Genesis 25:1-34
25 Abraham nih nupi pakhat a ṭhit ṭhan i a min ah Keturah a si.
2 Keturah nih Zimran, Jokshan, Medan, Midian, Ishbak le Shuah kha a hrin hna.
3 Jokshan cu Sheba le Dedan pa a si.
Dedan fapale cu Asshurim, Letushim le Leummim an si.
4 Midian fapale cu Efah, Efer, Hanok, Abida le Eldaah an si.
Hi hna hi an dihlak in Keturah tefa an si.
5 A hnuah Abraham nih a ngeihmi vialte cu Isak kha a pek.
6 Asinain Abraham nih a nuchun fapale tu cu laksawng a pek hna. Cun a nun lioah a fapa Isak sinin aa hlatnak Nichuahlei ram ah a kalter hna.
7 Abraham cu kum 175 a nung.
8 Abraham cu chan tling cikcek tiang nun nuam tein a nun hnuah hmanung bik a thaw a chuah i a thi. Cun a phunhawi hna sinah pumh a si.*
9 A fapa Isak le Ishmael nih Hit miphun Zohar fapa Efron lo i Makpelah lungkua ah an vui. Mah cu Mamre nichuahlei ah a um.
10 Cu lo cu Abraham nih Heth fapale sinin a cawkmi a si i cuka ah Abraham cu a nupi Sarah sinah an vui.
11 Abraham a thih hnuah a fapa Isak cu Pathian nih thluachuah a pek rih. Isak cu Beerlahairoi pawng ah khua a sa.
12 Hihi Ishmael tefa cu an si. Ishmael cu Sarah salnu Izipt miphun Hagar nih Abraham a hrinpiakmi fapa a si.
13 Hi hna hi Ishmael fapale an min le an chuahkehnak min cazin a si: Ishmael a fater cu Nebaioth, cun Kedar, Adbeel, Mibsam,
14 Mishma, Dumah, Massa,
15 Hadad, Tema, Jetur, Naphish le Kedemah an si.
16 Hihi Ishmael fapale 12 an si i anmah phun cio ah hruaitu an si. An umnak hmun le an riahnak hmun hna kha an min in an bunh.
17 Ishmael cu kum 137 a nun hnuah hmanung bik a thaw a chuah i a thi. Cun a phunhawi hna sinah pumh a si.
18 Ishmael tefa cu Havilah in Assiria ram tiang khua an sa. Havilah cu Shur pawng ah a um i Shur cu Izipt ram pawng ah a um. Anih cu a unau hna pawngkam ah khua a sa.*
19 Hihi Abraham fapa Isak tefa cu an si.
Abraham cu Isak pa a si.
20 Isak cu Rebekah a ṭhit ah kum 40 a si. Rebekah cu Paddan-aram ah a ummi Aramaean miphun Bethuel fanu le Aramaean miphun Laban farnu a si.
21 A nupi cu a cin caah Isak nih Jehovah sinah a nawlpiak lengmang. Cucaah Jehovah nih Isak nawlnak kha a theihpiak i Rebekah cu nau a hung pawi.
22 Rebekah cu a paw chung i a ummi a fale pakhat le pakhat an i chuih caah “Hitin a si ahcun ka nun cu zeidah a ṭhahnem?” tiah a ti. Cucaah thil sining hngalh awkah Jehovah kha a hal.
23 Jehovah nih “Na paw chung ah miphun pahnih an um, aa lo lomi miphun pahnih kha na hrin hna lai; pakhat cu a dang pakhat nakin a ṭhawng deuh lai i a u cu a nau sal a si lai” tiah a ti.
24 A nithla a tlin tikah fa a hring i faphir an si.
25 A chuak hmasami cu a pumpaluk in a sen i a hmulmi puan bantuk in a pum cu hmul in a khah caah Esau* tiah min an sak.
26 Mah hnuah a nau cu Esau kedil tlaih buin a hung chuak. Cucaah Jakob* tiah min an sak. Rebekah nih a hrin hna lioah Isak cu kum 60 a si.
27 Ngakchia cu an hun ṭhan tikah Esau cu sakap thiam a hung si i ram a vai tawn. Asinain Jakob tu cu thlam chung ah khua a sa i soisel awk a um lomi a si.
28 Isak nih Esau kahmi sa kha a ei tawn caah Esau kha a dawt deuh. Asinain Rebekah nih cun Jakob kha a dawt deuh.
29 Ni khat cu Jakob nih pehang a chuan lioah Esau cu ram vaihnak in tha dih ngai in a rak tlung.
30 Esau nih cun “Zokzok in na chuanmi pehang sen kha tlawmpal* in ka pe tuah! Ka tha a dih tuk hih!”* tiah a ti. Cu ruang ah Esau cu Edom* tiah an auhnak cu a si.
31 Mah tikah Jakob nih “Fater na sinak kha rak ka zuarh hmasa!” tiah a ti.
32 Esau nih “Ka paw ṭam in ka thi cang lai hih! Fater sinak cu ka caah zeidah a ṭhahnem?” tiah a ti.
33 Jakob nih “Ka sinah chiatserh in bia i kam hmasa!” tiah a ti. Cucaah chiatserh in bia aa kam i a fater sinak cu Jakob sinah a zuar.
34 Mah tikah Jakob nih Esau cu changreu le pehang kha a pek. A ei, a din hnuah a tho i a kal. Esau nih a fater sinak cu zei ah a rel lo.
