Exodo 27:1-21

  • Altar ti daton a mapuoran (1-8)

  • Ti paraangan (9-19)

  • Lana para iti kandelero (20, 21)

27  “Mangaramidkayo iti kuadrado nga altar manipud iti kayo ti akasia;+ lima a kasiko* ti kaatiddogna, lima a kasiko ti kaakabana, ken tallo a kasiko ti kangatona.+  Mangaramidkayo iti saggaysa a sara+ iti uppat a suli ti altar. Paset ti altar dagita a sara. Ti intero nga altar ket kalupkopanyo iti gambang.+  Mangaramidkayo kadagiti pala, malukong, tinidor, pagikkan iti beggang, ken timba a pangikargaanyo kadagiti maikkat a dapo* iti altar. Gambang ti usarenyo a pangaramid amin kadagita.+  Mangaramidkayo iti gambang a parilia* para iti altar. Mangaramidkayo met iti uppat a sinansingsing a pagyusokan iti uppat a suli iti ruar ti altar.  Ikabilyo ti parilia iti uneg ti altar ngem agingga laeng iti makintengnga a pasetna.  Mangaramidkayo kadagiti assiw a kayo ti akasia ket kalupkopanyo dagita iti gambang.  Ikabilyo dagiti assiw kadagiti sinansingsing a pagyusokan iti agsumbangir a sikigan ti altar no awitenyo dayta.+  Tabla ti mausar a materiales iti aramidenyo nga altar ken awan nagyan ti unegna. Masapul a maaramid dayta maitunos iti naipakitan kenka idiay bantay.+  “Mangaramidkayo iti paraangan+ ti tabernakulo. Iti abagatan a sikigan ti paraangan, mangikabilkayo iti kortina a 100 a kasiko ti kaatiddogna ken naabel iti napino a lienso a sinulid.+ 10  Mangaramidkayo iti 20 nga adigi ken 20 a gambang a batay a pakaisulbonganda. Pirak dagiti aramidenyo a kawit dagiti adigi ken dagiti pagikonektaran* kadagita. 11  Iti makin-amianan a sikiganna, mangikabilkayo iti kortina a 100 a kasiko ti kaatiddogna. Mangaramidkayo met iti 20 nga adigi ken 20 a gambang a batay a pakaisulbonganda. Pirak met dagiti aramidenyo a kawit ken pagikonektaran* dagiti adigi. 12  Iti laud a sikigan ti paraangan, mangikabilkayo iti kortina a 50 a kasiko ti kaatiddogna. Mangaramidkayo iti 10 nga adigi ken 10 a gambang a batay a pakaisulbonganda. 13  Ti kaatiddog ti daya a sikigan* ti paraangan ket 50 a kasiko. 14  Iti makannawan ti ruangan, mangikabilkayo iti kortina a 15 a kasiko ti kaatiddogna, nga addaan iti tallo nga adigi ken tallo a batay a pakaisulbonganda.+ 15  Iti makannigid ti ruangan, mangikabilkayo iti kortina a 15 a kasiko ti kaatiddogna, nga addaan iti tallo nga adigi ken tallo a batay a pakaisulbonganda. 16  “Ti ruangan ti paraangan ket masapul a mayaramidan iti tabing* a 20 a kasiko ti kaatiddogna ken naabel kadagiti asul a sinulid, purpura a sinulid a delana, nalabaga a sinulid, ken napino a lienso a sinulid.+ Mangaramidkayo met iti uppat nga adigi ken uppat a batay a pakaisulbonganda.+ 17  Pirak dagiti aramidenyo a barut ken kawit ti amin nga adigi iti aglawlaw ti paraangan, ngem gambang dagiti batay a pakaisulbonganda.+ 18  Ti paraangan ket masapul a 100 a kasiko ti kaatiddogna,+ 50 a kasiko ti kaakabana, ken 5 a kasiko ti kangatona, ken napino a lienso a sinulid ti materialesna. Gambang dagiti batay a pakaisulbongan dagiti adigina. 19  Masapul a gambang ti amin nga alikamen ken bambanag a mausar iti panagserbi iti tabernakulo, agraman dagiti pasok ti tolda ken amin a pasok ti paraangan.+ 20  “Ibilinmo kadagiti Israelita a mangtedda kenka kadagiti kasayaatan a puro a lana ti olibo para iti kandelero tapno kanayon a nakasindi dagiti lamparana.+ 21  Iti tolda a pagkonsultaan, iti ruar ti kortina nga asideg iti Testimonia,+ iyurnos ni Aaron ken dagiti annakna a pagtalinaeden a nakasindi dagiti lampara iti agpatnag iti sanguanan ni Jehova.+ Agnanayon dayta a paglintegan a tungpalen dagiti Israelita ken ti amin a henerasionda.+

Footnotes

Ti 1 kasiko ket 44.5 cm. Kitaem ti App. B14.
Wenno “nataba a dapo,” kayatna a sawen, dapo a nabasa iti taba dagiti daton.
Sinanrehas a pagiparabawan iti maidaton.
Wenno “galut; pagpairut; barut; rematse.”
Wenno “galut; pagpairut; barut; rematse.”
Lit., “iti makindaya a sikigan a sumango iti pagsingisingan ti init.”
Wenno “kortina.”