An Ikaduha nga Surat ha mga Taga-Corinto 5:1-21
5 Kay maaram kita nga kon an aton tunan-on nga balay, ini nga tolda, maguba,*+ magkakaada kita hin urukyan tikang ha Dios, usa nga balay nga diri hinimo han mga kamot,+ nga magpapadayon ha waray kataposan ha langit.
2 Kay dinhi hini nga balay* naghaharoy gud kita, sinsero nga naghihingyap ha pagsul-ot han usa nga para ha aton nga* tikang ha langit,*+
3 basi kon isul-ot na naton ito, diri kita hiagian nga hubo.
4 Ha pagkamatuod, kita nga aadi hini nga tolda naghaharoy, nga nabubug-atan, kay diri naton karuyag nga hukason ini, pero karuyag naton isul-ot an usa,+ basi an mortal malamoy han kinabuhi.+
5 Hiya nga nag-andam ha aton para hini mismo nga butang amo an Dios,+ nga naghatag ha aton han espiritu sugad nga garantiya hito nga maabot.*+
6 Salit maisugon gud kita pirme ngan maaram kita nga samtang naukoy kita ha lawas, waray pa kita didto ha Ginoo,+
7 kay naglalakat kita pinaagi ha pagtoo, diri pinaagi ha pagkita.
8 Pero maisugon gud kita ngan mas karuyag gud naton nga diri na umukoy ha lawas basi umukoy kaupod han Ginoo.+
9 Salit naukoy man kita kaupod niya o diri kaupod niya, ginhihimo naton nga tumong nga makarawat an iya pag-uyon.
10 Kay kita ngatanan kinahanglan tumindog* ha atubangan han lingkoran han paghukom han Kristo, basi an kada tagsa balosan uyon ha iya mga ginbuhat samtang aada ha lawas, maopay man o maraot.+
11 Salit tungod kay maaram kami nga kinahanglan kahadlokan an Ginoo, padayon nga ginkukombinse namon an mga tawo, pero kilala gud* kami han Dios. Kondi naglalaom ako nga kilala gud* liwat kami han iyo konsensya.
12 Diri namon ginrirekomendar utro an amon kalugaringon ha iyo lugod gin-aaghat namon kamo nga maghambog mahitungod ha amon, basi makabaton kamo ha mga naghahambog han panggawas nga hitsura+ kondi diri han aada ha kasingkasing.
13 Kay kon waray kami ha husto nga panhunahuna,+ para ito ha Dios; kon maopay an amon panhunahuna, para ito ha iyo.
14 Kay an gugma han Kristo nag-aaghat ha amon, kay ini an amon konklusyon, nga an usa nga tawo namatay para ha ngatanan.+ Tungod ini kay an ngatanan nga tawo namatay.
15 Ngan namatay hiya para ha ngatanan basi an mga buhi diri na mabuhi para ha ira kalugaringon,+ kondi para ha iya nga namatay para ha ira ngan ginbuhi.
16 Salit tikang yana waray kami kilala nga tawo uyon ha panlantaw han tawo.+ Bisan kon nakilala namon an Kristo uyon ha unod, diri na gud sugad hito an amon pagkakilala ha iya.+
17 Salit kon an bisan hin-o kahiusa han Kristo, bag-o hiya nga linarang;+ an daan nga mga butang naglabay na; kitaa! naeksister an bag-o nga mga butang.
18 Pero an ngatanan nga butang tikang ha Dios, nga nagpahiuli ha amon ngadto ha iya pinaagi han Kristo+ ngan naghatag ha amon han ministeryo* han pagpahiuli,+
19 karuyag sidngon nga iginpapahiuli han Dios an usa nga kalibotan ngadto ha iya pinaagi han Kristo,+ nga diri gin-iihap an ira mga pagtalapas kontra ha ira,+ ngan iya igintapod ha amon an mensahe han pagpahiuli.+
20 Salit mga embahador+ kami nga kasaliwan han Kristo,+ nga sugad hin nakikimalooy an Dios pinaagi ha amon. Sugad nga mga kasaliwan han Kristo nakikimalooy kami: “Magpahiuli kamo ha Dios.”
21 An usa nga waray sala,+ iya ginhimo nga magin sala* para ha aton, basi pinaagi ha iya magin katadongan kita han Dios.+
Mga footnote
^ O “matunaw.”
^ O “urukyan.”
^ O “ha pagsul-ot han aton urukyan nga.”
^ O “aton langitnon nga urukyan.”
^ O “patiuna nga bayad (bayad nga kwarta ha pagkompirma han kontrata); karig-onan (kolateral) hito nga maabot.”
^ O “makita.”
^ O “nakikita.”
^ O “nakikita.”
^ O “halad tungod han sala.”
