Genesis 20:1-18
-
Sarah cu Abimelek sinin khamh a si (1-18)
20 Abraham cu a thlam in Negeb ram lei ah aa ṭhial i Kadesh le Shur karlak ah khua a sa. Gerar a um lioah,
2 Abraham nih a nupi Sarah cu “Ka far a si” tiah a ti ṭhan. Cucaah Gerar siangpahrang Abimelek nih a salle kha a thlah hna i Sarah cu a sinah an ratpi.
3 Zan a phak tikah Abimelek cu Pathian nih a mang ah “Na lakmi nu ruang ah na thi lai, zeicahtiah anih cu va a ngei cangmi a si” tiah a ti.
4 Asinain Abimelek nih Sarah kha a tawngh hmanh a tawng rih lo. Cucaah Abimelek nih “Jehovah, sualnak a ngei lomi miphun hi na hrawh ko lai maw?
5 Amah nih pei ‘Ka far a si’ a ti i nu zong nih ‘Ka ṭa a si’ tiah a ti cu. Mah hihi lungthiang tein ka tuahmi a si i zeihmanh ka palhnak a um lo” tiah a ti.
6 Mah tikah a hmaanmi Pathian nih a mang ah cun “Lungthiang tein na tuahmi a si ti kha ka hngalh ko. Cucaah ka cung ah sualnak na tuah nakhnga lo kaan thlauh i minu kha a tawngh hmanh kaan tawnghter lomi a si.
7 Atu minu cu a va sinah kirter ṭhan. A va cu profet a si caah thla aan campiak lai i na nung ko lai. Na kirter ṭhan lo ahcun nangmah le na mi vialte cu nan thi hrimhrim lai” tiah a ti.
8 Abimelek cu zingka tein a tho i a salle vialte kha a auh hna. Cun a konglam vialte kha a chimh hna tikah an ṭih tuk.
9 Abimelek nih Abraham cu a auh i “Zeicah hi bantuk thil hi kan cung ah na tuah? Na cung ah zei sualnak dah ka tuah i keimah le ka pennak cung ah hi bantuk sualnak ngan hi na tlunter hnik? Ka cung ah na tuahmi thil hi a dik lo” tiah a ti.
10 Abimelek nih “Zei ruang ah dah mah thil hi na tuah?” tiah a ti.
11 Abraham nih hitin a ti: “‘Hika ah Pathian a ṭihmi ahohmanh an um lo i ka nupi ruang ah an ka thah lai’ tiah ka ruah caah a si.
12 Mah leng ah anih cu ka far a si taktak ko. Pa khat, nu dang kan si i a hnuah ka ṭhit.
13 Pathian nih ka pa inn in a ka kalter tikah Sarah kha ‘Ka cung ah a fekmi dawtnak langhter awkah kan kalnak hmun paoh ah “Ka ṭa a si” na ti lai’ tiah ka ti.”
14 Mah hnuah Abimelek nih Abraham cu tuu, cawrun le salnu, salpa hna kha a pek. Cun a nupi Sarah zong a pek ṭhan.
15 Abimelek nih “Ka ram chung ah na duhnak hmun paoh ah na um kho” ti zong in a ti.
16 Cun Sarah kha “Na ṭa cu ngun phar 1,000 ka pek cang. Mah hihi na sinah a ummi vialte le mi vialte hmaiah a thiangmi na si ti langhternak caah a si. Nang cu soisel awk a um lomi na si” tiah a ti.
17 Abraham nih a hmaanmi Pathian sinah thla a campiak i Pathian nih Abimelek le a nupi le a salnule cu a damter hna i fa an ngei kho ṭhan.
18 Zeicahtiah Abraham nupi Sarah ruang ah Jehovah nih Abimelek innchungkhar i nu vialte kha fa ngei kho loin a tuah hna.
