An Siyahan nga Surat ha mga Taga-Corinto 8:1-13

  • Pagkaon nga iginhalad ha idolo (1-13)

    • Para ha aton usa la an Dios (5, 6)

8  Yana mahitungod han pagkaon nga iginhalad ha mga idolo:+ Maaram kita nga kita ngatanan may-ada kahibaro.+ An kahibaro nakakapahambog, pero an gugma nakakaparig-on.+  Kon an bisan hin-o naghuhunahuna nga maaram hiya han usa nga butang, diri pa hiya maaram han angay niya hibaroan mahitungod hito.  Pero kon an bisan hin-o nahigugma ha Dios, ini hiya kilala niya.  Yana mahitungod ha pagkaon han karaunon nga iginhalad ha mga idolo, maaram kita nga an usa nga idolo waray pulos+ ha kalibotan, ngan usa la an Dios.+  Kay bisan kon may gintatawag nga mga dios, ha langit man o ha tuna,+ sugad la nga damu an “mga dios” ngan damu an “mga ginoo,”  ha pagkamatuod, usa la an aton Dios,+ an Amay,+ nga ha iya nagtikang an ngatanan nga butang ngan kita para ha iya;+ ngan usa la an Ginoo, hi Jesu-Kristo, nga pinaagi ha iya nahimo an ngatanan nga butang+ ngan kita pinaagi ha iya.  Pero diri ngatanan may-ada hini nga kahibaro.+ Kondi an iba, tungod kay nagsisingba hira hadto ha idolo, nakaon han pagkaon nga sugad hin iginhalad ito ha idolo,+ ngan an ira konsensya, tungod kay maluya, nahuhugawan.+  Kondi an karaunon diri makakapahirani ha aton ha Dios;+ waray nawawara ha aton kon diri kita kumaon, ngan waray liwat nahidudugang ha aton kon kumaon kita.+  Pero padayon nga magbantay nga an iyo katungod ha pagpili diri magin hiparakdolan han mga magluya.+ 10  Kay kon an bisan hin-o makakita ha imo, ikaw nga may kahibaro, nga nakaon ka ha templo han idolo, diri ba an konsensya hito nga tawo nga maluya maaaghat nga kumaon han pagkaon nga iginhalad ha mga idolo? 11  Salit tungod han imo kahibaro nadadaot an tawo nga maluya, an imo bugto nga para ha iya namatay an Kristo.+ 12  Kon makasala kamo ha iyo kabugtoan hini nga paagi ngan makasamad han ira maluya nga konsensya,+ nakakasala kamo ha Kristo. 13  Ito an hinungdan nga kon an pagkaon nakakapakdol* ha akon bugto, diri na gud ako makaon utro hin karne, basi diri ako makapakdol ha akon bugto.+

Mga footnote

Kitaa an “Kahipakdol” ha Glossary.