An Siyahan nga Surat ha mga Taga-Corinto 6:1-20
6 An bisan hin-o ba ha iyo nga may reklamo ha iba+ diri nag-aalang pagkadto ha korte ha atubangan han mga tawo nga diri magtadong, ngan diri ha atubangan han mga baraan?
2 O diri ba kamo maaram nga an mga baraan maghuhukom han kalibotan?+ Ngan kon kamo an maghuhukom han kalibotan, diri ba may kapas kamo ha pagsulbad han gudtiay nga mga butang?
3 Diri ba kamo maaram nga huhukman naton an mga anghel?+ Kon sugad, kay ano nga diri naton masusulbad an mga butang hini nga kinabuhi?
4 Kon may mga butang hini nga kinabuhi nga sadang niyo sulbaron,+ kay ano nga iyo ginpipili nga magin mga hukom niyo an mga lalaki nga diri ginkakarawat han kongregasyon?
5 Nagyayakan ako ha iyo basi maawod kamo. Waray ba bisan usa dida ha iyo nga maaramon nga makakaghukom butnga han iya kabugtoan?
6 Lugod, gindadara han usa nga bugto ngadto ha korte an iya bugto, ngan ha atubangan pa gud han mga diri tumuroo!
7 Ha pagkamatuod, pirde na kamo kon ginkikiha niyo an usa kag usa. Kay ano nga diri na la niyo pabay-an nga buhatan kamo hin sayop?+ Kay ano nga diri na la kamo magpalimbong?
8 Lugod, nagbubuhat kamo hin sayop ngan nanlilimbong, ngan ha iyo pa gud kabugtoan!
9 O diri ba kamo maaram nga an mga tawo nga diri magtadong diri makakapanunod han Ginhadian han Dios?+ Ayaw pagpasimang.* An mga nagbubuhat hin seksuwal nga imoralidad,*+ mga nagbubuhat hin idolatriya,+ mga nag-aadulteryo,+ mga lalaki nga nagpapakababaye,+ mga lalaki nga nagbubuhat hin homoseksuwalidad,*+
10 mga kawatan, mga tawo nga hakog,+ mga parahubog,+ mga parapanginsulto,* ngan mga parapangilkil* diri makakapanunod han Ginhadian han Dios.+
11 Ngan sugad hito an iba ha iyo hadto. Pero ginlimpyohan na kamo;+ ginbaraan na kamo;+ iginpahayag na kamo nga matadong+ ha ngaran han aton Ginoo nga hi Jesu-Kristo ngan pinaagi han espiritu han aton Dios.
12 Para ha akon, an ngatanan nga butang uyon ha balaud,* pero diri ngatanan nga butang mapulsanon.+ Para ha akon, an ngatanan nga butang uyon ha balaud, pero diri ako magpapakontrol ha* bisan ano.
13 An pagkaon para ha tiyan ngan an tiyan para ha pagkaon, pero pariho ito wawad-on han Dios.+ An lawas diri para ha seksuwal nga imoralidad* kondi para ha Ginoo,+ ngan an Ginoo para ha lawas.
14 Pero ginbuhi han Dios an Ginoo+ ngan bubuhion liwat kita tikang ha kamatayon+ pinaagi han iya gahum.+
15 Diri ba kamo maaram nga an iyo lawas mga parte han lawas han Kristo?+ Kukuhaon ko ba an mga parte han lawas han Kristo ngan itatampo ito ha mga parte han lawas han hostes? Diri gud!
16 Diri ba kamo maaram nga an bisan hin-o nga igintampo ha hostes nagigin usa nga lawas upod niya? Kay “an duha,” hiya nasiring, “magigin usa nga unod.”+
17 Pero an bisan hin-o nga igintampo ha Ginoo kahiusa niya ha espiritu.+
18 Palagiw tikang ha seksuwal nga imoralidad!*+ An tagsa nga iba pa nga sala nga mabuhat han usa nga tawo aada ha gawas han iya lawas, pero an bisan hin-o nga nagbibinuhat hin seksuwal nga imoralidad nakakasala ha iya kalugaringon nga lawas.+
19 Diri ba kamo maaram nga an iyo lawas amo an templo+ han baraan nga espiritu nga aada ha iyo, nga nakarawat niyo tikang ha Dios?+ Sugad man, diri na kamo an tag-iya han iyo kalugaringon,+
20 kay ginpalit kamo ha daku nga kantidad.+ Salit gamita an iyo lawas+ ha paghimaya ha Dios.+
Mga footnote
^ O “mga lalaki nga nakikighilawas ha mga lalaki.” Lit., “mga lalaki nga nadirig ha mga lalaki.”
^ O “pagpalimbong.”
^ O “mga nakakadaot manyakan.”
^ Karuyag sidngon, tawo nga nangangaro nga may panarhog o pamirit.
^ O “igintutugot.”
^ O “magpapasakop ha awtoridad han.”
