An Siyahan nga Surat ha mga Taga-Corinto 4:1-21

  • Mga tinaporan magin matinumanon (1-5)

  • Pagpaubos han Kristiano nga mga ministro (6-13)

    • ‘Ayaw pasobrahi an nahisurat’ (6)

    • Mga Kristiano kiritaon ha teatro (9)

  • Hi Pablo nagtatagad ha iya espirituwal nga mga anak (14-21)

4  Sadang kami tagdon han usa nga tawo sugad nga mga kabulig* han Kristo ngan mga tinaporan han sagrado nga mga tinago han Dios.+  May kalabotan hini, an mga tinaporan ginlalaoman nga magigin matinumanon.  Diri gud importante ha akon nga usisahon ako niyo o han hukmanan* han tawo. Ha pagkamatuod, diri ko ngani gin-uusisa an akon kalugaringon.  Kay waray ako nahuhunahuna nga bisan ano kontra ha akon kalugaringon. Pero diri ini nagpapamatuod nga matadong ako; hi Jehova* an nag-uusisa ha akon.+  Salit ayaw paghukmi+ an bisan ano antes han husto nga panahon, tubtob nga umabot an Ginoo. Iya dadad-on ha kalamrag an sekreto nga mga butang han kasisidman ngan ibubuhayhag an mga intensyon han mga kasingkasing, ngan an kada tagsa makarawat hin pagdayaw tikang ha Dios.+  Mga kabugtoan, igin-aplikar* ko ini nga mga butang ha akon kalugaringon ngan kan Apolos+ para ha iyo kaopayan, basi pinaagi ha amon mahibaroan niyo an patakaran: “Ayaw niyo pasobrahi an mga butang nga nahisurat,” basi diri kamo magpahitaas,+ nga ginpapaboran an usa kontra ha iba.  Kay hin-o ba an naghimo ha imo nga labaw kay ha iba? Ngan ano ba an aada ha imo nga waray mo karawata?+ Ha pagkamatuod, kon nakarawat mo ito, kay ano nga naghahambog ka nga baga hin waray mo ito makarawat?  Kontento na ba kamo? Riko na ba kamo? Naghahadi+ na ba kamo nga waray kami? Naghihingyap gud ako nga naghahadi na kamo, basi kami liwat maghadi kaupod niyo.+  Kay para ha akon, kami nga mga apostol an urhi nga igin-gawas han Dios sugad hin mga tawo nga ginsentensyahan hin kamatayon,+ kay nagin kiritaon kami ha teatro para ha kalibotan,+ ngan ha mga anghel ngan ha mga tawo. 10  Mga lurong+ kami tungod han Kristo, pero maaramon kamo tungod han Kristo; magluya kami, pero magkusog kamo; ginpapasidunggan kamo, pero kami ginpapakaalohan. 11  Tubtob hini mismo nga oras padayon kami nga nagugutom+ ngan nauuhaw+ ngan haros waray na iginbabado* ngan ginkakastigo*+ ngan waray balay 12  ngan nagpipinaniguro pagtrabaho pinaagi han amon mismo mga kamot.+ Kon gin-iinsulto, nagbibendisyon kami;+ kon gintitimaraot, nagpapailob gud kami;+ 13  kon ginpapakaraot, malumo kami nga nabaton;*+ nagin sugad kami hin basura* han kalibotan, an sinalikway ha ngatanan nga butang, tubtob yana. 14  Iginsusurat ko ini nga mga butang, diri basi ibutang kamo ha kaarawdan, kondi basi sagdonan kamo sugad nga akon hinigugma nga mga anak. 15  Kay bisan kon bangin may 10,000 kamo nga parabantay* nga kahiusa han Kristo, sigurado nga diri damu an iyo amay; kay kan Kristo Jesus, nagin amay niyo ako pinaagi han maopay nga sumat.+ 16  Salit gin-aaghat ko kamo nga magsubad ha akon.+ 17  Ito an hinungdan nga ginsusugo ko ngada ha iyo hi Timoteo, kay hiya an akon hinigugma ngan matinumanon nga anak ha Ginoo. Ipapahinumdom niya ha iyo an akon mga pamaagi* may kalabotan kan Kristo Jesus,+ sugad la han akon pagtutdo ha bisan diin ha tagsa nga kongregasyon. 18  An iba nagpapahitaas, nga baga hin diri ako makada ha iyo. 19  Pero kon kaburut-on ni Jehova,* makada ako dayon ha iyo, ngan hibabaroan ko, diri an ginsisiring han mga mapahitas-on, kondi an ira gahum. 20  Kay an Ginhadian han Dios iginpapakita, diri pinaagi han mga pulong, kondi pinaagi han gahum. 21  Ano an karuyag niyo? Makada ba ako ha iyo nga may panlatob+ o may gugma ngan malumo nga espiritu?

Mga footnote

O “mga sakop.”
O “korte.”
Kitaa an Ap. A5.
O “iginpahiuyon.”
Lit., “ngan hubo.”
O “ginsusuntok.”
Lit., “nanginginyupo kami.”
O “hugaw.”
O “mga paragtutdo.”
Lit., “akon mga dalan.”
Kitaa an Ap. A5.