Genesis 1:1-31
1 A hramthawk ah Pathian nih van le vawlei kha a ser.
2 Vawlei cu muisam a ngei lo i zeihmanh a um lo, ti nih a khuh dih i muihnak in a khat. Pathian ṭhawnnak* cu ti cung ah rian a ṭuan.
3 Cun Pathian nih “Ceunak um seh” tiah a ti i ceunak cu a hung um.
4 Pathian nih ceunak cu a ṭha tiah a hmuh i ceunak le muihnak kha a ṭhen.
5 Pathian nih ceunak cu Chun tiah a auh i muihnak kha Zan tiah a auh. Zanlei a hung dih i zinglei a hung um, mah cu a ni khatnak ni a si.
6 Cun Pathian nih “Ti karlak ah vanraang um seh law ti cu ṭhen hnih ah i ṭhen seh” tiah a ti.
7 Pathian nih vanraang kha a ser i vanraang cunglei ti le vanraang tanglei ti kha a ṭhen. Mah ning in cun a hung um.
8 Pathian nih vanraang kha Van tiah a auh. Zanlei a hung dih i zinglei a hung um, mah cu a ni hnihnak ni a si.
9 Cun Pathian nih “Van tang ah a ummi ti vialte cu hmunkhat ah i fon dih hna seh law lei ro hung lang seh” tiah a ti. Mah ning in cun a hung um.
10 Pathian nih lei ro kha Vawlei tiah a auh i hmunkhat ah aa fonhmi ti cu Rili tiah a auh. Pathian nih a tuahmi cu a ṭha ti kha a hmuh.
11 Pathian nih “Vawlei ah ramkung, ci a ngeimi thingkung le ci a ngeimi thingthei kha anmahle an phun ning cio in kho hna seh” tiah a ti. Mah ning in cun a hung um.
12 Vawlei ah ramkung, ci a ngeimi thingkung le ci a ngeimi thingthei cu anmahle an phun ning cio in an hung kho. Pathian nih a tuahmi cu a ṭha ti kha a hmuh.
13 Zanlei a hung dih i zinglei a hung um, mah cu a ni thumnak ni a si.
14 Cun Pathian nih “Chun le zan ṭhentu ding ah van ah ceunak um seh, mah ceunak cu khuacaan le ni le kum hmelchunhnak caah si hna seh.
15 Vancung i ceunak hna nih vawlei cu a ceuh lai” tiah a ti. Mah ning in cun a hung um.
16 Cun Pathian nih ceunak nganpi pahnih a ser. Chun ceuhtu ding ah ceunak ngan deuh kha a ser i zan ceuhtu ding ah ceunak hme deuh kha a ser, arfi zong a ser hna.
17 Pathian nih mah ceunak hna kha vawlei ceuhtu ding ah van ah a chiah hna.
18 Chun le zan uktu ding le ceunak le muihnak ṭhentu ding ah a chiah hna. Pathian nih a tuahmi cu a ṭha ti kha a hmuh.
19 Zanlei a hung dih i zinglei a hung um, mah cu a ni linak ni a si.
20 Cun Pathian nih “Ti chung ah thilnung* um hna seh, a zuangmi thilnung hna cu vawlei cunglei van ah zuang hna seh” tiah a ti.
21 Pathian nih rili thilnung nganpipi, ti chung ah a tlongmi thilnung le a zuangmi thilnung vialte kha anmahle an phun ning cio in a ser hna. Pathian nih a tuahmi cu a ṭha ti kha a hmuh.
22 Mah tikah Pathian nih thluachuah a pek hna i “Ti chung ah a ummi thilnung hna, karh u law rili ah khat dih u. A zuangmi thilnung zong vawleicung ah tampi in karh u” tiah a ti.
23 Zanlei a hung dih i zinglei a hung um, mah cu a ni nganak ni a si.
24 Cun Pathian nih “Vawleicung ah innzuat saṭil, a lawn in a lawnmi saram le ramlak saram hna cu anmahle an phun ning cio in um hna seh” tiah a ti. Mah ning in cun a hung um.
25 Pathian nih ramlak saram kha anmahle an phun ning cio in, innzuat saṭil kha anmahle an phun ning cio in, a lawn in a lawnmi saram kha anmahle an phun ning cio in a ser hna. Pathian nih a tuahmi cu a ṭha ti kha a hmuh.
26 Cun Pathian nih “Kanmah muikeng in, kanmah he i lo in minung ser hna u sih. Annih nih rili nga, van i a zuangmi thilnung, innzuat saṭil, a lawn in a lawnmi saram vialte le vawleicung dihlak kha uk hna seh” tiah a ti.
27 Pathian nih amah muikeng in minung cu a ser; amah muikeng in mipa le minu cu a ser hna.
28 Mah hnuah Pathian nih thluachuah a pek hna i “Tefa tampi in ngei u law vawleicung ah khat dih u. Vawlei hi zohkhenh u, rili nga, van i a zuangmi thilnung, vawlei ah a tlongmi thilnung vialte hi uk hna u” tiah a ti.
29 Cun Pathian nih “Vawleicung pumpi ah a ummi ci a ngeimi thingkung le ci a ngeimi thingthei kha kaan pek hna. Mah cu nan ei awk caah a si lai.
30 Ramlak saram vialte, van ah a zuangmi thilnung vialte le nunnak a ngei i vawlei ah a tlongmi thilnung vialte caah ramhring kha ei awkah ka pek hna” tiah a ti. Mah ning in cun a hung si.
31 Pathian nih a sermi vialte cu a ṭha tuk ti kha a hmuh. Zanlei a hung dih i zinglei a hung um, mah cu a ni ruknak ni a si.
