An Ikaduha nga Surat ha mga Taga-Corinto 12:1-21
12 Kinahanglan maghambog ako. Diri ini mapulsanon, pero magpapadayon ako pagsaysay mahitungod han milagroso nga mga bisyon+ ngan mga kapahayagan han Ginoo.+
2 May kilala ako nga tawo nga kahiusa han Kristo, 14 ka tuig na an naglabay—ha lawas man o gawas ha lawas, diri ako maaram; an Dios an maaram—nga tigda nga gindara ha ikatulo nga langit.
3 Oo, kilala ko ito nga tawo—ha lawas man o bulag ha lawas, diri ako maaram; an Dios an maaram—
4 nga tigda nga gindara ha paraiso ngan nakabati han mga pulong nga diri mahimo yaknon ngan diri uyon ha balaud nga yaknon han tawo.
5 Ighahambog ko ito nga tawo, pero diri ko ighahambog an akon kalugaringon labot la han akon mga kaluyahan.
6 Kay bisan kon karuyag ko maghambog, diri ako magigin diri makatadunganon kay igsusumat ko an kamatuoran. Pero diri ko ito ginbubuhat, basi waray magdayaw ha akon hin labaw han iya nakikita ha akon o nababatian ha akon,
7 tungod la han pakakarawat hito nga urusahon nga mga kapahayagan.
Basi diri ako sobra nga magpahitaas, gintagan ako hin tunok ha unod,+ usa nga anghel ni Satanas, nga padayon nga nagtatampalo* ha akon, basi diri ako sobra nga magpahitaas.
8 Tulo ka beses nga nakimalooy ako ha Ginoo mahitungod hini, nga mawara ito ha akon.
9 Pero nagsiring hiya ha akon: “Igo na an akon diri matupngan nga pagkabuotan para ha imo, kay an akon gahum nagigin perpekto ha maluya.”+ Salit malipayon gud nga ighahambog ko an akon mga kaluyahan, basi an gahum han Kristo magpabilin ha bawbaw nakon pariho hin tolda.
10 Tungod hito, nalilipay ako ha mga kaluyahan, ha mga pag-insulto, ha mga panahon han panginahanglan, ha mga pagtimaraot ngan mga kakurian, tungod han Kristo. Kay kon ako maluya, makusog lugod ako.+
11 Nagin diri ako makatadunganon. Ginpirit ako niyo nga magin sugad hito, kay angay unta niyo ako igrekomendar. Kay waray ako magin ubos kay ha iyo sobra kaopay nga mga apostol ha bisan usa nga butang, bisan kon waray ako pulos.+
12 Ha pagkamatuod, iginpakita ko ha iyo an mga tigaman han akon pagin apostol nga may daku nga pagpailob,+ ngan pinaagi han mga tigaman ngan urusahon nga mga butang ngan gamhanan nga mga buhat.+
13 Kay paonan-o nagin ubos an pag-uyon ha iyo kay ha iba nga mga kongregasyon, gawas la nga waray ako makapabug-at ha iyo?+ Alayon pasayloa ako niyo hini nga sayop.
14 Kitaa! Ikatulo na ini nga higayon nga andam na ako pagkada ha iyo, ngan diri ako makakapabug-at ha iyo. Kay kamo an akon ginhihingyap, diri an iyo mga gintatag-iya;+ kay an mga anak+ diri ginlalaoman nga magtitirok para ha ira mga kag-anak, kondi an mga kag-anak an magtitirok para ha ira mga anak.
15 Ha akon bahin, malilipay gud ako nga gamiton ngan magamit hin bug-os para ha iyo.*+ Kon hinigugma ko gud kamo, diri ba ako angay higugmaon pariho han akon paghigugma ha iyo?
16 Pero bisan pa hito, waray ako makapabug-at ha iyo.+ Pero nasiring kamo nga “tuso” ako ngan “ginlimbongan” ko kamo.
17 Waray ko salingabota nga makabentaha ha iyo pinaagi han bisan hin-o nga akon ginpakada ha iyo, diri ba?
18 Gin-aghat ko hi Tito nga kumada ha iyo ngan ginpaupdan ko hin bugto. Waray gud magsalingabot hi Tito basi makabentaha ha iyo, diri ba?+ Naglakat kami nga may pariho nga espiritu, diri ba? Nga pariho an mga pitad, diri ba?
19 Ginhinunahuna ba niyo nga gindidepensahan namon an amon kalugaringon ha iyo? Ha atubangan han Dios nagyayakan kami sugad nga kahiusa han Kristo. Pero mga hinigugma, ginbubuhat namon ini ngatanan basi parig-unon kamo.
20 Kay nahahadlok ako nga bangin pag-abot ko, diri na kamo sugad han akon ginlalaoman ngan ako liwat bangin diri na sugad han iyo ginlalaoman, lugod, bangin may araway, pangabugho, mga kasina, diri pagsinabtanay, paglibak, pagtsismis, pagpahitaas, ngan kasamok.
21 Bangin kon kumada liwat ako, pakaalohan ako han akon Dios ha iyo atubangan, ngan mabido ako tungod han damu nga nakasala hadto pero waray magbasol han ira pagkamahugaw ngan seksuwal nga imoralidad* ngan mapasiparahon nga panggawi* nga ira ginbuhat.
