Exodo 36:1-38

  • Agsobsobra dagiti naawat a kontribusion (1-7)

  • Pannakaaramid ti tabernakulo (8-38)

36  “Agkakadua da Bezalel ken Oholiab ken ti amin a nalaing* a tattao nga inikkan ni Jehova iti sirib ken pannakaawat tapno maaramidda ti amin a trabaho para iti tabernakulo kas iti imbilin ni Jehova.”+  Ket inayaban ni Moises da Bezalel ken Oholiab ken ti amin a nalaing a tattao nga inikkan ni Jehova iti sirib,+ tunggal maysa a naimpusuan a nagboluntario a mangaramid iti trabaho.+  Innalada ken Moises ti amin a kontribusion+ nga inyeg dagiti Israelita para iti nasantuan a proyekto. Ngem inaldaw latta nga inyeg dagiti Israelita kenkuana dagiti boluntario a kontribusionda.  Idi narugiandan ti nasantuan a proyekto, nagsasaruno ti amin nga eksperto a trabahador a napan  ken Moises, ket imbagada: “Agsobsobran ti it-ited dagiti tattao para iti trabaho nga imbilin ni Jehova.”  Isu nga imbilin ni Moises a maipakaammo iti intero a kampo: “Isardengyon ti mangted iti kontribusion para iti nasantuan a proyekto.” Ket insardeng dagiti tattao ti mangted.  Umanayen dagiti kontribusion a pangleppas iti amin a proyekto, ket agsobsobra payen.  Isu nga amin nga eksperto a trabahador+ inaramidda ti tabernakulo+ nga addaan iti 10 a pessat ti tela a naabel kadagiti napino a lienso a sinulid, asul a sinulid, purpura a sinulid a delana, ken nalabaga a sinulid; binordaanna* dagita kadagiti kerubin.+  Tunggal pessat ti tela ket 28 a kasiko* ti kaatiddogna ken 4 a kasiko ti kaakabana. Agpapada ti rukod ti amin a pessat. 10  Pinagsasaipna* ti lima a pessat ti tela. Kasta met ti inaramidna iti lima pay a sabali a pessat. 11  Kalpasanna, nangaramid kadagiti pagyusokan nga asul a sinulid iti murdong ti umuna a napagsasaip a tela, a pakaisilpuan ti maikadua a napagsasaip a tela. Kasta met laeng ti inaramidna iti murdong ti maikadua a napagsasaip a tela tapno agsilpoda. 12  Tapno agbabatog ti panagsilpoda, 50 ti inaramidna a pagyusokan iti murdong ti umuna ken 50 met a pagyusokan iti murdong ti maikadua. 13  Nangaramid met iti 50 a kawit a balitok ket pinagsilpona ti dua a napagsasaipen a tela para iti tabernakulo. 14  Nangaramid met iti 11 a pessat ti tela+ a dutdot ti kalding ti materialesna. Dagita ti nagbalin nga abbong ti tabernakulo. 15  Tunggal pessat ti tela ket 30 a kasiko ti kaatiddogna ken 4 a kasiko ti kaakabana. Agpapada ti rukod ti 11 a pessat. 16  Kalpasanna, pinagsasaipna ti lima a pessat ti tela. Kasta met ti inaramidna iti innem pay a sabali a pessat. 17  Nangaramid iti 50 a pagyusokan iti murdong ti umuna a napagsasaip a tela, a pakaisilpuan ti maikadua a napagsasaip a tela. Ket 50 met la a pagyusokan ti inaramidna iti murdong ti maikadua a napagsasaip a tela tapno agsilpoda. 18  Ken nangaramid iti 50 a kawit a gambang ket pinagsilpona ti dua a napagsasaipen a tela para iti tabernakulo. 19  Nangaramid iti abbong ti tabernakulo a lalat ti kalakian a karnero ti materialesna sa natinaan iti nalabaga. Nangaramid pay iti maysa nga abbong ti tabernakulo a lalat ti foka.+ 20  Kalpasanna, nangaramid kadagiti hamba a kayo ti akasia+ a naipatakder iti amin a sikigan ti tabernakulo.+ 21  Ti tunggal hamba ket 10 a kasiko ti kangatona ken maysa ket kagudua a kasiko ti kaakabana. 22  Adda dua a pannakasaka ti tunggal hamba. Naisulbong dagita iti dua a pirak a batay. Kasta ti panangdiseniona iti amin a hamba ti tabernakulo. 23  Nangaramid iti 20 a hamba para iti abagatan a sikigan ti tabernakulo. 24  Kalpasanna, nangaramid iti 40 a pirak a batay a nakaisulbongan ti 20 a hamba, dua a batay para iti dua a pannakasaka ti maysa a hamba. Kasta ti pannakaaramid ti dadduma pay a hamba.+ 25  Nangaramid met iti 20 a hamba para iti amianan a sikigan ti tabernakulo 26  ken 40 a pirak a batay. Tunggal hamba ket naisulbong iti dua a pirak a batay. 27  Nangaramid iti innem a hamba para iti laud a sikigan ti tabernakulo.+ 28  Nangaramid met iti dua a hamba a pannakaadigi ti dua a suli ti laud a sikigan ti tabernakulo. 29  Trianggulo ti disenio dagiti hamba. Ti dua a naipatakder a puonda ket nagsinnabat iti ngato nga ayan ti umuna a sinansingsing a pagyusokan. Kasta ti naaramid iti dua a pannakaadigi iti suli. 30  Isu nga adda 8 a hamba ken 16 a pirak a batay. Naisulbong ti tunggal hamba iti dua a babassit a pirak a batay. 31  Ket nangaramid kadagiti trangka a kayo ti akasia a namagkakamang kadagiti hamba; lima a trangka para iti maysa a sikigan ti tabernakulo,+ 32  lima a trangka para iti maysa pay a sikigan ti tabernakulo, ken lima para kadagiti hamba iti laud a sikigan. 33  Ti makintengnga a trangka ket naikabit nga aglaylayon iti tengnga dagiti hamba, manipud iti maysa nga ungto agingga iti sabali nga ungto. 34  Kinalupkopanna dagiti hamba iti balitok, ket inaramidna dagiti balitok a sinansingsing a pagyusokan a pangtengngel kadagiti trangka, ken kinalupkopanna dagiti trangka iti balitok.+ 35  Nangaramid iti kortina+ a ti materialesna ket asul a sinulid, purpura a sinulid a delana, nalabaga a sinulid, ken napino a lienso a sinulid. Binordaanna+ dayta kadagiti kerubin.+ 36  Inyaramidanna dayta iti uppat nga adigi nga akasia ket kinalupkopanna iti balitok. Nangaramid met kadagiti kawit a balitok, ken nangsukog iti uppat a pirak a batay a pakaisulbongan dagiti adigi. 37  Kalpasanna, ti ruangan ti tolda ket inyaramidanna iti tabing* a ti materialesna ket asul a sinulid, purpura a sinulid a delana, nalabaga a sinulid, ken napino a lienso a sinulid.+ 38  Ti kortina ket inyaramidanna met iti lima nga adigi ken kawit. Kinalupkopanna iti balitok dagiti murdong ken dagiti pagikonektaran.* Ngem gambang ti inusarna a nangaramid iti lima a batay a pakaisulbongan dagiti adigi.

Footnotes

Lit., “tunggal masirib ti pusona.”
Nalawag a tumukoy ken Bezalel.
Ti 1 kasiko ket 44.5 cm. Kitaem ti App. B14.
Wenno “Pinagsisilpona.”
Wenno “kortina.”
Wenno “galut; pagpairut; barut; rematse.”