An Ikaduha nga Surat ha mga Taga-Corinto 7:1-16

  • Limpyohan an kalugaringon (1)

  • An kalipay ni Pablo tungod han mga taga-Corinto (2-4)

  • Hi Tito may maopay nga sumat (5-7)

  • Kasubo nga uyon ha kaburut-on han Dios ngan pagbasol (8-16)

7  Salit mga hinigugma, tungod kay may-ada kita hini nga mga saad,+ limpyohan naton an aton kalugaringon ha ngatanan nga kahugaw ha unod ngan espiritu,+ basi magin mas baraan kita nga may kahadlok ha Dios.  Tagi kami hin lugar ha iyo kasingkasing.+ Waray kami ginbuhat nga sayop ha bisan hin-o, waray kami makadaot ha bisan hin-o, ngan waray kami magsalingabot ha bisan hin-o basi makabentaha.+  Diri ko ini ginsisiring basi hukman kamo. Kay hadto nagsiring ako nga aadi kamo ha amon kasingkasing basi mamatay nga magkaupod ngan mabuhi nga magkaupod.  May daku nga kagawasan ako ha pagyakan ha iyo. Iginhahambog ko gud kamo. Puno ako hin pagliaw; nagsasap-ay an akon kalipay ha ngatanan nga amon pag-antos.+  Ha pagkamatuod, han inabot kami ha Macedonia,+ an amon mga lawas* waray pakapahuway, kondi padayon nga ginpapaantos kami ha ngatanan nga paagi—may mga pagkontra ha gawas, may mga kahadlok ha sulod.  Pero an Dios, nga nagliliaw ha mga nasusubo,+ nagliaw ha amon pinaagi han presensya ni Tito;  ngan diri la pinaagi han iya presensya kondi pinaagi liwat han pagliaw nga iya nakarawat tungod ha iyo, han iginsumat niya ha amon an iyo kahidlaw ha akon, an iyo duro nga kabido, ngan an iyo sinsero nga kabaraka* para ha akon; salit mas nalipay gud ako.  Kay bisan kon napasubo ko kamo tungod han akon surat,+ diri ko ito ginbabasolan. Bisan kon ha tinikangan ginbasolan ko ito (kay ito nga surat nakapasubo ha iyo, pero madaliay la),  yana nalilipay gud ako, diri tungod kay napasubo la kamo, kondi tungod kay napasubo kamo basi magbasol. Kay napasubo kamo uyon ha kaburut-on han Dios, salit waray kamo mag-antos hin kadaot tungod ha amon. 10  Kay an kasubo nga uyon ha kaburut-on han Dios nagriresulta hin pagbasol nga naggigiya ha katalwasan nga diri pagbabasolan;+ pero an kasubo han kalibotan nagriresulta hin kamatayon. 11  Kay kitaa an mga resulta han iyo pangalimbasog tungod kay napasubo kamo uyon ha kaburut-on han Dios, oo, pagputli ha iyo kalugaringon, oo, kasina tungod han sayop, oo, kahadlok, oo, duro nga hingyap, oo, kadasig, oo, pagtadong han sayop!+ Ha ngatanan nga paagi iginpakita niyo nga putli* kamo may kalabotan hini nga butang. 12  Bisan kon nagsurat ako ha iyo, waray ko ito buhata para ha usa nga nakabuhat han sayop,+ diri liwat para ha ginbuhatan han sayop, lugod basi an iyo maduruto nga pagsunod ha amon makita gud ha butnga niyo ha paniplatan han Dios. 13  Ito an hinungdan nga naliaw kami. Pero labot la nga naliaw kami, mas nalipay gud kami tungod han kalipay ni Tito, kay naparig-on niyo ngatanan an iya espiritu. 14  Kay kon iginhahambog ko kamo ha iya, waray ako mahibutang ha kaarawdan; kondi sugad la nga tinuod an ngatanan nga iginsumat namon ha iyo, sugad man napamatud-an nga tinuod an amon iginhahambog kan Tito. 15  Ngan nagtitikadugang gud an iya malumo nga pagpalangga ha iyo samtang iya gindudumdom an pagkamasinugtanon niyo ngatanan,+ kon paonan-o niyo hiya ginkarawat nga may kahadlok ngan pangurog. 16  Nalilipay gud ako nga ha ngatanan nga paagi may-ada ako kompyansa ha* iyo.

Mga footnote

Lit., “unod.”
Lit., “iyo kadasig.”
O “limpyo; inosente.”
O posible nga “magkaada ako kaisog tungod ha.”