Exodo 3:1-22

  • Ni Moises ken ti sumsumged a siitan a bassit a kayo (1-12)

  • Ilawlawag ni Jehova ti naganna (13-15)

  • Bilinen ni Jehova ni Moises (16-22)

3  Ni Moises ket nagbalin a pastor dagiti taraken ti katuganganna a ni Jetro+ a padi ti Midian. Impanna ida iti makinlaud a paset ti let-ang ket nakadanon idiay Horeb a bantay ti pudno a Dios.+  Ket nagparang kenkuana ti anghel ni Jehova iti gumilgil-ayab nga apuy iti siitan a bassit a kayo.+ Nakita ni Moises a sumsumged ti kayo ngem saan a maur-uram.  Kinuna ni Moises: “Nakaskasdaaw daytoy! Apay a saan a mauram ti kayo? Asitgak man tapno maammuak.”  Idi makita ni Jehova nga umas-asideg ni Moises, inawaganna manipud iti siitan a bassit a kayo ket kinunana: “Moises! Moises!” Ket insungbatna: “Wen, Apo.”  Kinuna ti Dios: “Dikan umasideg pay. Ikkatem dagiti sandaliasmo ta agtaktakderka iti nasantuan a lugar.”  Intuloyna nga imbaga: “Siak ti Dios ni amam, ti Dios ni Abraham,+ ti Dios ni Isaac,+ ken ti Dios ni Jacob.”+ Liningdan ni Moises ti rupana ta mabuteng a kumita iti pudno a Dios.  Kinuna pay ni Jehova: “Nakitak ti nakaro a kasasaad ti ilik nga adda idiay Egipto, ket nangngegko ti panagpakpakaasida gapu kadagiti mangad-adipen kadakuada; ammok dagiti panagrigrigatda.+  Tulongak ida ken isalakanko ida manipud kadagiti Egipcio+ ken iruarko ida iti dayta a lugar ket ipanko ida iti nasayaat ken nalawa a daga a pagay-ayusan ti gatas ken diro,+ ti lugar dagiti Canaanita, Heteo, Amoreo, Perizeo, Heveo, ken Jebuseo.+  Nangngegko ti panagpakpakaasi dagiti Israelita, ket nakitak met ti kinaulpit dagiti Egipcio a mangirurrurumen kadakuada.+ 10  Umayka ta ibaonka ken Faraon ket iruarmo dagiti tattaok nga Israelita manipud Egipto.”+ 11  Ngem kinuna ni Moises iti pudno a Dios: “Saanak a maikari a mapan ken Faraon tapno iruarko dagiti Israelita iti Egipto.” 12  Gapu iti dayta, kinuna ti Dios: “Addaakto kenka+ ket daytoy ti pagilasinan a siak ti nangibaon kenka: Inton nairuarmon dagiti tattaok manipud Egipto, agserbikayto* kaniak a pudno a Dios iti daytoy a bantay.”+ 13  Ngem kinuna ni Moises iti pudno a Dios: “No mapanak kadagiti Israelita ken ibagak kadakuada, ‘Imbaonnak ti Dios dagidi ammayo,’ ket saludsodenda, ‘Ania ti naganna?’+ Ania ti ibagak?” 14  Isu nga imbaga ti Dios ken Moises: “Agbalinakto iti Aniaman a Piliek* a Pagbalinan.”*+ Innayonna pay: “Daytoy ti ibagam kadagiti Israelita, ‘Ni Agbalinakto imbaonnak kadakayo.’”+ 15  Inulit ti Dios nga imbaga ken Moises: “Kastoy ti ibagam kadagiti Israelita, ‘Ni Jehova a Dios dagidi ammayo, ti Dios ni Abraham,+ ti Dios ni Isaac,+ ken ti Dios ni Jacob,+ imbaonnak kadakayo.’ Dayta ti naganko iti agnanayon,+ ket dayta ti pangawag kaniak ti amin a henerasion. 16  Ummongem dagiti panglakayen ti Israel ket ibagam kadakuada, ‘Nagparang kaniak ni Jehova a Dios dagidi ammayo, ti Dios da Abraham, Isaac, ken Jacob, ket kinunana: “Makitkitak ti panagrigrigatyo+ ken ti mapaspasamak kadakayo iti Egipto. 17  Ikarik nga isalakankayto+ iti ima dagiti Egipcio a mangparparigat kadakayo ket ipankayo iti lugar dagiti Canaanita, Heteo, Amoreo,+ Perizeo, Heveo, ken Jebuseo,+ iti daga a pagay-ayusan ti gatas ken diro.”’+ 18  “Sigurado a denggendakanto.+ Kaduam dagiti panglakayen ti Israel a mapan iti ari ti Egipto ket ibagayo kenkuana: ‘Nakisao kadakami ni Jehova a Dios dagiti Hebreo.+ Palubosannakami koma nga agbiahe iti tallo nga aldaw a mapan idiay let-ang tapno agidatonkami ken Jehova a Diosmi.’+ 19  Ngem ammok a dinakayto palubosan ti ari ti Egipto, malaksid no adda mannakabalin nga ima a mangpilit kenkuana.+ 20  Ket usarekto ti pannakabalinko a mangdusa iti Egipto babaen kadagiti milagro ket kalpasan dayta, palubosannakayton a pumanaw.+ 21  Tignayekto dagiti Egipcio a mangted a sipaparabur kadagiti tattaok tapno saankayto nga ima-ima a pumanaw iti Egipto.+ 22  Agdawatto ti tunggal babai kadagiti bambanag a naaramid iti pirak ken balitok agraman badbado iti kaarrubana ken iti babai nga aggigian iti balayna, ket isuotyonto dagita kadagiti annakyo a lallaki ken babbai. Alaenyonto ti sanikua dagiti Egipcio.”+

Footnotes

Wenno “agdaydayawkayto.”
Wenno “Kayatko.”
Wenno “Agbalinakto no Anianto ti Pagbalinak.” Kitaem ti App. A4.