Genesis 11:1-32
11 Cu lio caan ah vawleicung mi vialte cu holh phun khat lawng an hmang i an hmanmi biafang zong aa khat dih.
2 Nichuahlei an i ṭhial tikah Shinar ram ah nelrawn pakhat an hmuh i cuka ah khua an sa.
3 Cun pakhat le pakhat kha “Ra u! Tlakrawh ser hna u sih law mei in raw hna u sih” tiah an i ti. Cuticun lung canah tlakrawh, a senghnak caah kattaza sii kha an hman.
4 Cun annih nih “Khuapi pakhat in dirh u sih, van tawng in innsang pakhat sa u sih law kan min thanter u sih. Cutin a si lo ahcun vawleicung khuazakip ah kan i ṭhenṭhek dih sual lai” tiah an ti.
5 Mi nih khuapi le innsang an sakmi kha zoh awkah Jehovah cu a rung ṭum.
6 Cun Jehovah nih “Annih cu miphun pakhat lawng an si i holh pakhat lawng an hman caah hitin an tuahmi a si. Hiti ning in cun tuah an i tinhmi paoh an tuah khawh ko lai.
7 Cucaah va kal u sih law pakhat le pakhat an i hngalhthiam nakhnga lo an holh va danter hna u sih” tiah a ti.
8 Jehovah nih annih cu vawleicung khuazakip ah a ṭhenṭhek dih hna caah khuapi saknak rian kha an ngol.
9 Jehovah nih vawleicung mi vialte kha an holh a danter hnanak thawng in a tuai-urter hna. Jehovah nih vawleicung khuazakip ah a ṭhenṭhek dih hna caah mah khuapi cu Babel* tiah auh a si.
10 Hi hna hi Shem tefa cu an si.
Tilian a tlun hnu kum hnihnak, Shem cu kum 100 a si ah Arpaksad kha a ngei.
11 Arpaksad a ngeih hnuah Shem cu kum 500 a nung rih i fapa le fanu dang zong a ngeih hna.
12 Arpaksad cu kum 35 a si ah Shelah kha a ngei.
13 Shelah a ngeih hnuah Arpaksad cu kum 403 a nung rih i fapa le fanu dang zong a ngeih hna.
14 Shelah cu kum 30 a si ah Eber kha a ngei.
15 Eber a ngeih hnuah Shelah cu kum 403 a nung rih i fapa le fanu dang zong a ngeih hna.
16 Eber cu kum 34 a si ah Peleg kha a ngei.
17 Peleg a ngeih hnuah Eber cu kum 430 a nung rih i fapa le fanu dang zong a ngeih hna.
18 Peleg cu kum 30 a si ah Reu kha a ngei.
19 Reu a ngeih hnuah Peleg cu kum 209 a nung rih i fapa le fanu dang zong a ngeih hna.
20 Reu cu kum 32 a si ah Serug kha a ngei.
21 Serug a ngeih hnuah Reu cu kum 207 a nung rih i fapa le fanu dang zong a ngeih hna.
22 Serug cu kum 30 a si ah Nahor kha a ngei.
23 Nahor a ngeih hnuah Serug cu kum 200 a nung rih i fapa le fanu dang zong a ngeih hna.
24 Nahor cu kum 29 a si ah Terah kha a ngei.
25 Terah a ngeih hnuah Nahor cu kum 119 a nung rih i fapa le fanu dang zong a ngeih hna.
26 Terah cu kum 70 a si hnuah fapale a ngeih hna. Annih cu Abram, Nahor le Haran an si.
27 Hihi Terah tefa cu an si.
Terah fapale cu Abram, Nahor le Haran an si. Haran cu Lot pa a si.
28 Haran cu a pa Terah a nun lioah a chuahkehnak Khaldia ram, Ur khua ah a thi.
29 Abram le Nahor cu nupi an ngei. Abram nupi min cu Sarai a si i Nahor nupi min cu Milkah a si. Milkah le Iskah cu Haran fanule an si.
30 Sarai cu a cing i fa a ngei lo.
31 Terah nih a fapa Abram, a tupa Lot (Haran fapa) le a monu Sarai (a fapa Abram nupi) kha Khaldia ram, Ur khua in Kanaan ram lei ah a kalpi hna. Haran khua an phanh tikah cuka ah khua an sa.
32 Terah cu kum 205 a si ah Haran khua ah a thi.
Footnotes
^ A sullam “I Tuai-urnak.”
