Genesis 49:1-33
49 Jakob nih a fapale cu a auh hna i “Hmunkhat ah i pum u law hmailei ah zeidah nan ton lai ti kha kaan chimh hna lai.
2 Jakob fapale hna, i pum u law nan pa Israel bia hi ngai tuah u.
3 “Reuben, nang cu ka fater, ka ṭhawnnak le ka thazaang theitlai hmasa bik na si, hmaizah bikmi le a ṭhawng bikmi na si.
4 Asinain nang cu uk khawh lomi tilian bantuk na si i na pa ihkhun cung ah na kai. Cucaah nang cu na unau hna nakin na ngan deuh lai lo. Mah lioah ka ihnak kha na thurter. Anih cu ka ihkhun cung ah a kai taktak ko!
5 “Simeon le Levi cu unau an si. An hriamnam kha zaangennak caah an hman.
6 An thin a hun tikah mi kha an thah hna i an i nuamhnak men ah cawtum kha an tha an phelh hna. Cucaah an sinah kaa tel lai lo i an i pumhnak ah ka um lai lo.
7 Ṭih a nungmi an thinhunnak le a puarhrangmi an thinlinhnak cu chiatserh si ko seh. Jakob ram chung ah ka ṭhek dih hna lai i Israel ram ah ka ṭhen dih hna lai.
8 “Judah, nang cu na unau hna nih an in thangṭhat lai. Na ral kha an hngawng in na tlaih hna lai. Na pa fapale cu na hmaiah an kun lai.
9 Judah cu chiandeih fano a si. Ka fapa, nang cu na sa sehmi kha na ei lai i na tho ṭhan lai. Anih cu chiandeih bantuk in a bawk i aa samh, chiandeih cu aho nih dah a thawh ngam lai?
10 Shiloh* a rat hlan tiang bawifung cu Judah sinin aa ṭhial lai lo i uktu ṭhiangṭhunh cu a ke karlak ah a um peng lai. Cun Shiloh cu mi nih a nawl an ngaih lai.
11 A laa kha mitsur ruang ah le a laa no kha a ṭha bikmi mitsur ruang ah a hren lai. A thilpuan kha mitsur zu ah le a puan kha a sen in a senmi mitsur hang ah a suk lai.
12 A mit cu mitsur zu ruang ah sen tertur in a um lai i a ha cu cawhnuk ruang ah var vervur in a um lai.
13 “Zebulun cu rilikam ah, tilawng an i dinhnak rilikam ah khua a sa lai i a ramri cu Sidon tiang a kau lai.
14 “Issakhar cu a ruh a fekmi laa a si, thiltom pahnih a phorh buin a bawk.
15 Aa dinhnak hmun cu a ṭha ti le a ram cu a nuam ti kha a hmuh lai. Thilrit kha lungtho tein a phorh lai i rianhrang a ṭuan lai.
16 “Israel miphun phun khat a simi Dan nih a mi kha bia a ceih hna lai.
17 Dan cu lam pawng ah a ummi rul, rang aa cittu kha hnulei ah ngal ko in a tlak nakhnga rang ke a cumi, ki ngeimi rul bantuk si ko seh.
18 Maw Jehovah, na khamhnak kha ka hngah lai.
19 “Gad cu damiah nih an doh lai, asinain amah nih a dawi hna lai i a doh ṭhan hna lai.
20 “Asher cu rawl tampi a ngei lai i siangpahrang caah aa tlakmi rawl kha a pek lai.
21 “Naftali cu aa dawhmi sazuk a si. Anih cu bia dawhdawh a chimmi a si.
22 “Josef cu cerhti kam ah a khomi, thei a tlaimi thingkung nge a si. A ṭengnge nih vanpang an lonh.
23 Asinain thal kah thiam hna nih an huat i hna an hnawh lengmang, cun thal in an kah.
24 Asinain Josef nih a thal cu fek tein aa tlaih, a kut cu a ṭhawng i a rang. Mah cu Jakob a bawmtu a ṭhawngmi tuukhal le Israel lungpi thawng in a si.
25 Josef cu ka pa Pathian sinin a rami laksawng a si. Anih cu A Ṭhawng Bik Pathian nih a umpi lai i a bawmh lai. Cunglei thluachuah le tanglei thluachuah a pek lai i tefa le saṭil tampi a pek lai.
26 Na pa thluachuah cu zungzal in a hmunmi tlang hna le zungzal in a hmunmi fing le tlang an i dawhnak thluachuah nakin a ṭha deuh lai. Mah thluachuah cu a unau hna lakin thim a simi, Josef lu cung ah a hmun zungzal lai.
27 “Benjamin cu cenghngia bantuk in a sehmi sa kha a thlehbaoh lai. Zinglei ah a sehmi sa kha a ei lai i zanlei ah hranchaw a lakmi kha a ṭhen lai.”
28 Hi hna hi Israel phun 12 cu an si, an pa Jakob nih thluachuah a pek hna lioah a chimmi bia a si. Pakhat cio kha anmah he aa tlakmi thluachuah a pek hna.
29 Mah hnuah hitin bia a cahtak hna: “Kei cu ka phunhawi hna sinah pumh ka si cang lai.* Hit mi, Efron lo i a ummi lungkua ah ka pupa hna sinah rak ka vui te u.
30 Mah lungkua cu Kanaan ram, Mamre hmai i Makpelah lo ah a ummi a si. Mah lo cu Abraham nih Hit mi, Efron sinin vuinak hmun caah a cawkmi a si.
31 Cuka ah Abraham le a nupi Sarah, Isak le a nupi Rebekah kha an vui hna. Leah zong cuka ah cun ka vui ve.
32 Mah lo le lungkua cu Heth fapale sinin cawkmi a si.”
33 Jakob nih a fapale kha bia a cah hna hnuah a ke kha ihkhun cung ah a chuan i hmanung bik a thaw a chuah, cun a phunhawi hna sinah pumh a si.
