Genesis 47:1-31
47 Cucaah Josef cu Faraoh sinah a va kal i “Ka pa le ka unau pawl cu an tuurun, an saṭilrun le an ngeihmi thil vialte he Kanaan ram in an rak phan cang i atu Goshen ram ah an um ko” tiah thawng a va thanh.
2 A unau panga kha aa kalpi hna i Faraoh hmaiah a chuahpi hna.
3 Faraoh nih cun “Zei rian dah nan ṭuan?” tiah a hal hna tikah annih nih “Bawipa, kannih cu kan pupa hna bantuk in tuukhal kan si” tiah an ti.
4 “Kanaan ram ah mangṭam a fah tuk caah kan tuurun ei awk zeihmanh a um lo. Cucaah hika ah ramdang mi in um awkah kan ratmi a si. Goshen ram ah hin rak kan umter ko” tiah an nawl.
5 Mah tikah Faraoh nih Josef cu “Na pa le na unau pawl cu hika ah na sinah an rak phan cang.
6 Izipt ram cu na kut chung ah a um ko cu ta. Na pa le na unau hna kha a ṭhat biknak hmun ah umter hna. Goshen ram chung ah hin um hna seh law an lakah thil a ti khomi na hngalh hna ahcun ka saṭil zohkhenhtu ah chia hna” tiah a ti.
7 Josef nih a pa Jakob kha a kalpi i Faraoh hmaiah a chuahpi. Cun Jakob nih Faraoh cu thluachuah a pek.
8 Faraoh nih cun Jakob kha “Kum zeizat dah na si cang?” tiah a hal.
9 Jakob nih “Kum 130 ka si cang i ka nun chung vialte ka vakvai. Hi kum hna hi a har tukmi kum an si. Asinain ka pupa hna an vahvaih kum he tahchunh ahcun tlawmpal te lawng a si rih ko” tiah a leh.
10 Cun Jakob nih Faraoh cu thluachuah a pek i a sinin a chuak.
11 Josef nih a pa le a unau pawl kha Faraoh nih nawl a pek bang in Izipt ram i a ṭhat biknak hmun Rameses ram ah a umter hna.
12 Josef nih cun a pa le a unau pawl le a pa innchungkhar mi vialte kha an fale an milu ning cio in rawl a pek hna.
13 Mangṭam cu a fah tuk hringhran caah ram chung ah rawl a um ti lo. Izipt mi le Kanaan mi cu mangṭam ruang ah an har ngaingai.
14 Josef nih Izipt mi le Kanaan mi nih rawl an cawknak tangka vialte kha a khawmh dih i Faraoh inn ah cun a chiah.
15 Izipt ram le Kanaan ram tangka cu a dih tikah Izipt mi vialte cu Josef sinah an ra i “Zaangfahnak in rawl rak kan pe ko. Tangka kan ngeih lo ruang men ah maw na hmaika ah rawlṭam in kan thih ko lai?” tiah an ti.
16 Mah tikah Josef nih cun “Nan tangka a dih ahcun nan saṭil rak pu u. Nan saṭil kha rawl in kaan thlen hna lai” tiah a ti hna.
17 Cucaah an saṭil cu Josef sinah an rak put. Josef nih an rang, an tuurun, an saṭilrun le an laa kha rawl in a thlen hna. Cuticun cu kum chung ah an saṭil vialte kha rawl in a thlen hna i a bawmh hna.
18 Cu kum cu a dih i a hmai kum ah mi cu Josef sinah an ra ṭhan i “Bawipa, kan tangka le kan saṭil cu nangmah kan in pek dih cang ti kha na hngalh ko. Kan pum le kan vawlei dah ti lo cun nangmah pek awk zeihmanh a taang ti lo.
19 Zeicah na hmaika ah pawṭam in kan thih lai i kan vawlei cu a lohlak lai? Kanmah he, kan vawlei he rak kan caw law rawl in rak kan thleng. Cuticun kannih cu Faraoh sal kan si lai i kan vawlei cu amah ta a si lai. Kan thih nakhnga lo le kan vawlei a lohlak nakhnga lo thlaici rak kan pe” tiah an ti.
20 Mangṭam cu a fah tuk hringhran caah Izipt mi vialte nih an vawlei kha an zuar cio i Josef nih Faraoh caah a cawk dih. Cuticun an vawlei vialte cu Faraoh ta a hung si.
21 Josef nih Izipt ram khuazakip ah a ummi hna kha khuapi lei ah a ṭhialter hna.
22 Josef nih a cawk lomi cu tlangbawi pawl vawlei lawnglawng kha a si. Tlangbawi pawl cu Faraoh sinin rawl an hmuh caah an lo cu zuar a hau lo.
23 Josef nih cun “Nihin ah nanmah he, nan vawlei he Faraoh caah kaan cawk cang hna. Lo i tuh awkah hika ah thlaici i lak u.
24 Rawl ṭuan caan a phanh tikah cheunga cheukhat kha Faraoh nan pek lai. A dang cheuli kha cu nanmah caah a si lai i lo ah tuh awk thlaici caah le nanmah le nan innchungkhar le nan fale ei awk caah a si lai” tiah a ti hna.
25 Annih nih “Bawipa, kan nunnak kha na kan khamh cang, na mithmai ṭha hmu ko u sih law kannih cu Faraoh sal kan si ko lai” tiah an ti.
26 Mah tikah Josef nih phung pakhat a chuah, mah cu Izipt ram ah a chuakmi rawl cheunga cheukhat cu Faraoh ta a si lai timi a si. Cu phung cu nihin ni tiang a hmun. Tlangbawi pawl ngeihmi vawlei lawnglawng kha Faraoh ta ah a cang lo.
27 Israel cu Izipt ram, Goshen ah a um. Cuka ah khua an sa, tefa an ngei i an hung karh.
28 Jakob cu Izipt ram ah kum 17 chung a nung rih i atu ah kum 147 a si cang.
29 Israel nih sau ka nung ti lai lo ti a hngalh tikah a fapa Josef kha a auh i “Na mithmai ṭha ka hmuh ahcun ka phei tang ah na kut kha chia law ka cung ah a fekmi dawtnak le zumhawktlak sinak langhter awkah chiatserh in bia i kam. Izipt ram ah cun rak ka vui hlah.
30 Ka thih tikah Izipt ram in rak ka chuahpi law ka pupa hna thlan ah rak ka vui” tiah a ti. Josef nih cun “Na chim bang in ka tuah lai” tiah a ti.
31 Jakob nih “Chiatserh in bia i kam” tiah a ti i Josef cu chiatserh in bia aa kam. Cun Israel cu a ihkhun lulei hoih in Pathian hmaiah a kun.
