An Ikaduha nga Surat ha mga Taga-Corinto 4:1-18

  • Kalamrag han maopay nga sumat (1-6)

    • Hunahuna han diri tumuroo ginbuta (4)

  • Bahandi ha surudlan nga lapok (7-18)

4  Salit tungod kay may-ada kami hini nga ministeryo* pinaagi han kalooy nga iginpakita ha amon, diri kami naundang.  Lugod gintalikdan namon an makaarawod, tinago nga mga butang, diri kami nagawi hin tuso o diri namon ginsasalaktan an pulong han Dios;+ kondi pinaagi ha pagpahayag han kamatuoran, iginrirekomendar namon an amon kalugaringon ha tagsa nga konsensya han tawo ha paniplatan han Dios.+  Ha pagkamatuod, kon an maopay nga sumat nga amon iginpapasamwak natatabonan, natatabonan ito dida ha mga nabubungkag,  nga dida ha ira ginbuta han dios hini nga sistema han mga butang*+ an mga hunahuna han mga diri tumuroo,+ basi an kapawa* han mahimayaon nga maopay nga sumat mahitungod han Kristo, nga amo an dagway han Dios,+ diri makasanag.+  Kay nagsasangyaw kami, diri mahitungod ha amon kalugaringon, kondi mahitungod kan Jesu-Kristo sugad nga Ginoo, ngan kami sugad nga iyo mga uripon tungod kan Jesus.  Kay an Dios amo an nagsiring: “Magsanag an kalamrag tikang ha kasisidman,”+ ngan ginsanagan niya an amon kasingkasing basi magin mapawa ito+ han mahimayaon nga kahibaro mahitungod ha Dios pinaagi han nawong han Kristo.  Pero may-ada kami hini nga bahandi+ ha mga surudlan nga hinimo ha lapok,*+ basi ipakita nga an diri ordinaryo nga gahum nagtitikang ha Dios ngan diri tikang ha amon.+  Gin-iipit gud kami ha ngatanan nga paagi, pero diri naghuhuruot nga diri na nakakagios; diri kami maaram han hihimoon, pero diri nga waray na gud magagawsan;*+  gintitimaraot kami, pero diri ginpapabay-an;+ gintutumba kami, pero diri nabubungkag.+ 10  Pirme namon gin-iilob ha amon lawas an makamaratay nga pagtratar nga gin-antos ni Jesus,+ basi an kinabuhi ni Jesus makita liwat ha amon lawas. 11  Kay kami nga nabubuhi pirme naatubang ha kamatayon+ tungod kan Jesus, basi an kinabuhi ni Jesus makita liwat ha amon mortal nga unod. 12  Salit bisan kon naatubang kami hin kamatayon, nagriresulta ito hin kinabuhi para ha iyo. 13  Yana tungod kay may-ada kami pariho nga espiritu han pagtoo sugad han nahisurat: “Nagpakita ako hin pagtoo, salit nagyakan ako”;+ nagpapakita liwat kami hin pagtoo salit nagyayakan kami, 14  kay maaram kami nga Hiya nga nagbuhi kan Jesus magbubuhi liwat ha amon basi makaupod ni Jesus, ngan ipipresentar kami kaupod niyo.+ 15  Kay ini ngatanan nga butang para ha iyo kaopayan, basi an pagdugang han diri matupngan nga pagkabuotan mas mahura pa gud tungod kay damu pa an nagpapasalamat para ha kahimayaan han Dios.+ 16  Salit diri kami naundang, pero bisan kon an amon lawas nagtitikaluya, sigurado nga an amon sulod nga pagkatawo ginbabag-o kada adlaw. 17  Kay bisan kon an kasakitan* temporaryo la ngan magaan, naghahatag ito ha amon hin himaya nga nagigin mas labaw gud* ngan waray kataposan;+ 18  samtang an amon mga mata nakatutok, diri ha mga butang nga nakikita, kondi ha mga butang nga diri nakikita.+ Kay an mga butang nga nakikita temporaryo la, pero an mga butang nga diri nakikita waray kataposan.

Mga footnote

Kitaa an Glossary.
O “hini nga panahon.” Kitaa an Glossary.
O “kalamrag.”
O “ha mga tibod nga hinimo ha lapok.”
O posible nga “diri nga waray na paglaom.”
O “pagsari.”
Lit., “mabug-at.”