Exodo 9:1-35

  • Maikalima a didigra: matay dagiti taraken nga animal (1-7)

  • Maikanem a didigra: agletteg iti nakaro dagiti tattao ken animal (8-12)

  • Maikapito a didigra: agtudo iti uraro (13-35)

    • Makita ni Faraon ti pannakabalin ti Dios (16)

    • Maipakaammo ti nagan ni Jehova (16)

9  Kinuna ni Jehova ken Moises: “Ibagam ken Faraon, ‘Kinuna ni Jehova a Dios dagiti Hebreo: “Palubosam dagiti tattaok tapno makapagserbida kaniak.+  Ngem no igawidmo ida ken dimo latta kayat a palubosan ida,  siak ni Jehova,+ patayekto dagiti tarakenmo nga animal babaen ti pannakabalinko. Mapestento dagiti kabalio, asno, kamelio, baka, ken karnero.+  Ta siak ni Jehova, sigurado nga agdumanto ti panangtratok kadagiti taraken dagiti Israelita ken kadagiti taraken dagiti Egipcio. Awanto ti matay a taraken dagiti Israelita.”’”+  Nangikeddeng met ni Jehova iti tiempo, a kunana: “Siak ni Jehova, inton bigat nga aramidek daytoy iti daga.”  Inaramid dayta ni Jehova iti simmaganad nga aldaw. Natay ti amin a kita ti taraken dagiti Egipcio+ ngem awan ti natay a taraken dagiti Israelita.  Pinaimbestigar ni Faraon ti napasamak ket naammuanna nga awan a pulos ti natay a taraken dagiti Israelita. Ngem natangken latta ti pusona, ket saanna a pinalubosan dagiti Israelita.+  Kalpasanna, kinuna ni Jehova kada Moises ken Aaron: “Mangrakemkayo iti dapo iti pugon, ket ipuruakto ni Moises dayta iti imatang ni Faraon.  Agwarasto dayta kas tapok iti intero nga Egipto, ket agbalinto a nakaro a letteg iti tao ken animal iti intero nga Egipto.” 10  Gapuna, nangrakemda iti dapo iti pugon ket napanda ken Faraon. Impuruak dayta ni Moises ket nagtubo dagiti nakaro a letteg kadagiti tattao ken animal. 11  Saan a nabaelan dagiti salamangkero a papadi ti sumango ken Moises gapu ta naaddaanda met kadagiti letteg a kas iti amin nga Egipcio.+ 12  Ngem impalubos ni Jehova a sumukir latta ni Faraon. Saanna ida a pinati kas iti imbaga ni Jehova ken Moises.+ 13  Kinuna ni Jehova ken Moises: “Sapaem ti bumangon inton bigat ket mapanmo ibaga ken Faraon, ‘Kinuna ni Jehova a Dios dagiti Hebreo: “Palubosam dagiti tattaok tapno makapagserbida kaniak. 14  Ta amin a kalamidad ket ipagtengko kenka, kadagiti adipenmo, ken kadagiti tattaom, tapno maammuam nga awan ti kas kaniak iti intero a daga.+ 15  Ta mabalin nga usarek ti pannakabalinko a mangdusa kenka ken kadagiti tattaom babaen ti nakaro a sakit tapno mapukawka koman ditoy daga. 16  Ngem pinagtalinaedka a sibibiag gapu iti daytoy a rason: tapno maipakitak kenka ti pannakabalinko ken maipakaammo ti naganko iti intero a daga.+ 17  Natangsitka kadi latta ta saanmo a palubosan a pumanaw dagiti tattaok? 18  Iti kastoy nga oras inton bigat, pagtuduekto iti uraro* a saan pay pulos a napasamak iti Egipto. 19  Pailinongmo ngarud ti amin a tarakenmo ken amin a kukuam iti talon. Agtinnagto dagiti uraro ket matayto dagiti matupakan a tao wenno animal nga adda iti ruar.”’” 20  Dagiti adipen ni Faraon a namati iti sao ni Jehova dagus a pinaglinongda dagiti adipenda ken tarakenda. 21  Ngem adda dagiti saan a namati iti imbaga ni Jehova ket binaybay-anda dagiti adipen ken tarakenda iti ruar. 22  Kinuna ni Jehova ken Moises: “Iyunnatmo ta imam a nakaturong iti langit, tapno agtinnag ti uraro kadagiti tattao,+ animal, ken amin a mula iti intero nga Egipto.”+ 23  Isu nga inyunnat ni Moises nga inturong ti bastonna iti langit, ket pinagtudo ni Jehova iti uraro ken apuy* a napakuyogan iti gurruod, ket agtultuloy a pinagtudo ni Jehova iti uraro iti Egipto. 24  Agkimkimat idi nagtinnag ti nagdadagsen nga uraro. Idi pay laeng a napasamak ti kasta iti Egipto sipud panagbalinna a nasion.+ 25  Natay ti amin a natupakan iti uraro iti Egipto, tattao man wenno animal. Nadadael met ti amin a mula ken kayo.+ 26  Idiay laeng Gosen nga ayan dagiti Israelita a saan a nagtudo iti uraro.+ 27  Isu a pinaayaban ni Faraon da Moises ken Aaron ket kinunana kadakuada: “Aminek itan a nagbasolak. Ni Jehova ket nalinteg. Siak ken dagiti tattaok ti nakabasol. 28  Ipakaasiyo ken Jehova nga agsardeng koman ti gurruod ken panagtudo iti uraro. Kalpasanna, palubosankayton a pumanaw.” 29  Kinuna kenkuana ni Moises: “Apaman a makaruarak iti siudad, agkararagakto ken Jehova. Agsardengto ti gurruod ken ti panagtudo iti uraro, tapno maammuam a ti daga ket kukua ni Jehova.+ 30  Ngem ammok a sika ken uray dagiti adipenmo ket saanto latta nga agbuteng ken Jehova a Dios.” 31  Nadadael dagiti mula a lino ken sebada, ta natangkenanen dagiti dawa ti sebada ken panagsasabongen dagiti lino. 32  Ngem saan a nadadael ti trigo ken ti espelta ta naladladaw ti pannakaapitda. 33  Pimmanaw ni Moises iti sango ni Faraon ket rimmuar iti siudad. Inngatona dagiti imana tapno agkararag ken Jehova isu a simmardeng ti gurruod, tudo, ken ti panagtinnag ti uraro.+ 34  Idi nakita ni Faraon nga awanen ti tudo, uraro, ken gurruod, nagbasol manen ken nasukir latta,+ ket kasta met dagiti adipenna. 35  Nasukir latta ni Faraon, ket dina pinalubosan a pumanaw dagiti Israelita, kas iti imbaga ni Jehova babaen ken Moises.+

Footnotes

Wenno “dadakkel a yelo.”
Nalabit tumukoy iti napigsa a kimat.