Genesis 46:1-34
46 Cucaah Israel cu a ngeihmi thil vialte he aa thawh. Beersheba a phanh tikah a pa Isak Pathian sinah raithawinak a pek.
2 Pathian nih Israel cu zan ah langhnak in a chawnh i “Jakob, Jakob!” tiah a auh tikah “Hawi!” tiah a leh.
3 Pathian nih “Kei cu a hmaanmi Pathian, na pa Pathian ka si. Izipt ram kal ding cu ṭih hlah, cuka ah miphun ngan ah kaan ser lai.
4 Keimah theng nih Izipt ram ah kaan kalpi lai i cuka in kaan kirpi ṭhan te lai. Na thih tikah Josef nih na mit aan chinh lai” tiah a ti.
5 Jakob cu Beersheba in aa thawh, a fapale nih an pa Jakob le an fale le an nupile kha Faraoh kuatmi rangleng kha an citter hna.
6 Kanaan ram ah an i khonmi an saṭil le an thilri vialte kha an i kalpi. Cuticun Jakob le a tefa vialte cu Izipt ram ah an phan.
7 Jakob nih a fale, a tule le a tefa vialte kha Izipt ram ah aa kalpi hna.
8 Izipt ram ah a rak phanmi Jakob tiah auhmi Israel fapale min cu hihi an si: Jakob fater cu Reuben a si.
9 Reuben fapale cu Hanok, Pallu, Hezron le Karmi an si.
10 Simeon fapale cu Jemuel, Jamin, Ohad, Jakhin, Zohar le Kanaan minu fapa Shaul an si.
11 Levi fapale cu Gershon, Kohath le Merari an si.
12 Judah fapale cu Er, Onan, Shelah, Perez le Zerah an si. Asinain Er le Onan cu Kanaan ram ah an thi.
Perez fapale cu Hezron le Hamul an si.
13 Issakhar fapale cu Tola, Puvah, Iob le Shimron an si.
14 Zebulun fapale cu Sered, Elon le Jahleel an si.
15 Annih cu Paddan-aram ah hrinmi Leah fapale an si, cuka ah a fanu Dinah zong a hrin. Leah he an ngeihmi Jakob tefa cu 33 an si.
16 Gad fapale cu Zifion, Haggi, Shuni, Ezbon, Eri, Arodi le Areli an si.
17 Asher fapale cu Imnah, Ishvah, Ishvi le Beriah an si, an farnu cu Serah a si.
Beriah fapale cu Heber le Malkhiel an si.
18 Annih cu Laban nih a fanu Leah a pekmi Zilpah tefa an si. Jakob le Zilpah nih an ngeihmi tefa dihlak cu 16 an si.
19 Jakob nupi Rachel fapale cu Josef le Benjamin an si.
20 Izipt ram ah On* khua i tlangbawi Potifera fanu Asenath nih Josef a hrinpiakmi fapale cu Manasseh le Efraim an si.
21 Benjamin fapale cu Bela, Bekher, Ashbel, Gera, Naaman, Ehi, Rosh, Muppim, Huppim le Ard an si.
22 Annih cu Jakob le Rachel tefa an si: An dihlak ah 14 an si.
23 Dan fapa* cu Hushim a si.
24 Naftali fapale cu Jahzeel, Guni, Jezer le Shillem an si.
25 Annih cu Laban nih a fanu Rachel a pekmi Bilhah tefa an si. Jakob le Bilhah tefa cu an dihlak ah pasarih an si.
26 Izipt ram ah a phanmi Jakob tefa dihlak cu a monule i tel loin 66 an si.
27 Izipt ram ah Josef nih a ngeihmi fapale cu pahnih an si. Izipt ram ah a phanmi Jakob innchungkhar mi dihlak cu 70 an si.
28 Jakob nih Goshen ram lei ah ka ra lio ti kha Josef sin thawng thanh awkah Judah kha a thlah chung. Goshen ram lei an rat lioah,
29 Josef nih a rangleng kha a timhtuah i a pa Israel ton awkah Goshen ram ah a kal. A pa kha a hmuh tikah a kuh i saupi a ṭap.
30 Israel nih Josef cu “Atu ah na hmai kaan hmuh cang i na nung rih ti ka hngalh cang caah ka thih zong ah a poi ti lo” tiah a ti.
31 Josef nih a ule le a pa chungkhar hna kha “Faraoh sinah ka va kal lai i ‘Kanaan ram ah a ummi ka unau hna le ka pa chungkhar cu ka sinah an rak phan cang.
32 Annih cu tuukhal le saṭil cawngtu an si. An tuurun, an saṭilrun le an ngeihmi vialte kha an rak i ratpi’ tiah ka va chimh lai.
33 Faraoh nih aan auh hna i ‘Zei rian dah nan ṭuan?’ tiah aan hal hna ahcun,
34 ‘Bawipa, kannih cu kan pupa hna bantuk in kan ngakchiat tein atu tiang saṭil cawngtu kan si’ tiah nan ti lai. Izipt mi nih tuu cawng pawl kha an fih hna caah Goshen ram ah an in umter ko hna lai” tiah a ti hna.
