An Ikaduha nga Libro ni Samuel 2:1-32
2 Katapos hito hi David nagpakiana kan Jehova,+ nga nasiring: “Sadang ba ako sumagka ngadto ha usa han mga syudad han Juda?” Hi Jehova binaton ha iya: “Sagka.” Katapos, hi David nagpakiana: “Diin ako makadto?” Binaton hiya: “Ha Hebron.”+
2 Salit hi David sinagka ngadto upod an iya duha nga asawa, hi Ahinoam+ nga taga-Jezreel ngan hi Abigail+ nga balo ni Nabal nga taga-Carmel.
3 Igin-upod liwat ni David an mga lalaki nga kaupod niya,+ an tagsa ha ira upod an iya panimalay, ngan inukoy hira ha mga syudad ha palibot han Hebron.
4 Katapos, an kalalakin-an han Juda inabot, ngan didto ira gindihogan hi David sugad nga hadi ha panimalay ni Juda.+
Nagsiring hira kan David: “An kalalakin-an han Jabes-gilead an naglubong kan Saul.”
5 Salit nagsugo hi David hin mga mensahero ngadto ha kalalakin-an han Jabes-gilead ngan nagsiring ha ira: “Hinaot bendisyonan kamo ni Jehova, kay nagpakita kamo hin maunungon nga gugma ha iyo ginoo nga hi Saul pinaagi ha paglubong ha iya.+
6 Hinaot magpakita hi Jehova hin maunungon nga gugma ngan pagkamatinumanon ha iyo. Magpapakita liwat ako ha iyo hin pagkabuotan kay ginbuhat niyo ini.+
7 Yana magin makusog unta an iyo mga kamot ngan magin maisugon kamo nga mga lalaki, kay patay na an iyo ginoo nga hi Saul, ngan an panimalay ni Juda nagdihog ha akon sugad nga ira hadi.”
8 Kondi ginkuha ni Abner+ nga anak ni Ner, nga lider han kasundalohan ni Saul, an anak nga lalaki ni Saul nga hi Is-boset+ ngan gindara hiya pagtabok ngadto ha Mahanaim+
9 ngan ginhimo hiya nga hadi han Gilead,+ han mga Asurita, han Jezreel,+ han Efraim,+ han Benjamin, ngan han bug-os nga Israel.
10 Hi Is-boset nga anak ni Saul 40 anyos han nagin hadi hiya han Israel, ngan naghadi hiya hin duha ka tuig. Kondi an panimalay ni Juda sinuporta kan David.+
11 An kaihaon* han paghadi ni David ha Hebron ha panimalay ni Juda pito ka tuig ngan unom ka bulan.+
12 Paglabay han panahon, hi Abner nga anak ni Ner ngan an mga surugoon ni Is-boset, nga anak ni Saul, ginawas ha Mahanaim+ ngan kinadto ha Gibeon.+
13 Hi Joab+ nga anak nga lalaki ni Zeruias+ ngan an mga surugoon ni David ginawas liwat ngan gintapo hira ha tirokan han tubig han Gibeon; ngan an usa nga grupo nanlingkod dinhi hini nga ligid han tirokan han tubig, ngan an usa pa nga grupo didto ha luyo nga ligid han tirokan han tubig.
14 Ha urhi, hi Abner nagsiring kan Joab: “Patindugon naton an batan-on nga mga lalaki ngan papag-awayon* hira ha atubangan naton.” Binaton hi Joab: “Sige, patindugon naton hira.”
15 Salit nanindog hira ngan tinabok sumala ha ira kadamu, 12 para ha Benjamin ngan kan Is-boset nga anak ni Saul ngan 12 tikang ha mga surugoon ni David.
16 Ginkaptan han kada tagsa an ulo han iya kakontra ngan nagbunoay hira ha kagiliran gamit an ira espada, ngan hira ngatanan parapriho nagkamatay. Salit ito nga lugar, nga nahimumutang ha Gibeon, gintawag nga Helkat-hazurim.
17 Nagresulta ito hin makangingirhat gud nga girra hito nga adlaw, ngan ha kataposan hi Abner ngan an kalalakin-an han Israel napirde ha atubangan han mga surugoon ni David.
18 Hito nga adlaw nakadto an tulo nga anak nga lalaki ni Zeruias+—hira Joab,+ Abisai,+ ngan Asahel;+ ngan hi Asahel malaksi dumalagan pariho hin gasela ha kapatagan.
19 Ginlanat ni Asahel hi Abner, ngan waray hiya sumimang ha too o ha wala ha iya paglanat kan Abner.
20 Han liningi hi Abner ha luyo, nagpakiana hiya, “Ikaw ba ito, Asahel?” ngan binaton hi Asahel, “Oo, ako ini.”
21 Katapos, hi Abner nagsiring ha iya: “Simang ha imo too o ha imo wala ngan dakpa an usa han batan-on nga mga lalaki, ngan kuhaa para ha imo kalugaringon an anoman nga mahuhukas mo ha iya.” Kondi hi Asahel nadiri pag-undang ha paglanat ha iya.
22 Salit hi Abner nagsiring kan Asahel hin makausa pa: “Undang na ha paglanat ha akon. Kay ano man nga papatayon ko ikaw? Paonan-o ko aatubangon an imo bugto nga hi Joab?”
23 Kondi padayon nga nagdumiri hiya pag-undang, salit ginbuno hiya ni Abner ha tiyan pinaagi han kataposan han karaptan han bangkaw,+ ngan an bangkaw linapos ha iya likod; ngan natumba hiya didto ngan namatay didto mismo. An ngatanan nga nalabay ha lugar diin natumba ngan namatay hi Asahel naundang didto nga natitigdaan.
24 Katapos, ginlanat nira Joab ngan Abisai hi Abner. Samtang natutunod an adlaw, inabot hira ha bungtod han Ama, nga naatubang ha Gia ha dalan tipakadto ha kamingawan han Gibeon.
25 Ngan an mga Benjaminita nagtirirok ha luyo ni Abner, ngan nagporma hira hin usa nga grupo ngan nanindog ha bawbaw han usa nga bungtod.
26 Katapos, hi Abner ginuliat kan Joab: “Waray na ba kataposan an paglamoy han espada? Diri ka ba maaram nga magriresulta la ini hin kapaitan? Salit san-o mo pa sisidngan an katawohan nga umundang na ha paglanat ha ira kabugtoan?”
27 Tungod hito hi Joab nagsiring: “Sugad nga buhi an tinuod nga Dios,* kon waray ka magyakan, ha aga na unta maundang an katawohan ha paglanat ha ira kabugtoan.”
28 Katapos, ginhuypan ni Joab an sungay, ngan an iya mga tawo inundang ha paglanat ha Israel, ngan inundang an girra.
29 Katapos, hi Abner ngan an iya mga tawo nagbaktas ha Araba+ hiton bug-os nga gab-i ngan tinabok ha Jordan ngan nagbaktas ha bug-os nga pangpang* ngan ha urhi inabot ha Mahanaim.+
30 Pag-undang ni Joab ha paglanat kan Abner, iya gintirok an ngatanan nga katawohan. Ha mga surugoon ni David, 19 an nawawara, labot kan Asahel.
31 Kondi napirde na han mga surugoon ni David an mga Benjaminita ngan an mga tawo ni Abner, ngan 360 han ira mga tawo an namatay.
32 Ira ginkuha hi Asahel+ ngan iginlubong hiya ha lubnganan han iya tatay, nga nahimumutang ha Bethlehem.+ Katapos, hi Joab ngan an iya mga tawo nagbaktas ha bug-os nga gab-i, ngan inabot hira ha Hebron+ ha pagpamanagbanag ha kaagahon.
Mga footnote
^ Lit., “An kadamu han mga adlaw.”
^ O “sugoon nga magkompetisyon.”
^ O posible nga “ha bug-os nga Bitron.”
