Pilim so Panlingkor ed si Jehova Diad Inkatobonbalom

“Mansiansia ka ed saray bengatla ya inaral mo tan sinisiam, ya amtam no siopa so nanaralan mo ed sikara.”​—2 TIM. 3:14.

1. Panon a momoriaen nen Jehova so serbisyo na saray tobonbalon lingkor to?

 IMPORTANTIN tuloy ed si Jehova so sagradon serbisyo na saray tobonbalo, kanian sikatoy angipuyan na sakey a propesiya nipaakar ed sikara. Oniay inkanta na salmista: “Say katooan mo yapay da so inkasikara a mabulbulos dia ed agew na pakayarim, dia ed masanton ulop ya ompaway ed panaganakay kabuasan wala ed sika so linaew na kaugawan mo.” (Sal. 110:3) On, mabmabli ed imaton nen Jehova iray tobonbalon mabulos a manlilingkor ed sikato.

2. Antoy ipapaseseg na mundo a gegemtanen na saray tobonbalo natan?

² Sikayoran tobonbalo ed kongregasyon, indedika yo ta lay inkasikayo ed si Jehova? Nayarin naiirapan so arum a mandesidin pilien so panlingkor ed si Jehova. Lapud say ipapaseseg ed sikara na saray negosyante, propesor, tan no maminsan ni ingen et pati saray kapamilyaan tan kakaaro ra et say pampayaman. Sano say dadampoten na saray tobonbalo et saray maespiritual a kalat, kaslakan lan balawen ira na sayan mundo. Balet diad tua, say panlingkor ed tuan Dios so sankaabigan lan dalan na bilay a nagegemtan mo. (Sal. 27:4) Nipaakar ed saya, imanoen pa iyan taloran tepet: Akin a nepeg moy manlingkor ed Dios? Panon kan ontalona bilang dedikadon lingkor na Dios, antokaman ni so ibaga odino gawaen na arum? Antoran alay abig a pribilehyo so lukas ed sika?

Say Panlingkor ed si Jehova so Manepeg a Gawaen

3. Antoy nepeg ya epekto ed sikatayo na saray palsa nen Jehova?

³ Akin a nepeg moy manlingkor ed tua tan mabilay a Dios? Iiter na Apocalipsis 4:11 so manunan rason: “Sika so manepeg, Katawan mi tan Dios mi, a mangawat na gloria tan dayew tan pakayari: ta sika pinalsam so lapag a bengatla, tan lapu ed linawam wala ra tan sikara so apalsa.” Si Jehova so makapadinayew a Manamalsa na amin a bengatla. Agaylay karakep na impanggawa to ed dalin! Saray kakiewan, karosasan, ayayep, daydayat, kapalandeyan, tan waterfalls et ginawa ya amin nen Jehova. Oniay inkuan na Salmo 104:24: “Say dalin napno na kaykayamanan [na Dios].” Talagan misalsalamat itayo ed Dios a Jehova a simamaaron angiter ed sikatayo na laman tan isip pian napanggayagaan so bilay diad dalin tan saray maong a bengatlan wadia! Ag-itayo ta napapakiwas a manlingkor ed Dios lapud impapuson apresasyon ed makapakelkelaw iran palsa to?

4, 5. Antoray ginawa nen Jehova a sengegay inyapit nen Josue ed sikato?

⁴ Say sananey nin rason no akin a nepeg tayon panserbian si Jehova et naromog ed saray imbalikas na lider na Israel nensaman a si Josue. Sanen sikatoy asingger lan ompatey, oniay inkuanto ed saray Israelita: “Amta yo ed simoon a puso yo tan ed simoon a kamarerwa yo, ya anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo; sikara so agawa ya amin ed sikayo.” Akin ya onia so nibaga nen Josue?​—Jos. 23:14.

⁵ Lapud nanugaw si Josue ed Ehipto, maseguron amta to imay insipan nen Jehova ya ikdan To iray Israelita na sarili dan dalin. (Gen. 12:7; 50:24, 25; Exo. 3:8) Insan naimatonan to no panon a ginapoan nen Jehova a sumpalen itan a sipan diad impangidapo to na Samploran Salot ed Ehipto tan ed impanagdag to ed anawet-ulon si Faraon a mangibulos la ed saray Israelita. Sakey si  Josue ed saramay akabaliw ed Ambalangan Dayat, tan akaimaton ed inkalgep nen Faraon tan saray sundalo to. Diad samay andukey ya impanbaroy na saray Israelita ed Desierto na Sinai, ya adeskribin “abalbaleg tan makapataktakot a kalawakan,” et anengneng nen Josue no panoy impangitarya nen Jehova na amin a nakaukolan da. Ni sakey et anggapo so inatey ed inkapgaan odino eras. (Deu. 8:3-5, 14-16; Jos. 24:5-7) Sanen asabi imay panaon a sakopen la na saray Israelita so mabiskeg iran nasyon na Canaanita pian kayarianen so Insipan a Dalin, anengneng nen Josue no panon so impanuporta ed sikara na Dios a dadayewen to tan dadayewen met na arum ya Israelita.​—Jos. 10:14, 42.

6. Antoy makatulong ed sika pian manpilalek met lan manserbi ed Dios?

⁶ Amta nen Josue a tinoor nen Jehova iray sipan To. Kanian oniay inyabawag to: “Nipaakar ed siak tan say abung ko, manlingkor kami ed Jehova.” (Jos. 24:15) Sika met ey? Sano nodnonoten mo iray sipan na tuan Dios a sinumpal to la tan saramay sumpalen to ni labat, agta pampilalekan mo met lay manserbi ed sikato a singa ginawa nen Josue?

7. Akin a say panagpabautismo et importantin kundang a nepeg a dampoten na sakey?

⁷ No nodnonoten mo iray pinalsa nen Jehova tan dalepdepen mo iray alay abig tan talagan napanmatalkan a sipasipan to, nepeg ya agto ka labat itan pakiwasen a mangidedikay inkasika ed Dios, noagta isimbolo met itan diad pampabinyag. Say bautismo et sakey ya importantin kundang a nepeg a dampoten na saramay malabay a manlingkor ed Dios, unong a malinlinew ya impabitar na ginawa nen Jesus, ya Ehemplo tayo. Antis ton ginapoan so kimey to bilang Mesias, inasinggeran toy Juan a Managbautismo pian manpabinyag. Akin a ginawa ni nen Jesus itan a kundang? Oniay inkuan to ed saginonor: “Linmasur ak a nanlapu ed tawen, aliwan pian gawaen ko so linawak a dili, noag say linawa na angibaki ed siak.” (Juan 6:38) Ginawa sirin itan nen Jesus pian ipanengneng ya itatalaga to lay inkasikato ed panggawa na linawa nen Ama to.​—Mat. 3:13-17.

8. Akin a pinili nen Timoteo so pandayew ed Dios, tan anto sirin so nayarin nepeg mon gawaen?

⁸ Konsideraen pa met so nipaakar ed si Timoteo, say tobonbalon Kristiano a diad saginonor et angikdan nen Jehova na dakel iran kimey tan pribilehyo. Akin et pinili nen Timoteo so pandayew ed tuan Dios? Ibabaga ed sikatayo na Biblia ya ‘inaral to iray bengatla tan sinisia to’ iratan. (2 Tim. 3:14) Sano naaral mo lay Salita na Dios tan akombinse ka lan saray bangabangat na satan et tua, mipadpara met lay kipapasen mo ed si Timoteo. Sirin, kaukolan mo lay mandesisyon. Natan, itongtong mo ed atateng mo so desisyon mo. Ta sikara tan saray mamatatken ed kongregasyon so makatulong ed sika pian natalosan mo iray Makasulatan iran kakaukolanen parad bautismo.​—Basaen so Gawa 8:12.

9. Antoy nayarin reaksion na arum sano manpabautismo ka?

⁹ Say pampabautismo et balibalin pangigapoan na panaglingkor ed tuan Dios. No gawaen mo iyan kundang, aliling to et milumba ka la’d andukey a babatiken, a say premyo et bilay ya andi-anggaan tan liket a tarok na panaggaway linaway Dios. (Heb. 12:2, 3) Napaliket mo met iray kapamilyam a milulumba la, pati saray kakaarom ed loob na kongregasyon. Balet, say sankaimportantian  ed amin, napaliket moy puso nen Aman Jehova. (Basaen so Uliran 23:15.) On tua, nayarin agnatatalosan na arum no akin a pinilim so panlingkor ed si Jehova, tan ompan kontraen da ni ingen so desisyon mo. Nayarin sumpaen da ka ni. Balet, sarag mon talonaan irayan amin a subok.

Sano Tepetan Odino Sumpaen Da Ka

10, 11. (a) Antoray nayarin itepet ed sika na totoo nipaakar ed desisyon mon panlingkoran so Dios? (b) Antoy naaralan mo ed paraan na panangebat nen Jesus ed tepetepet nipaakar ed tuan panagdayew?

¹⁰ Lapud desisyon mon manserbi ed si Jehova et nayarin onkelaw iray kaeskuelaan mo, saray kakaabay yo, tan saray kakanayon mo. Ompan tepetan da ka no akin ya ontay desisyon mo tan no antoray sisisiaen mo. Panoy pangebat mo ey? Siempre, ta pian nipaliwawam iray rason ed desisyon mo, kaukolan mon analisaen so nonot tan liknaan mo. Tan sano eebatan mo iray tepet da nipaakar ed sisisiaen mo, say sankaabigan lan naalig mo et say alimbawa nen Jesus.

¹¹ Sanen tinetepetan na saray Judion lider na relihyon si Jesus nipaakar ed kikioli, impaimano to ed sikara so sakey a teksto ya agda inkonsidera. (Exo. 3:6; Mat. 22:23, 31-33) Ontan met, sanen sikatoy tinepetan na sakey ya eskriba no dinan so sankabalgan a ganggan, inebatan to itan diad impangaon na matukoy a teksto ed Biblia. Tan misalsalamat itan a too ed ebat nen Jesus. (Lev. 19:18; Deu. 6:5; Mar. 12:28-34) Lapud impangusar nen Jesus ed Kasulatan tan paraan na panagsalita to, ‘naapag so dakel a katooan,’ tan aglaingen ayarian na saray onsusumpa a sikatoy kabilen. (Juan 7:32-46) Sano ebatan mo iray tepet nipaakar ed pananisiam, usar mo so Biblia tan mansalitan “siuuyamo tan sitatakot [odino sirerespeto].” (1 Ped. 3:15) No agmo amtay ebat ed tepet da, aksobim itan, insan ibagam a mansukimat ka ni. Kayari na satan, anap mo itan a tema ed Watch Tower Publications Index odino Watchtower Library ed CD-ROM. No manparaan kan maong, naamtaan mo no ‘panon so nepeg mon iyebat.’​—Col. 4:6.

12. Akin ya agmo abuloyan iray panamasegsegang a manismaya ed sika?

¹² Aliwa labat a tepetepet nipaakar ed say talindeg tan sisisiaen mo so nayarin naabet mo. Lautla, ta say kabusol na Dios, si Satanas a Diablo, so mangokontrol ed sayan mundo. (Basaen so 1 Juan 5:19.) Agmo nailaloan a komendaan odino abobonan ka na amin, tan ompan sumpaen ka ni ingen na arum. Ompan ‘pabpabandayen da ka’ ni tan agda ka tundaan. (1 Ped. 4:4) Balet tandaan ya agmo bukbukor. Anggan si Jesu-Kristo a mismo et apasegsegang. Tan ontan met nen apostol Pedro, kanian oniay insulat to: “Inararok ira, agyo komon pankelawan so inmapoy a panali ed sikayo, ya onsabi ed sikayo pian pakasalian yo, singa bilang bengatla a pankelawan a nagawaan ed sikayo. Noag ingen, panliketan yo komon so pidamay yo ed saray irirap nen Kristo.”​—1 Ped. 4:12, 13.

13. Akin a walay rason na saray Kristiano a manliket anggano napapasegsegang ira?

¹³ No susungdoan mo iray panamasegsegang odino isusumpa lapud Kristiano ka, panliketan mo itan. Akin? Lapud sano labalabay ka na mundo, labay ton ibaga sirin et tutumboken mo iray estandarte nen Satanas, aliwan say Dios. Oniay impasakbay nen Jesus: “Abagey kayo la, sano amin a totoo mansalita ra na maong ed sikayo! Ta ontan lanlamang so ginawa na saray ama ra ed saray matila a propeta.” (Luc. 6:26) Saray panamasegsegang so pakapatnagan  ya onsasanok ed sikay Satanas tan say mundo to lapud manlilingkor ka ed si Jehova. (Basaen so Mateo 5:11, 12.) Say ‘pakapabanday lapud ngaran nen Kristo,’ et sakey a bengatlan nepeg a panliketan.​—1 Ped. 4:14.

14. Antoray maabig a resulta sano say sakey et pansiansiaen toy katooran to ed si Jehova anggano napapasegsegang?

¹⁴ Tandaan a no manmatoor ka ed si Jehova anggaman ed isusumpa, walay maabig a resulta na satan. Nia ra so apatira: Mangiiter kay pantasi nipaakar ed Dios tan ed Anak to. Napapaseseg iray agagi lapud matoor a pansusungdom. Saray makakaimaton ya agda ni kabat si Jehova et nayarin napakiwas a mananap ed sikato. (Basaen so Filipos 1:12-14.) Tan no kapigan a naeeksperiensyam so pangiiter nen Jehova ed sikay biskeg pian nasungdoay subok, mas lalon onaralem so panangarom ed sikato.

Lukas ed Sika so “Baleg a Kapot”

15. Anton “baleg a kapot” so alukasan ed si apostol Pablo?

¹⁵ Oniay insulat nen Pablo nipaakar ed samay ministeryo to ed Efeso: ‘Sakey a baleg a kapot so alukasan ed siak.’ (1 Cor. 16:8, 9) Satan a kapot et say baleg a pankanawnawan ipulong so maong a balita tan manggaway babangatan ed satan a syudad. Nen inawat itan nen Pablo, dakel so atulongan ton makaaral nipaakar ed si Jehova tan mandayew ed Sikato.

16. Diad anton pantalos a saray nakdaan et linmoob ed “sakey a silulukas a kapot” nen 1919?

¹⁶ Nen 1919, aliling to et angiyan so nitronon Ari a si Jesu-Kristo ed arapan na saray alanaan a wadia ni ed dalin na “sakey a pinto a silulukas.” (Apo. 3:8) Sikaray linmoob ed satan tan ginapoan dan impulong so maong a balita, ya imbabangat day katuaan ed Biblia tekep na apasimbalon seseg. Anto so resultay ministeryo ra ey? Akasabi la natan so maong a balita ed kasamsampotan na dalin, tan manga pitoran milyon lan totoo so awalaay ilalon manbilay na andi-anggaan diad balon mundo na Dios.

17. Panon kayon makaloob ed ‘baleg a kapot ya alukasan’?

¹⁷ “Sakey a baleg a kapot,” so siansia nin lukas ed amin a lingkor nen Jehova. Saramay onloob ditan et makaromog na gayaga tan inkapnek leleg dan papalaknaben so pibibiang da’d panagpulong na maong a balita. Sikayoran tobonbalo a lingkor nen Jehova, kaunongay kabaleg na panamabli yo ed agnaparaan a pribilehyon panulong ed arum a ‘manisia ed ebanghelyo’? (Mar. 1:14, 15) Ninonot yo ta lay pan-regular payunir odino pan-auxiliary payunir? Nilikud ed satan et lukas met ed sikayo so pankanawnawan manlingkor ed panangipaalagey na saray Kingdom Hall, diad Bethel, tan bilang misionero. Patikey lan patikey so panaon na sayan mauges a mundo nen Satanas, kanian diad ilalabas na kada agew et magmamaliw a mas apuraan so iloob ed sarayan klase na serbisyo ed Panarian. Natan, leleg a wala ni panaon, agyo kasi samboten so onloob ed sayan “baleg a kapot”?

“Tawayan Yo et Nanengneng Yo a si Jehova et Maong”

18, 19. (a) Antoy akatulong ed si David pian ombiskeg so pilalek ton panlingkoran si Jehova? (b) Antoy mangipapanengneng ya agbalot nagbabawian nen David so panaglingkor ed Dios?

¹⁸ Say apuyanan a salmistan David et mangiimbita ed sikatayo a ‘tawayan tan nengnengen a si Jehova et maong.’ (Sal. 34:8) Sanen si David ya ari na Israel nensaman et managpastol ni, sikatoy inliktar nen Jehova ed saray masesebeg ya ayep. Sikatoy sinuportaan na Dios ed impilaban to’d si Goliat tan inliktar To ed dakel a desyang. (1 Sam. 17:32-51; Sal. 18, superskripsion) Lapud abalbaleg a maaron kaabigan na Dios, apakiwas  si David a mangisulat: “Amayamay ira, O Jehova a Dios ko, so saray makapakelaw a gawam a ginawam, tan saray nonot mo nipaakar ed sikami; ag ira nisalaysay a mauksoy ed sika.”​—Sal. 40:5.

¹⁹ Naad-aron maong nen David si Jehova tan labay ton dayewen ed interon puso tan kanonotan. (Basaen so Salmo 40:8-10.) Diad inlalabas na panaon, agbalot nagbabawian nen David so impangusar toy bilay to ed panangidayew ed tuan Dios. Say pambilay tekep na debosyon ed Dios et impasen ton sankabalgan a kayamanan, salanti, lapuay liket ya anggapo lay makapipara. Sanen masiken la et oniay imbalikas to: “Sika so ilalok, O Katawan a Jehova: sika so nanmatalkan ko a nanlapu ed inkaugaw ko. Natan met nen masiken ak la tan ubanan la so ulok, O Dios, agmo ak ikaindan.” (Sal. 71:5, 18) Lalon binmiskeg so talek tan pikakaaro nen David ed si Jehova, anggano kinmapuy lay laman to.

20. Akin a say panaglingkor ed Dios so sankaabigan lan napangusaran moy bilay mo?

²⁰ Papaneknekay bilay di Josue, David tan Timoteo a say panaglingkor ed si Jehova so sankaabigan lan napangusaran moy bilay mo. Say temporaryon nagunggona ed karera ed sayan mundo et agbalot makakiking ed magnayon a gunggonan nagamoran mo ed ‘panlingkor ed Jehova ed simoon a pusom tan simoon a kamarerwam.’ (Jos. 22:5) No agmo ni indedika so inkasika ed si Jehova diad pikakasi, tepetan moy sarilim, ‘Antoy mamupuger ed siak a magmaliw a sakey ed saray Tasi nen Jehova?’ Natan no bautismado ka la, labay mo ta’n magmaliw a mas maliket ni bilay mo? No ontan sirin, pasyam so pibibiang mo ed ministeryo, tan itultuloy moy pamapaaligwas ed espiritualidad mo. Ontulong ed sika so ontumbok ya artikulo no panon mon napabulaslas so espiritualidad mo diad pangalig ed alimbawa nen apostol Pablo.

Panon Yon Ebatan?

• Mangiter na duaran rason no akin a nepeg itayon manlingkor ed Dios.

• Antoy akatulong ed si Timoteo pian pilien toy panlingkor ed Dios?

• Akin a nepeg moy magmaliw a mapekder sano napapasegsegang?

• Antoray lukas ed sikan pribilehyo?

[Tepetepet Parad Panagaral]

[Litrato ed pahina 18]

Say panlingkor ed si Jehova so sankaabigan a dalan na bilay

[Litrato ed pahina 19]

Naebatan mo kasi iray tepet nipaakar ed pananisiam?