Genesis 7:1-24
7 Mah hnuah Jehovah nih Noah cu “Nangmah he, na innchungkhar dihlak he lawng chung ah lut u, zeicahtiah hi chan mi hna lakah nangmah cu miding na si ti kha ka hmuh cang.
2 A thiangmi saram paoh kha a nu, a pa pasarih cio* in na luhpi hna lai; a thiang lomi saram paoh kha a nu, a pa pahnih cio in;
3 van i a zuangmi thilnung zong kha a nu, a pa pasarih cio* in luhpi hna, cuticun fa an ngei lai i an ci a mit lai lo, cun vawleicung pumpi ah an karh lai.
4 Ni sarih hnuah vawleicung ah ni 40 le zan 40 chung ruah ka surter lai. Ka sermi thilnung vialte kha vawleicung in ka hloh dih hna lai” tiah a ti.
5 Jehovah nih nawl a pek ning in Noah nih a tuah dih.
6 Vawleicung i tilian a tlun lioah Noah cu kum 600 a si.
7 Cucaah Noah cu a nupi, a fapale le an nupile he tilian a tlun hlanah lawng chung ah an lut.
8 A thiangmi saram, a thiang lomi saram, a zuang khomi thilnung, vawlei ah a tlonglengmi thilnung vialte,
9 a nu, a pa tiin pahnih pahnih cio in lawng chung ah cun an lut. Mah cu Pathian nih Noah nawl a pek ning in a si.
10 Ni sarih hnuah vawleicung ah tilian cu a tlung.
11 Noah kum 600 a si kum, thla hnihnak thla, ni 17nak ni ah vanraang ti vialte cu an i bung dih i vancung ti kutka hna cu an i hung dih.
12 Cucaah ni 40 le zan 40 chung vawleicung ah ruah fakpi in a sur.
13 Cu ni ah cun Noah cu a nupi, a fapale Shem, Ham, Jafeth le an nupile pathum he lawng chung ah an lut.
14 Ramlak saram cu anmahle an phun ning cio in, innzuat saṭil cu anmahle an phun ning cio in, vawlei ah a lawn in a lawnmi saram cu anmahle an phun ning cio in, va a phunphun, a zuang khomi thilnung vialte cu anmahle an phun ning cio in lawng chung ah an lut.
15 Nunnak a ngeimi saram vialte cu pahnih pahnih cio in lawng chung ah an lut.
16 Pathian nih Noah nawl a pek ning in saram vialte cu a nu, a pa tiin lawng chung ah an lut. Mah hnuah Jehovah nih innka cu a khar.
17 Vawleicung ah ruah cu fakpi in ni 40 chung a sur peng caah ti cu a kai chin lengmang i lawng kha a cawi, lawng cu ti cung ah a vuan.
18 Ti cu a lian chin lengmang i a kai chin lengmang, asinain lawng cu ti cung ah a vuan ko.
19 Vawleicung i tilian cu a ngan tuk caah vanraang tang i a ummi tlang sang vialte cu ti nih a phum dih.
20 Ti cu tlangpar in dong 15* tiang a kai.
21 Cucaah vawleicung ah a tlonglengmi thilnung vialte—a zuang khomi thilnung, innzuat saṭil, ramlak saram, a bu in a ummi thilnung le minung vialte cu an thi dih.
22 Vawleicung i nunnak le thaw a ngeimi vialte cu an thi dih.
23 Cucaah minung, saram, a lawn in a lawnmi saram, van i a zuangmi thilnung hna i telin vawleicung i thilnung vialte kha a hrawh dih. An dihlak in vawleicung in hloh an si; Noah le a sin i tilawng chung ah a ummi lawnglawng an luat.
24 Ti nih vawlei cu ni 150 chung a khuh dih.
Footnotes
^ Asiloah “tuah sarih cio” ti zong a si kho.
^ Asiloah “tuah sarih cio” ti zong a si kho.
^ Mah cu pe 22 hrawng a si. Thlaihhlei B14 ah zoh.
