Exodo 4:1-31
4 Ngem simmungbat ni Moises: “No ngay saandak a patien ken saandak a denggen+ ket ibagada, ‘Ni Jehova saan a nagparang kenka.’”
2 Kinuna kenkuana ni Jehova: “Ania dayta ig-iggamam?” Insungbat ni Moises: “Baston, Apo.”
3 Kinuna ti Dios: “Ipuruakmo iti daga.” Impuruakna iti daga, ket nagbalin nga uleg+ isu a nagsanud ni Moises.
4 Kinuna ni Jehova ken Moises: “Tiliwem iti ipusna.” Isu a tiniliwna ket nagbalin a baston idi naiggamanna.
5 Kalpasanna, kinuna ti Dios: “Aramidem daytoy tapno mamatida a nagparang kenka ni Jehova a Dios dagidi ammada, ti Dios ni Abraham, ti Dios ni Isaac, ken ti Dios ni Jacob.”+
6 Kinuna manen ni Jehova: “Pangngaasim ta isuksokmo ta imam iti badom.” Insuksok ni Moises ti imana ket idi inruarna, pimmuraw a kas iti niebe gapu iti kukutel!+
7 Kalpasan dayta kinunana: “Isuksokmo manen ta imam iti badom.” Insuksok ni Moises ti imana ket idi inruarna, awanen ti kukutelna!
8 Kinuna ti Dios: “No saandaka a patien ken denggen kalpasan ti umuna a milagro nga inaramidmo, sigurado a patiendanto ti sumaruno nga aramidem.+
9 Ngem no saandaka latta a patien ken denggen kalpasan ti dua a milagro, mangalakanto iti danum iti Karayan Nilo ken ibuyatmo iti daga ket agbalinto a dara.”+
10 Kinuna ni Moises ken Jehova: “Pakawanennak, Jehova, ngem saanak a nalaing nga agsao sipud pay idi agingga ita a makisarsaritaka iti adipenmo ta nakapuyak nga agsao.”*+
11 Kinuna ni Jehova kenkuana: “Asino ti nangaramid iti ngiwat ti tao, wenno asino ti mamagbalin kadakuada nga umel, tuleng, nalawag ti panagkitada, wenno bulsek? Saan aya a siak, ni Jehova?
12 Inkan ket tulongankanto nga agsao* ken isurokto ti rumbeng a sawem.”+
13 Ngem kinunana: “Pakawanennak, Jehova, ngem pangngaasim ta sabali laengen ti ibaonmo.”
14 Nakaunget ni Jehova ken Moises ket kinunana: “Saan aya a kabsatmo ni Aaron+ a Levita? Ammok a nalaing nga agsao. Ket um-umayen a sumabet kenka. Maragsakanto inton makitanaka.+
15 Isu a kasaritam ni Aaron ken ibagam dagiti imbagak kenka;+ ket tulongankayto nga agsao+ ken isurokto no ania ti aramidenyo.
16 Isunto ti agsao para kenka kadagiti tattao, ken isunto ti agbalin a pannakangiwatmo, ket ibagamto kenkuana ti kuna ti Dios.+
17 Itugotmo daytoy a baston ket daytanto ti usarem a mangaramid kadagiti milagro.”+
18 Nagsubli ni Moises ken Jetro a katuganganna+ ket kinunana kenkuana: “Palubosannak koma nga agsubli idiay Egipto tapno makitak no sibibiag pay dagiti kakabsatko.” Kinuna ni Jetro ken Moises: “Sige, mapanka.”
19 Kalpasanna, kinuna ni Jehova ken Moises idiay Midian: “Agsublika idiay Egipto ta natayen ti amin nga agpangpanggep a mangpatay kenka.”*+
20 Innala ni Moises ti asawana ken dagiti annakna sa insakayna ida iti asno, ket nagsublida idiay Egipto. Intugotna met ti baston ti pudno a Dios.
21 Kalpasanna, kinuna ni Jehova ken Moises: “Inton makadanonkan idiay Egipto, usarem ti intedko a pannakabalin a mangaramid iti amin a milagro iti sanguanan ni Faraon.+ Ngem ipaluboskonto a sumukir* ni Faraon+ isu a saannanto a palubosan dagiti tattaok a pumanaw.+
22 Ibagam ken Faraon, ‘Kastoy ti kinuna ni Jehova: “Ti Israel ket anakko, ti inauna nga anakko.+
23 Ibagak kenka, Palubosam ti anakko a pumanaw tapno agserbi kaniak. Ngem no dimo kayat, patayek ti anakmo, ti inauna nga anakmo.”’”+
24 Iti pagdagusan nga adda iti igid ti dalan, nagparang ni Jehova+ kenkuana* ket panggepna a patayen.+
25 Idi kuan, nangala ni Zipora+ iti natadem a bato* ket kinugitna ti anakna ken impuruakna ti inikkatna a kudil ti anakna kadagiti sakana* ket kinunana: “Agsipud ta maysaka a nobio babaen iti daytoy a dara.”
26 Gapu iti dayta, saanen nga inan-ano ti Dios. Kinuna ni Zipora: “‘Maysaka a nobio babaen iti daytoy a dara,’ gapu ta kinugitko ti anakko.”
27 Kalpasanna, kinuna ni Jehova ken Aaron: “Sabatem ni Moises idiay let-ang.”+ Isu a napanna sinabat idiay bantay ti pudno a Dios+ ket inagkanna ni Moises.
28 Imbaga ni Moises ken Aaron ti amin a kinuna ni Jehova,+ ken ti amin a milagro nga imbilinna nga aramidenna.+
29 Kalpasan dayta, inummong da Moises ken Aaron ti amin a panglakayen dagiti Israelita.+
30 Imbaga ni Aaron kadakuada ti amin a sinao ni Jehova ken Moises, ket inaramidna dagiti milagro+ iti imatang dagiti tattao.
31 Gapu iti dayta, namati dagiti tattao.+ Nagrukob ken nagruknoyda idi nangngegda a tulongan ni Jehova dagiti Israelita+ ken nakitana dagiti rigatda.+
Footnotes
^ Lit., “nadagsen ti bibigko.”
^ Lit., “addaakto iti ngiwatmo.”
^ Wenno “a mangbirbirok iti kararuam.”
^ Lit., “tumangken ti puso.”
^ Posible a tumukoy iti “anak ni Moises.”
^ Mabalin a tumukoy kadagiti saka ti anghel.
^ Wenno “kutsilio a bato.”
