Genesis 37:1-36
37 Jakob cu ramdang mi in a pa a rak umnak Kanaan ram ah khan a um rih ko.
2 Mah hi Jakob tuanbia cu a si.
Mino Josef cu kum 17 a si tikah a pa nupi Bilhah le Zilpah fapale he tuu an cawng tawn. A ule nih an tuahmi thil ṭhalo hna kha Josef nih a pa cu a chimh.
3 Josef cu a tar hnuah a hrinmi fapa a si caah Israel nih a dang a fapale hna nakin a dawt deuh i a caah aa dawh tukmi angki fual a ṭhitpiak.
4 A ule nih Josef cu an pa nih anmah nakin a dawt deuhmi kha an hmuh tikah an huat i a chawnh hmanh ṭha tein an chawn duh ti lo.
5 A hnuah Josef nih mang a manh i a mang cu a ule a chimh hna tikah an huat chinchin.
6 Josef nih cun “Ngai hmanh u, ka mang kaan chimh hna lai.
7 Lo chung ah faphal kan tom hna lioah ka faphal cu a tho i ding tein a dir. Nan faphal hna nih ka faphal cu an kulh i an kunpiak” tiah a ti.
8 A ule nih cun “Nangmahle nangmah kan cung ah siangpahrang ah i ser in maw uk na kan timh?” tiah an ti. A mang le a chimmi bia ruang ah cun an huat chinchin.
9 Mah hnuah Josef nih cun a dang mang pakhat a manh ṭhan. Cun a ule cu “A dang mang pakhat ka manh ṭhan. Atu tan ah cun nika, thlapa le arfi 11 nih an ka kunpiak” tiah a chimh hna.
10 A mang cu a pa le a unau pawl kha a chimh hna tikah a pa nih cun a sik i “Na mang cu zei bantuk mang dah a si? Keimah le na nu le na unau pawl cu na sinah kan ra lai i kan in kunpiak lai tiah maw naa ruah?” tiah a ti.
11 A ule nih cun an hun nahchuah nain a pa tu nih cun a chimmi kong kha a lung chung in aa cinken.
12 A ule cu Shekhem khua pawng ah an pa saṭilrun khalh awkah an kal.
13 A hnuah Israel nih Josef cu “Na ule cu Shekhem khua pawng ah saṭil an khal. Va kal law va zoh tuah hna” tiah a ti tikah Josef nih cun “Aw, ka kal ko lai!” tiah a ti.
14 Mah tikah Isreal nih “Na ule le saṭil pawl cu zeidah an lawh ti kha va zoh law rak ka chim ṭhan te” tiah a ti. Cucaah Josef cu Hebron nelrawn in a chuak i Shekhem khualei ah a kal.
15 Josef cu ramlak ah aa chawh len ko kha mipa pakhat nih a hmuh i “Zeidah na kawl?” tiah a hal.
16 Josef nih cun “Ka ule ka kawl hna. Khoika ah dah saṭil an cawngh na hngal maw?” tiah a ti.
17 Mipa nih cun “Hika in hin an kal cang. ‘Dothan lei ah kan kal lai’ an timi kha ka theih” tiah a ti. Cucaah Josef nih cun a ule cu a dawi hna i Dothan ah a va hmuh hna.
18 A ule nih cun lamhlatpi in an hmuh i an sin a phanh hlanah amah thah awkah khua an khang.
19 Pakhat le pakhat kha “Zoh hmanh u! Mang man pa a ra khih.
20 Ra u, that u sih law tikhor chung ah hlonh u sih. Sahrang nih a seh tiah kan ti lai. A mang cu zeidah a lawh kan zoh tuah lai” tiah an i ti.
21 Mah kha Reuben nih a theih tikah Josef kha khamh awkah aa zuam. Cucaah “A thah cu that hlah u sih.
22 Thisen cu chuah hlah u sih. Ramlak tikhor chung tu ah hin thla hna u sih law a cung ah cun kan kut thla hlah u sih” tiah a ti hna. Reuben nih cun an sinin hin ka khamh lai i ka pa sinah ka kuat ṭhan lai tiah aa tim.
23 Josef cu a rak phanhle cangka a ule nih cun aa dawh tukmi a angki fual cu an phoihpiak.
24 Cun an tlaih i tikhor chung ah an thlak. Tikhor ah cun ti a rak um lo.
25 Cun an ṭhu i rawl an ei. An ei lioah cun Gilead lei in a rami Ishmael miphun chawlettu phu khat kha an hmuh hna. An kalauk cung ah cun a nak i a hmuimi thingthling, balsam chiti le thingthling hawng hna kha an phorh i Izipt lei ah an kal.
26 Judah nih a unau pawl kha “Kan naupa cu kan thah i a thihnak kha kan thuh ahcun zeidah a ṭhahnem lai?
27 Ishmael miphun sinah hin zuar u sih. A cung ah cun kan kut thla hlah u sih. Anih cu kan nau, kan thi le kan sa pei a si ve cu” tiah a ti hna tikah a unau pawl cu an hna a tla.
28 Cucaah a ule nih Josef cu tikhor in an chuah i Ishmael miphun sinah ngun tangka phar 20 in an zuar. Annih nih Josef cu Izipt ram lei ah an kalpi.
29 A hnuah Reuben cu tikhor ah a va kir ṭhan i tikhor ah Josef a rak um ti lomi kha a hmuh tikah a angki leng cu a thleh.
30 A unau pawl sinah cun a va kir i “Ngakchiapa a um ti lo! Zeitindah ka tuah lai?” tiah a ti hna.
31 Mah tikah annih nih meheh tum pakhat kha an thah i a thi ah cun Josef angki leng kha an hnim.
32 Mah hnuah an pa sinah cun an kalpi i “Mah hihi kan hmuh. Na fapa angki a si maw, si lo zoh tuah” tiah an ti.
33 Jakob nih cun a zoh i “Mah hihi ka fapa angki a si ko! Sahrang nih pei a seh cang ko hi! Josef cu a thleh, a baoh dih cang ko hi ta!” tiah a ti.
34 Jakob nih cun a thilpuan kha a thleh. A tai ah buri puan kha aa menh i a fapa cu ni tampi chung a ṭah.
35 A fapale vialte le a fanule vialte nih an hnemh len ko nain an hnem kho lo. “Ka fapa ka ṭah bu hin Thlan* chung ah lut ko ning!” tiah a ti i a fapa cu a ṭah lengmang.
36 Midian mi nih Josef cu Izipt ram i Faraoh bawi, Potifar sinah cun an zuar. Anih cu runvengtu bawi a si.
Footnotes
^ Biafang Fianternak ah zoh.
