Genesis 38:1-30
-
Judah le Tamar (1-30)
38 Cu caan ah cun Judah cu a unau hna sinin a chuak i Adullam khuami Hirah a umnak hmun ah thlam a va bunh.
2 Cuka ah Judah nih Kanaan miphun Shua fanu kha a hmuh. A ṭhit i a ihpi.
3 A nupi cu fa a hun pawi, fapa a hrin i Er tiah min a sak.
4 Fa a hung pawi ṭhan i fapate a hrin, Onan tiah min a sak.
5 Fapa a hrin ṭhan i Shelah tiah min a sak. Shelah a hrin lioah Judah cu Akhzib khua ah a um.
6 A hnuah Judah nih a fater Er cu nupi a ṭhitpiak i a min cu Tamar a si.
7 Asinain Judah fater Er cu Jehovah lung a tong lo. Cucaah Jehovah nih a thihter.
8 Judah nih Onan kha “Unau nupi ṭhit ding timi phungphai ning in na u nih a rohtakmi a nupi kha va ṭhi law cuticun na u cu nangmah thawng in tefa a ngei kho lai” tiah a ti.
9 Asinain Onan nih fa kan hrinmi cu keimah fa an si lai lo ti kha a hngalh. Cucaah a u nupi cu a ihpi tikah a u caah fa a ngeihpiak nakhnga lo a ci cu a leng ah a chuahter.
10 A tuahsernak cu Jehovah mithmuh ah thil ṭhalo a si caah anih zong Pathian nih a thihter.
11 Judah nih a monu Tamar kha “Ka fapa Shelah a cutzat tiang na pa inn ah nuhmei in va um ko” tiah a ti. Cutin a timi cu ‘A ule bantuk in Shelah zong a thi ve sual lai ti a phan caah a si.’ Cucaah Tamar cu a kal i a pa inn ah a va um.
12 Caan sau nawn a rauh hnuah Judah nupi Shua fanu cu a thi. Judah cu a ṭah caan a dih tikah a tuuhmul meh awkah a hawipa Adullam khuami Hirah he Timnah khua ah an kal.
13 Tamar cu “Na vapa a pa Judah cu a tuuhmul meh awkah Timnah khua ah a kal” tiah an chimh.
14 Tamar nih nuhmei thilthuam aa hrukmi kha a phoih. Puan in a hmai kha aa khuh i Timnah lei kalnak lam, Enaim khua luhnak hauka ah a ṭhu. Zeicahtiah Shelah cu a upa cang nain a ṭhitter duh lomi kha a hngalh caah a si.
15 Judah nih a hmuh tikah a hmai aa khuh caah hlawhhlangnu a si rua tiah a ruah.
16 Cucaah lam pawng ah a ṭhumi Tamar sinah a va kal i “Itṭi u sih” tiah a ti. Zeicahtiah a monu a si kha a hngal lo. Mah tikah Tamar nih “Kan ihṭi ahcun zeidah na ka pek lai?” tiah a ti.
17 Judah nih “Ka saṭilrun chung in meheh no pakhat kaan kuat lai” tiah a ti tikah “Na ka kuat hlanah aamah khaannak caah thil pakhatkhat na ka pe lai maw?” tiah a ti.
18 Judah nih “Zei aamah khaannak thil dah kaan pek lai?” tiah a hal tikah “Na min khenhnak kutdong hrolh le a hri, cun naa putmi ṭhiangṭhunh kha ka pe” tiah a ti. Mah thil hna kha a pek i a ihpi tikah nau a pawi.
19 Mah hnuah Tamar cu a kal i a hmaikhuh puan kha a hawh i nuhmei thilthuam kha aa hruk ṭhan.
20 Judah nih minu sinah a ummi aamah khaannak thil hna kha lak ṭhan awkah a hawipa Adullam khuami sinin meheh no te kha a kuat. Asinain minu cu a hmu lo.
21 Cuka mi hna kha “Enaim khua lam pawng ah a ummi hlawhhlangnu* kha khuazei ah dah a um?” tiah a hal hna tikah annih nih “Hika hmun ah hlawhhlangnu an um bal lo” tiah an ti.
22 A donghnak ah Judah sinah a rak kir ṭhan i “Ka hmu lo. Cuka mi hna zong nih ‘Hika hmun ah hlawhhlangnu an um bal lo’ an ti” tiah a ti.
23 Mah tikah Judah nih “Mah thil hna cu va i lak cang ko seh. Ningzah tu kan i huah sual lai. Zei a si hmanh ah hi meheh no te hi ka kuat ko nain na va hmuh ve lomi cu” tiah a ti.
24 Thla thum hrawng a rauh hnuah Judah kha “Na monu Tamar cu hlawh a hlang i fa zong a pawi” tiah an chimh. Mah tikah Judah nih “Leng ah va chuah u. That u law mei in khang u” tiah a ti hna.
25 Tamar cu an chuahpi tikah a vapa a pa cu bia a cah i “Fa a ka pawitertu cu hi thil hna a ngeitu hi a si. Hi min khenhnak kutdong hrolh le a hri le ṭhiangṭhunh a ngeitu cu ahodah a si rak zoh tuah” tiah a ti.
26 Judah nih mah thil hna kha a zoh i “Ka fapa Shelah kha ka pek lo caah anih cu keimah nakin a ding deuh ko” tiah a ti. Mah hnu cun a ihpi ti lo.
27 A nithla a tlin tikah a paw chung ah faphir an um.
28 Nau a hrin lioah pakhat nih a kut a rak chuah i nau hlawmtu nu nih “Amah hi a chuak hmasami a si” tiah a ti i a kut ah la sen kha a khih colh.
29 Asinain a kut cu a hnuh ṭhan i a dang pakhat tu a chuak. Cucaah nau hlawmtu nu nih “Zeicah mah tluk cun na rak i tenh chih!” tiah a ti i Perez* tiah min an sak.
30 Mah hnuah a kut ah la sen ṭemmi naute cu a hung chuak i Zerah tiah min an sak.
