tikah ni a tlak cang caah cuka ah riah aa tim. Lung pakhat kha a lak i chantling ah aa tlinh i a it.
12 Mang pakhat a manh i hlei pakhat a hmuh. Mah hlei cu vawlei in van tiang a phan. Cuka ah Pathian vancungmi cu an ṭum, an kai lengmang.
13 Hlei a cung bik ah Jehovah a um. Pathian nih
“Keimah cu na pu Abraham Pathian, Isak Pathian Jehovah ka si. Na ihnak ram hi nangmah le na tefa kha kaan pek hna.
14 Na tefa cu vawleicung i leidip bantuk in an tampi lai. Na ram cu nichuah, nitlak, chaklei, thlanglei ah a kau chin lengmang lai. Nangmah le na tefa thawng in vawleicung miphun vialte cu thluachuah an hmu hrimhrim lai.
15 Na sinah ka um lai. Na kalnak hmun paoh ah kaan huhphenh lai i hi ram ah hin kaan kirpi ṭhan lai. Ka biakam ning in ka tuah lai. Kaan kaltak lai lo” tiah a ti.
16 Jakob cu a hun i hlau i “Hika hmun ah pei Jehovah a rak um taktak ko hi, mah kha ka rak hngal lo” tiah a ti.
17 A thin a phang tuk i “Hi hmun cu khuaruahhar taktak a si! Pathian inn bak a si lai i hihi vancung kutka a si lai” tiah a ti chap.
18 Jakob cu zingka tein a tho i chantling ah aa tlinhmi lung kha a lak i lungphun ah a bunh. Cun a cung ah chiti a toih.
19 Cun mah hmun kha Bethel* tiah min a sak. Asinain a hlanah cu khua cu a min ah Luz a rak si.
20 Jakob nih chiatserh biakamnak a tuah i “Maw Pathian, nangmah nih na ka umpi i ka khualtlawnnak ah na ka huhphenh, ei awk rawl le hruk awk hnipuan na ka pek,
21 ka pa inn ah him tein na ka kirter ṭhan ahcun Jehovah cu ka Pathian a si hrimhrim ti kha ka hngalh lai.
22 Ka phunmi hi lungphun cu Pathian inn a hung si lai. Cun na ka pekmi vialte chung in cheuhra cheukhat kha pel lo tein kaan pek lai” tiah a ti.
Footnotes
^ A sullam “Pathian Inn.”
