Genesis 41:1-57
41 Kum hnih a rauh hnuah Faraoh nih mang a manh i a mang ah cun Nile Tivakam ah a dir.
2 Tiva chung cun a thau i a milmi caw pasarih an hung chuak i Nile Tivakam hramh kha an ei.
3 Cun a mui a chia i a dermi, a dang caw pasarih zong Nile Tiva chung in an hung chuak i Nile Tivakam ah a ummi, a thaumi caw pasarih pawng ah cun an dir.
4 A mui a chia i a dermi caw nih cun a thau i a milmi caw pasarih kha an ei hna. Mah lioah Faraoh cu a hun i hlau.
5 Cun aa hngilh ṭhan i mang a manh ṭhan. A mang ah cun rawl kung pakhat chung in favui pasarih an hung chuak i a fang in an khat.
6 Cun a dang favui pasarih an hung chuak ṭhan, cu hna cu an daa i nichuahlei thli ruang ah thlep selsul in an um.
7 A daami favui nih a fang in a khatmi favui pasarih kha an dolh hna. Mah lioah Faraoh cu a hun i hlau i a mang a simi kha a hngalh.
8 A thaizing ah Faraoh cu lung sivang in a um. Cucaah Izipt ram chung i camhthiam pawl le mifim vialte kha a auh hna i Faraoh nih a mang kong cu a chimh hna. Asinain a mang sullam a lehpiak khotu ahohmanh an um lo.
9 Cu tikah hrai putu bawi nih Faraoh kha hitin a ti: “Nihin ah ka sualnak kaa phuang lai.
10 Faraoh, nang cu na salpa keimah le changreu sertu bawi cung ah na thin a rak hung. Cucaah runvengtu bawi inn i thong ah na rak kan thlak.
11 Zankhat cu mang kan manh veve i kan mang cu sullam a ngei veve.
12 Kan sinah runvengtu bawi i a sal, Hebru tlangval pa pakhat a um ve. Amah cu kan mang kong kha kan chimh tikah kan mang sullam kha a kan lehpiak.
13 A kan lehpiak ning tein a hung si taktak. Kei cu ka hmun ah chiah ṭhan ka si i changreu sertu bawi tu cu thlai a si.”
14 Cucaah Faraoh nih Josef cu a auhter hna i thong chung khan khulrang in an chuah. Josef cu a sam le a khahmul aa meh i a thil aa thleng, cun Faraoh sinah a lut.
15 Mah tikah Faraoh nih Josef cu “Mang ka manh, asinain a sullam a ka lehpiak khotu ahohmanh an um lo. Nangmah nih mang sullam na leh khawh tiah an ka chimh” a ti.
16 Josef nih cun “Faraoh, na lung a tling dingmi mang sullam a let khotu cu Pathian a si! Keimah ka si lo” tiah a ti.
17 Faraoh nih Josef cu hitin a ti: “Ka mang ah Nile Tivakam ah ka dir.
18 Tiva chung in a thau i a milmi caw pasarih an hung chuak i Nile Tivakam hramh kha an ei.
19 Cun a mui a chia i a dermi, a dang caw pasarih zong Nile Tiva chung in an hung chuak. Cu bantuk a mui a chiami caw kha Izipt ram pumpi ah ka hmu bal lo.
20 A mui a chia i a dermi caw nih cun a thau i a milmi caw pasarih kha an ei hna.
21 Asinain an ei hna hnu zong ah a hlan bantuk in an der i an mui a chia ṭhiamṭhiam. Cucaah ahohmanh nih an ei hna ti awk an hngal lo. Mah lioah ka hun i hlau.
22 “Mah hnuah ka mang ah rawl kung pakhat chung in favui pasarih an hung chuak i a fang in an khahmi kha ka hmuh.
23 Cun a dang favui pasarih an hung chuak ṭhan, cu hna cu an daa i nichuahlei thli ruang ah thlep selsul in an um.
24 A daami favui nih a fang in a khatmi favui pasarih kha an dolh hna. Cucaah ka mang cu camhthiam pawl ka chimh hna nain a ka lehpiak khotu ahohmanh an um lo.”
25 Cu tikah Josef nih Faraoh kha hitin a ti: “Na mang cu an sullam aa khat ko. A hmaanmi Pathian nih a tuah dingmi kha aan chimhmi a si.
26 A thaumi caw pasarih cu kum sarih a si. Cu bantuk in favui ṭha pasarih zong kum sarih a si. Na mang an sullam cu aa khat.
27 A hnuah a hung chuakmi a der i a mui a chiami caw pasarih cu kum sarih a si, cu bantuk in a daa i nichuahlei thli ruang ah thlep selsul in a ummi favui pasarih zong kum sarih a si. Mah cu mangṭam kum sarih a tlung lai tinak a si.
28 Kaan chimh cang bantuk in a hmaanmi Pathian nih a tuah dingmi kong kha aan hngalhtermi a si.
29 “Izipt ram ah kum sarih chung rawl tampi a vui lai.
30 Mah hnuah mangṭam kum sarih a tlung lai, Izipt ram ah rawl a rak tam lio caan cu philh dih cikcek a si lai. Mangṭam nih ram cu a hrawh dih lai.
31 Mangṭam cu a fah tuk hringhran lai caah ram chung ah rawl tampi a rak vui balmi kha ahohmanh nih an i cinken ti lai lo.
32 A hmaanmi Pathian nih cutin tuah awkah fek tein bia a khiah cang caah mang voi hnih aan peknak a si. A hmaanmi Pathian nih a rauhhlan ah cutin a tuah lai.
33 “Cucaah thleidan thiamnak a ngeimi le a fimmi pa pakhat kha kawl law Izipt ram kha tlangtlakter.
34 Rawl tampi a vui kum, kum sarih chung ah hin Izipt ram in a chuakmi vialte i cheunga cheukhat kha pumh awkah hi ram chung ah hin zohkhenhtu kha thim hna.
35 Cun annih nih a ra laimi rawl tampi a vui kum chung ah rawl vialte kha pum hna seh. Cun nangmah nawl peknak ning in khuapi chung ah rawl kha khong hna seh law cawng hna seh.
36 Cu rawl thawng cun a ra laimi mangṭam kum, kum sarih chung ah Izipt ram ah rawl a za in a um lai. Cuticun mangṭam nih hi ram hi a hrawk lai lo.”
37 Mah ruahnak cheuhnak cu Faraoh le a bawile vialte zong an hna a tla.
38 Cucaah Faraoh nih a bawile kha “Hi pa bantuk hin Pathian thlarau nih a umpimi midang ahodah kan hmuh khawh ti lai?” tiah a ti hna.
39 Faraoh nih Josef cu “Hi thil vialte hi Pathian nih aan hngalhtermi a si caah nangmah bantuk in thleidan thiamnak a ngeimi le a fimmi ahohmanh an um lo.
40 Nangmah cu ka inn zohkhenhtu na si lai, ka mi vialte nih na bia kha an ngaih dih lai. Siangpahrang ka sinak lawnglawng hi nangmah nakin ka ngan deuhnak cu a si lai.
41 Nangmah cu Izipt ram vialte uktu bawi ah kaan chiah” tiah a ti.
42 Faraoh nih a minkhenhnak kutdong hrolh kha a phoih i Josef kut ah a hrolh, khiangraang puan kha a aihter i a hngawng ah sui ṭhi a awih.
43 Mah leng ah siangpahrang rangleng pahnihnak kha a citter i a hmaiah “A·vrékh!”* tiah a auter hna. Cuticun Josef cu Izipt ram pumpi uktu bawi ah a chiah.
44 Cun Faraoh nih Josef kha “Keimah cu Faraoh ka si ko nain nangmah nawl peknak loin cun Izipt ram pumpi ah ahohmanh nih zei thil hmanh an tuah lai lo” tiah a ti chap.
45 A hnuah Faraoh nih Josef kha Zafenath-paneah tiah min a sak i On* khua tlangbawi Potifera fanu Asenath kha nupi ah a ṭhitpiak. Cun Josef nih Izipt ram kha a hun tlangtlak.
46 Josef cu Izipt siangpahrang Faraoh caah rian ṭuan hram aa thawk ah kum 30 a si.
Josef cu Faraoh hmai khan a chuak i Izipt ram pumpi kha a cul.
47 Rawl tampi a vui kum, kum sarih chung ah ram chung ah rawl tampi a chuak.
48 Izipt ram ah rawl tampi a vui kum, kum sarih chung ah Josef nih rawl vialte cu a pumh hna i khuapi ah a khon hna. Khuapi kip cio ah an pawngkam lo in a chuakmi rawl kha a khon hna.
49 Josef nih rawl a khonmi cu a tam tuk hringhran i rilikam thetse bantuk a si. A donghnak ah cun rel cawk a si ti lo caah a rel hmanh an rel ti lo.
50 Mangṭam a tlun hlanah khan Josef nih On khua tlangbawi Potifera fanu Asenath he fapa pahnih a ngeih hna.
51 Josef nih a fater cu Manasseh* tiah min a sak, zeicahtiah “Pathian nih ka harnak vialte le ka pa inn kha a ka philhter cang” tiah a ti.
52 A fapa pahnihnak cu Efraim* tiah min a sak, zeicahtiah “Pathian nih harnak ka innak ram ah tefa a ka ngeihter” tiah a ti.
53 Cuticun Izipt ram ah rawl tampi a vui kum, kum sarih cu a hung dih.
54 Josef nih a chim bantuk in mangṭam kum, kum sarih cu a hun i thawk. Ram kip ah mangṭam a tlung, asinain Izipt ram ah cun rawl a um.
55 A donghnak ah Izipt ram zong ah mangṭam cu a hung tlung i mipi nih Faraoh kha rawl kan pe tiah an nawl. Mah tikah Faraoh nih “Josef sinah va kal u law aan chimhmi hna ning in va tuah u” tiah a ti hna.
56 Mangṭam cu vawleicung pumpi ah a tlung. Mangṭam cu a fah tuk caah Josef nih rawl khonnak inn vialte kha a hun i rawl cu Izipt mi hna sinah a zuar.
57 Vawleicung pumpi ah mangṭam cu a fah tuk hringhran caah vawleicung khuazakip in mi hna cu Josef sin rawl cawk ding in Izipt ram ah an ra.
